കോവിഡിന്റെ ജനിതക മാറ്റം സംഭവിച്ചു എന്നത് വ്യക്തമാകുന്ന സാഹചര്യമാണ് ഇപ്പോള്‍ ഇന്ത്യയില്‍ ഉടനീളം കാണുവാന്‍ കഴിയുന്നത് .യു എസ്സിനെ കടത്തി വെട്ടുന്ന തരത്തില്‍ മുന്‍പെങ്ങും കണ്ടിട്ടില്ലാത്ത വിധത്തിലുള്ള അതിതീവ്രമായ രോഗവ്യാപനം സംഭവിക്കുമ്പോള്‍ ,വായുവിലൂടെ പകരാനുള്ള സാധ്യതയും തള്ളിക്കളയാന്‍ കഴിയുന്നില്ല .

കേരളത്തിന്റെ അവസ്ഥ അതിഭീകരമാണ് .വാക്‌സിനുകളുടെ അഭാവമാണ് ഇന്ത്യയെ അലട്ടുന്ന മറ്റൊരു പ്രധാന ഘടകം .ഈ അവസ്ഥയെ മറികടക്കാന്‍ അടിയന്തരമായ നീക്കം കേന്ദ്ര സര്‍ക്കാര്‍ എടുക്കേണ്ടതായി വരികയാണ് .

രാജ്യത്ത് വ്യാവസായിക ആവശ്യങ്ങള്‍ക്കായി ഓക്സിജന്‍ വിതരണം ചെയ്യുന്നതിന് വിലക്കേര്‍പ്പെടുത്തി കേന്ദ്രസര്‍ക്കാര്‍. കൊറോണ വ്യാപനത്തിന്റെ പശ്ചാത്തലത്തില്‍ ആശുപത്രികളില്‍ ഓക്സിജന്‍ ലഭ്യത ഉറപ്പുവരുത്തുന്നതിന്റെ ഭാഗമായാണ് നടപടി. ഇതുമായി ബന്ധപ്പെട്ടുള്ള സര്‍ക്കാര്‍ ഉത്തരവ്


വ്യാഴാഴ്ച മുതല്‍ നിലവില്‍ വരും.രാവിലെ വ്യാവസായിക ആവശ്യങ്ങള്‍ക്ക് ഓക്സിജന്‍ വിതരണം ചെയ്യുന്നതിന് വിലക്കേര്‍പ്പെടുത്തണമെന്ന് ആവശ്യപ്പെട്ട് കേന്ദ്ര ആഭ്യന്തര സെക്രട്ടറി സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും കത്തയച്ചിരുന്നു. ഇതിന് പിന്നാലെയാണ് കേന്ദ്രസര്‍ക്കാര്‍ ഉത്തരവ് പുറപ്പെടുവിച്ചത്. അതേസമയം ഒന്‍പത് വ്യവസായങ്ങളെ ഒഴിവാക്കിയിട്ടുണ്ട്.

നിലവില്‍ രാജ്യത്തെ കൊറോണ ആശുപത്രികളെല്ലാം രോഗികളെക്കൊണ്ട് നിറഞ്ഞിരിക്കുകയാണ്. പല ആശുപത്രികളിലും ഓക്സിജന്‍ സിലിണ്ടറുകളുടെ ക്ഷാമം നേരിടുന്നുണ്ട്. ഈ സാഹചര്യത്തിലാണ് വ്യവസായങ്ങള്‍ക്ക് ഓക്സിജന്‍ നല്‍കുന്നത് നിര്‍ത്തലാക്കാന്‍ സര്‍ക്കാര്‍ തീരുമാനിച്ചത്.രാ ജ്യത്ത് കോവിഡ് രോഗബാധിതരുടെ എണ്ണം കുതിച്ചുയരുന്നു.


പ്രതിദിന കേസുകളില്‍ റെക്കോര്‍ഡ് വര്‍ധനയാണ് രേഖപ്പെടുത്തുന്നത്. കഴിഞ്ഞ 24 മണിക്കൂറിനിടെ 2,73,810 പേര്‍ക്കാണ് പുതിയതായി രോഗം സ്ഥിരീകരിച്ചതെന്ന് കേന്ദ്ര ആരോഗ്യ മന്ത്രാലയം അറിയിച്ചു. ഇതോടെ രാജ്യത്ത് കോവിഡ് സ്ഥിരീകരിച്ചവരുടെ എണ്ണം 1,50,61,919 ആയി. ഇന്നലെ മാത്രം 1,619 പേര്‍ കൂടി കോവിഡ് ബാധിച്ച് മരിച്ചതോടെ ആകെ മരണം 1,78,769 ആയി.




വിവിധ ആശുപത്രികളിലും മറ്റുമായി നിലവില്‍ 19,29,329 പേര്‍ കോവിഡ് ബാധിച്ച് ചികിത്സയിലാണ്. ഇതുവരെ 1,29,53,821 പേര്‍ രോഗമുക്തി നേടി. 12,38,52,566 പേരാണ് രാജ്യത്ത് ഇതുവരെ വാക്‌സീന്‍ സ്വീകരിച്ചത്.