ലോക്ഡൗൺ പ്രഖ്യാപിക്കേണ്ട സാഹചര്യം രാജ്യത്തില്ല സംസ്ഥാനങ്ങൾക്ക് തീരുമാനമെടുക്കാമെന്ന് അമിത് ഷാ പറഞ്ഞിരിക്കുകയാണ്. കുംഭമേളയായാലും റംസാൻ ആയാലും കൊവിഡ് വ്യാപനത്തിലേക്ക് നയിക്കുന്ന ഒന്നും തന്നെ സംഭവിക്കരുതെന്നും അമിത് ഷാ പറഞ്ഞു . അതുകൊണ്ടാണ് കുംഭമേള പ്രതീകാത്മകമായി മാത്രം നടത്താൻ സർക്കാർ തീരുമാനിച്ചതെന്നും ആഭ്യ ന്തരമന്ത്രി പറഞ്ഞു.

കൊവിഡ് നിയന്ത്രണങ്ങളുമായി ബന്ധപ്പെട്ട് കഴിഞ്ഞ മൂന്നുമാസമായി സംസ്ഥാനങ്ങൾക്ക് അധികാരം നൽകി കഴിഞ്ഞു . ഇക്കാര്യത്തിൽ തീരുമാനമെടുക്കേണ്ടതും അതത് സംസ്ഥാനങ്ങളാണ്. ഓരോ സംസ്ഥാനത്തെയും സ്ഥിതി വ്യത്യസ്തമാണെന്നും അമിത് ഷാ വ്യക്തമാക്കി.

ദേശീയ ലോക്ക്ഡൗൺ ഉണ്ടാവില്ലെന്ന് ധനമന്ത്രി നിർമ്മല സീതാരാമനും അറിയിച്ചിരുന്നു. രാജ്യത്ത് ഇന്ന് പ്രതിദിന രോഗികളുടെ എണ്ണം 2.75 ലക്ഷം കടക്കുമെന്നാണ് കരുതുന്നത്. മരണനിരക്ക് മുൻപത്തെ പോലെയില്ല.

ഓരോ സംസ്ഥാനത്തും ഓക്സിജൻ ആവശ്യത്തിന് എത്തിക്കാനുള്ള ശ്രമം കേന്ദ്രം തുടങ്ങി. മദ്ധ്യപ്രദേശിൽ ആറ് പേർ ഓക്‌സിജൻ കിട്ടാതെ ഒരു ആശുപത്രിയിൽ മരിച്ചെന്ന വാർത്ത പുറത്തുവന്നിട്ടുണ്ട്. കരിഞ്ചന്തകളിൽ ഓക്സിജൻ സിലണ്ടറുകളുടെ വിൽപന തടയാൻ കടുത്ത നടപടികളിലേക്ക് കടക്കുകയാണ് സർക്കാരുകളുടെ ഇപ്പോഴത്തെ ശ്രമം.

ഇന്ത്യയിൽ കൊവിഡ് വ്യാപനം രൂക്ഷമായി തുടരുന്നു. കഴിഞ്ഞ ഇരുപത്തിനാല് മണിക്കൂറിനിടെ 2,73,810 പേർക്കാണ് വൈറസ് ബാധ സ്ഥിരീകരിച്ചത്. തുടർച്ചയായ അഞ്ചാം ദിവസമാണ് രണ്ട് ലക്ഷത്തിലധികം കേസുകൾ റിപ്പോർട്ട് ചെയ്യുന്നത്.

നിലവിൽ 19,29,329 പേരാണ് ചികിത്സയിലുള്ളത്.രോഗമുക്തി നിരക്കിനേക്കാൾ രോഗവ്യാപന തോത് ഉയരുന്നതായി കേന്ദ്ര ആരോഗ്യമന്ത്രാലയം അറിയിച്ചു. പ്രതിദിന മരണനിരക്കും കുത്തനെ ഉയരുകയാണ്. 24 മണിക്കൂറിനിടെ 1,619 പേരാണ് മരിച്ചത്.

ഇതോടെ ആകെ മരണം 1,78,769 ആയി ഉയർന്നു.രോഗവ്യാപനം രൂക്ഷമായ മഹാരാഷ്ട്ര, ഛത്തീസ്ഗഢ്, രാജസ്ഥാൻ, ഗുജറാത്ത്, മദ്ധ്യപ്രദേശ്, കേരളം, പശ്ചിമബംഗാൾ, ഡൽഹി, കർണാടക, തമിഴ്‌നാട്, ഉത്തർപ്രദേശ് തുടങ്ങിയ സംസ്ഥാനങ്ങളിൽ 24 മണിക്കൂറിനിടെ റെക്കോഡ് വ്യാപനമാണ് രേഖപ്പെടുത്തിയത്.

ഉത്തരേന്ത്യയിലെ പല സംസ്ഥാനങ്ങളിലും നിയന്ത്രണം തുടരുകയാണ്. മദ്ധ്യപ്രദേശിൽ കർഫ്യൂ ഏപ്രിൽ 26 വരെ നീട്ടി. തമിഴ്നാട്ടിൽ രാത്രികാല കർഫ്യൂ നിലവിൽ വന്നു.കേരളത്തിൽ ഇന്നലെ 18,257 പേർക്കാണ് കൊവിഡ് സ്ഥിരീകരിച്ചത്.