തമിഴ് നാട്ടില്‍ സ്റ്റാലിനോ പളനിസ്വാമിയോ. സംശയം വേണ്ട കരുണാനിധിയുടെ മകന്‍ സ്റ്റാലിന്‍ സഖ്യകക്ഷികളുടെ പിന്തുണയില്‍ തമിഴകത്തിന്റെ മുഖ്യനാകുമെന്ന് ദേശീയമാധ്യമങ്ങള്‍ വിധിയെഴുതുന്നു.

അഭിപ്രായവോട്ടെടുപ്പുകളിലും ഡിഎംകെ കോണ്‍ഗ്രസ് സഖ്യം അധികാരത്തിലെത്തുമെന്നാണ് സൂചന. മുന്‍മുഖ്യമന്ത്രിമാരായ ജയലളിതയുടെയും കരുണാനിധിയുടെയും അഭാവത്തില്‍ നടക്കുന്ന ആദ്യ നിയമസഭാതിരഞ്ഞെടുപ്പില്‍ ഡിഎംകെയിലൂടെ സ്റ്റാലിന്‍ വാഴ്ച തുടങ്ങുമെന്നു തന്നെയാണ് വിലയിരുത്തല്‍.

ജയലളിതയ്ക്കു പിന്നാലെ എഐഎഡിഎംകെ നിര്‍ജീവമാകുന്ന സാഹചര്യത്തിലേക്കാണ് തമിഴ് നാട്ടിലെ രാഷ്ട്രീയനീക്കം. അതേ സമയം എംകെ സ്റ്റാലിന്‍ മുഖ്യമന്ത്രിയാകുന്നതോടെ കരുണാനിധിയുടെ മറ്റു മക്കള്‍ ഡിഎംകെയെ പിളര്‍ത്തുമെന്ന ആശങ്കയുടെ രാഷ്ട്രീയനിരീക്ഷകര്‍ സംശയിക്കുന്നു.

പത്തുവര്‍ഷമായി കൈവിട്ട ഭരണം തിരികെപിടിക്കാനാവുമെന്നാണ് ഡി.എം.കെ.യുടെ പ്രതീക്ഷയെങ്കിലും ഭരണം എത്രത്തോളം സുതാര്യമാകുമെന്നതില്‍ അനിശ്ചിതത്വമുണ്ട്. മുന്‍ ഡിഎംകെ സര്‍ക്കാരിലെ അഴിമതി ഇത്തവണയും തുടരുമോ എന്നതിലാണ് ആശങ്ക. ഭരണത്തുടര്‍ച്ച പ്രതീക്ഷിച്ച എ.ഐ.എ.ഡി.എം.കെ.യുടെ സാധ്യതകളെല്ലാം അസ്തമിച്ചുകൊണ്ടിരിക്കുന്നു. മാത്രവുമവ്വ എഐഎഡിഎംകെയില്‍ പളനിസ്വാമിയും പനീര്‍ശെല്‍വവും തമ്മിലുള്ള ഭിത്തതയോടെ ആ പാര്‍ട്ടിയും പിളര്‍പ്പിലേക്ക് നീങ്ങുമെന്നാണ് സൂചന. സ്റ്റാലിന്‍ മുഖ്യമന്ത്രിയാവുകയാണെങ്കില്‍ ജ്യേഷ്ഠസഹോദരന്‍ എം.കെ. അഴഗിരിയും സഹോദരി കനിമൊഴിയും ഭിന്നിപ്പിന്റെ ശബ്ദവുമായി രംഗത്തുവരുമെന്ന് തീര്‍ച്ചയാണ്.




മിഴ്‌നാട്ടില്‍ 234 നിയമസഭാമണ്ഡലങ്ങളും 6.29 കോടി വോട്ടര്‍മാരും വിധിയെഴുതിയപ്പോള്‍ 72 ശതമാനമായിരുന്നു പോളിംഗ്. എ.ഐ.എ.ഡി.എം.കെ.യില്‍ ബി.ജെ.പി., പി.എം.കെ. തുടങ്ങിയ പാര്‍ട്ടികകളാണ് സഖ്യകക്ഷികള്‍. നരേന്ദ്രമോദിയും അമിത് ഷായും നേരിട്ട് തമിഴ് നാട്ടില്‍ കളത്തിലിറങ്ങിയിട്ടും ബിജെപിക്ക് ചലനുമുണ്ടാക്കാനായില്ല. മാത്രവുമല്ല ബിജെപിയെ ഒപ്പം കൂട്ടിയതില്‍ എഐഎഡിഎംകെയില്‍ അഭിപ്രായവ്യത്യാസമുള്ളവരും ഏറെയാണ്.

തമിഴ് നാട്ടില്‍ രക്ഷയില്ലെന്നു കണ്ടതോടെയാണ് അമിത് ഷായും മോദിയും ബംഗാളില്‍ മമതയെ തകര്‍ക്കാമെന്ന പ്രതീക്ഷയില്‍ അവിടെ പ്രചാരണം ശക്തിപ്പെടുത്തിയത്. ഡി.എം.കെ.യോടൊപ്പം കോണ്‍ഗ്രസ്, സി.പി.എം., സി.പി.ഐ., വി.സി.കെ., എം.ഡി.എം.കെ. എന്നിവ നിലയുറപ്പിച്ചിരിക്കുന്നു.

കമല്‍ഹാസന്റെ മക്കള്‍ നീതി മയ്യം 144 ഇടങ്ങളില്‍ മത്സരിക്കുന്നുണ്ട്. സമത്വ മക്കള്‍ കക്ഷി, ഇന്ത്യ ജനനായക കക്ഷി എന്നിവയാണ് കമല്‍ഹാസന്റെ ഘടകകക്ഷികള്‍. ടി.ടി.വി. ദിനകരന്റെ അമ്മ മക്കള്‍ മുന്നേറ്റ കഴകവും വിജയകാന്തിന്റെ ഡി.എം.ഡി.കെ.യെ ഒപ്പംകൂട്ടി പോരിനിറങ്ങിരിക്കുന്നു.

2016-ലെ തെരഞ്ഞെടുപ്പില്‍ 136 സീറ്റുകളിലാണ് എ.ഐ.എ.ഡി.എം.കെ. വിജയിച്ചത്. അന്ന് ഡി.എം.കെ. 98 സീറ്റുകള്‍ സ്വന്തമാക്കി. 2019 ലോക്‌സഭാ തിരഞ്ഞെടുപ്പിലെ വന്‍വിജയം ആത്മധൈര്യത്തിന്റെ അടയാളമായി മുന്നിലുണ്ടെങ്കിലും എ.ഐ.എ.ഡി.എം.കെ. തളര്‍ന്നുവീണില്ല എന്നതാണ് ഡി.എം.കെ.യെ ഭയപ്പാടിലാക്കുന്നത്.

തന്നെയുമല്ല മുന്‍മുഖ്യമന്ത്രി ജയലളിതയുടെ വിയോഗം പാര്‍ട്ടിയെ ബാധിച്ചിട്ടുണ്ടെങ്കിലും ഇപ്പോഴും ജയലളിതയോടുള്ള സ്നേഹംകൊണ്ട് എ.ഐ.എ.ഡി.എം.കെ.യ്ക്ക് വോട്ടുചെയ്യാന്‍ താത്പര്യപ്പെടുന്ന നല്ലൊരുശതമാനം സ്ത്രീകളുണ്ട്. എടപ്പാടി പളനിസ്വാമിയുടെ വളര്‍ച്ചയും ജനപിന്തുണയും സ്റ്റാലിനെ ആശങ്കയിലാക്കുന്നു.

2016-ല്‍ 41 സീറ്റില്‍ മത്സരിച്ച കോണ്‍ഗ്രസിന് ഇത്തവണ ഡി.എം.കെ. 25 ഇടങ്ങള്‍മാത്രമാണ് നല്‍കിയത്. സി.പി.ഐ.യും സി.പി.എമ്മും ആറുസീറ്റുകളിലും മത്സരിക്കുന്നു. മക്കള്‍ നീതി മയ്യത്തില്‍നിന്ന് ആരെങ്കിലും വിജയിക്കുകയാണെങ്കില്‍ അത് കമല്‍ഹാസന്‍ മാത്രമായിരിക്കാനാണ് സാധ്യത. സംസ്ഥാനത്തെ മൂന്നാമത്തെ വലിയപാര്‍ട്ടിയാണ് മക്കള്‍ നീതി മയ്യമെന്ന് കമല്‍ അവകാശപ്പെടുന്നുണ്ടെങ്കിലും 2019-ലെ ലോക്‌സഭാ തിരഞ്ഞെടുപ്പില്‍ അഞ്ചാം സ്ഥാനത്തായിരുന്നു.