ഛത്തീസ്ഗഡിലെ കോവിഡ് ആശുപത്രിയില് വന് തീപിടിത്തം; നാല് പേര് മരിച്ചു
ഛത്തീസ്ഗഡിലെ കോവിഡ് ആശുപത്രിയില് വന് തീപിടിത്തം. അപകടത്തില് നാല് പേര് മരിച്ചു. മരിച്ചവരെല്ലാം കോവിഡ് രോഗികളാണ്. റായ്പൂരിലെ രാജധാനി ആശുപത്രിയിലാണ് സംഭവം. ഇന്ന് വൈകുന്നേരമാണ് ആശുപത്രി കെട്ടിടത്തില് തീപിടിത്തമുണ്ടായത്. തീ അതിവേഗത്തില് മറ്റിടങ്ങളിലേക്ക് പടരുകയായിരുന്നു. അപകടത്തില്പ്പെട്ടവരില് ഒരാള് പൊള്ളലേറ്റും ബാക്കി മൂന്ന് പേര് പുക ശ്വസിച്ചുണ്ടായ അസ്വസ്ഥതകളെയും തുടര്ന്നാണ് മരിച്ചതെന്ന് റായ്പൂര് എസ്പി അജയ് യാദവ് അറിയിച്ചു. ഫാനില് നിന്നും ഉണ്ടായ ഷോര്ട്ട് സര്ക്യൂട്ടാണ് തീപിടിത്തത്തിന് കാരണമെന്നും ഇത് മറ്റ് വാര്ഡുകളിലേയ്ക്ക് പടരുകയായിരുന്നു എന്നുമാണ് പോലീസിന്റെ പ്രാഥമിക നിഗമനം.
തീപിടിത്തമുണ്ടായിട്ടും സുരക്ഷാ സംവിധാനങ്ങള് എന്തുകൊണ്ട് ഉപയോഗപ്പെടുത്തിയില്ല എന്ന കാര്യം അന്വേഷിക്കുമെന്നും ആശുപത്രി ഉടമകള്ക്കെതിരെ കേസ് എടുക്കുമെന്നും പോലീസ് വ്യക്തമാക്കി. തീപിടിത്തമുണ്ടായതിന് പിന്നാലെ അഗ്നിശമന സേനാ യൂണിറ്റുകള് സ്ഥലത്തെത്തിയ ശേഷം കോവിഡ് രോഗികളെ സ്ഥലത്തുനിന്നും മാറ്റി. മരിച്ചവരുടെ കുടുംബങ്ങള്ക്ക് 4 ലക്ഷം രൂപ വീതം ധനസഹായം നല്കുമെന്ന് മുഖ്യമന്ത്രി ഭൂപേഷ് ബാഗല് അറിയിച്ചു.
https://www.facebook.com/Malayalivartha