കോവിഡ് വ്യാപന പശ്ചാത്തലത്തില്‍ ഡല്‍ഹിയില്‍ എല്ലാ വിദ്യാഭ്യാസ സ്ഥാപനങ്ങളും അടച്ചുപൂട്ടി. സ്‌കൂളുകളും കോളേജുകളും അടച്ചുപൂട്ടുന്നതായി മുഖ്യമന്ത്രി അരവിന്ദ് കെജ്‌രിവാളാണ് വെള്ളിയാഴ്ച അറിയിച്ചത്. രാജ്യ തലസ്ഥാനത്ത് ഈ വര്‍ഷം ആദ്യമായി പ്രതിദിന കോവിഡ് കേസുകള്‍ 7,000 കടന്നിരുന്നു. കോവിഡ് രണ്ടാം തരംഗം കൂടുതല്‍ വ്യാപിക്കുന്ന സാഹചര്യത്തില്‍ നിരവധി സംസ്ഥാനങ്ങളിലും ഡല്‍ഹി ഉള്‍പ്പെടെയുള്ള കേന്ദ്രഭരണ പ്രദേശങ്ങളിലും രാത്രി കര്‍ഫ്യൂ അടക്കമുള്ള കടുത്ത നിയന്ത്രണങ്ങളാണ് ഏര്‍പ്പെടുത്തിയിരിക്കുന്നത്. ഡല്‍ഹിയില്‍ എല്ലാ ക്ലാസുകളും നിര്‍ത്തിവെച്ചിരിക്കുകയാണെങ്കിലും ഒന്‍പതാം ക്ലാസ് മുതല്‍ 12 ാം ക്ലാസ് വരെയുള്ള വിദ്യാര്‍ത്ഥികള്‍ക്ക് മാതാപിതാക്കളുടെ അനുവാദത്തോടെ സ്‌കൂളില്‍ എത്താന്‍ അനുവാദം നല്‍കിയിരുന്നു. ബോര്‍ഡ് പരീക്ഷകള്‍ കണക്കിലെടുത്തായിരുന്നു ഇത്.