കൊറോണ വൈറസ് ആശങ്കജനകമായി വർധിക്കുന്ന രാജ്യതലസ്ഥാനത്ത് കോവിഡ് പ്രോട്ടോകോൾ ലംഘിച്ചതിന് ദമ്പതികൾക്കെതിരെ കേസെടുത്തു. കോവിഡ് മാനദണ്ഡം ലംഘിച്ച്‌ വാഹനം ഓടിച്ച ദമ്പതികളെ തടഞ്ഞുനിര്‍ത്തിയ പൊലീസുകാരോട് ഇവര്‍ മോശമായി പെരുമാറിയതിനാലാണ് കേസെടുത്തത്.

നിരീക്ഷണം കര്‍ശനമാക്കിയ ഡല്‍ഹി പൊലീസിനോട്​ തട്ടിക്കയറുന്ന യുവതിയുടെ ദൃശ്യങ്ങളാണ് വൈറലായത്. കാറില്‍ ഭര്‍ത്താവുമൊത്ത്​ യാത്ര ചെയ്യവേ മാസ്​ക്​ ധരിക്കാത്തത്​ ചോദ്യം ചെയ്​തപ്പോഴാണ്​ യുവതി പൊലീസിനെതിരെ ആക്ഷേപവും ശകാരവും ഉയർത്തിയത്​.

'എന്തൊക്കെ നാടകമാണ്​ കൊറോണയുടെ പേരില്‍ നിങ്ങള്‍ കാട്ടിക്കൂട്ടുന്നത്​?' എന്ന്​ യുവതി പൊലീസുകാരോട്​ ആക്രോശിക്കുന്നത് ദൃശ്യങ്ങളിൽ കാണാവുന്നതാണ്.

കാറില്‍ സഞ്ചരിക്കുകയാണെങ്കിലും മാസ്​ക്​ ധരിക്കണമെന്ന്​ ഏപ്രില്‍ ഏഴിന്​ ഡല്‍ഹി ഹൈക്കോടതി വിധി പുറപ്പെടുവിച്ചതായിരുന്നു. ഇതിന്‍റെ അടിസ്​ഥാനത്തില്‍, മാസ്​ക്​ ധരിക്കാതെ യാത്ര അനുവദിക്കില്ലെന്ന്​ പൊലീസ്​ പറഞ്ഞതോടെയാണ്​ ദമ്പതികള്‍ ​ആക്രോശവും ശകാരവും തുടങ്ങിയത്​.

ഡല്‍ഹി പട്ടേൽ നഗര്‍ പ്രദേശത്തുള്ള ആഭയും പങ്കജുമാണ്​ ഈ ദമ്പതികളെന്ന്​ പൊലീസ്​ പിന്നീട്​ വ്യക്തമാക്കി. 'ഞങ്ങളുടെ കാറില്‍ എന്‍റെ ഭര്‍ത്താവി​നെ ഞാന്‍ ചുംബിച്ചാല്‍ നിങ്ങള്‍ക്കെന്താ?' എന്നായിരുന്നു പൊലീസുകാരോട്​ ആഭ ചോദ്യമായി ഉന്നയിച്ചത്.

താന്‍ സബ്​ ഇന്‍സ്​പെക്​ടറുടെ മകളാണെന്നായിരുന്നു യുവതി വാദിക്കുന്നത്. യു.പി.എസ്​.സി പരീക്ഷ പാസായിട്ടുണ്ടെന്നും പറഞ്ഞു. എങ്കില്‍ നിങ്ങള്‍ കുറച്ചുകൂടി ഉത്തരവാദിത്വത്തോടെ പെരുമാറണമെന്നായിരുന്നു പൊലീസുകാരുടെ മറുപടി.

കടുത്ത വാഗ്വാദത്തിനുശേഷം ദമ്ബതികളെ ദര്യാഘഞ്ച്​ പൊലീസ്​ സ്​റ്റേഷനിലേക്ക്​ കൊണ്ടുപോയി. ഇരുവര്‍ക്കുമെതിരെ വിവിധ ഐ.പി.സി വകുപ്പുകള്‍ പ്രകാരം കേസെടുക്കുകയും ചെയ്തു.