മോഡിക്കെതിരെ ആഞ്ഞടിച്ച് സോണിയ. പ്രധാനമന്ത്രി നരേന്ദ്ര മോഡിക്കെതിരെ രൂക്ഷ വിമര്‍ശനവുമായി കോണ്‍ഗ്രസ് അധ്യക്ഷ സോണിയ ഗാന്ധി. തുടര്‍ച്ചയായി അഭിപ്രായം മാറുന്ന മോഡിക്ക് തന്റെ നിലപാട് പോലും വ്യക്തമാക്കാന്‍ കഴിയുന്നില്ല. മോഡിയുടെ നിലപാടുകള്‍ യഥാര്‍ത്ഥ്യവുമായി ഒരു ബന്ധവുമില്ലാത്തതാണെന്നും സോണിയ വിമര്‍ശിച്ചു. കോണ്‍ഗ്രസ് വര്‍ക്കിംഗ് കമ്മിറ്റി യോഗത്തില്‍ സംസാരിക്കുകയായിരുന്നു അവര്‍.
സംഘടനാ പ്രശ്‌നങ്ങളും ബിഹാര്‍ നിയമസഭാ തെരഞ്ഞെടുപ്പും ചര്‍ച്ച ചെയ്യുന്നതിനാണ് വര്‍ക്കിംഗ് കമ്മിറ്റി ചേരുന്നത്. പാര്‍ട്ടി അധ്യക്ഷ സ്ഥാനത്തേക്ക് രാഹുല്‍ ഗാന്ധിയുടെ വരവ് ഇനിയും വൈകുമെന്നാണ് സൂചന. സഖ്യകക്ഷികള്‍ക്കിടയില്‍ ഏറ്റവും മാനിക്കപ്പെടുന്ന നേതാവെന്ന നിലയില്‍ സോണിയ തന്നെ അധ്യക്ഷ പദവിയില്‍ തുടരാനാണ് സാധ്യത.
മാധ്യമങ്ങളെയും ഭീഷണിപ്പെടുത്തി വരുതിയില്‍ നിര്‍ത്താനാണ് മോഡിയുടെ ശ്രമം. രാജ്യത്തിന്റെ നന്മയ്ക്കായി നിലകൊണ്ട ഇത്തരം സുപ്രധാന സ്ഥാപനങ്ങളുടെ പരമാധികാരവും ധാര്‍മ്മികതയും ഇല്ലാതായി കൊണ്ടിരിക്കുകയാണ്. പാകിസ്താനുമായി ഉടലെടുത്ത പുതിയ പ്രശ്‌നങ്ങളിലും മോഡി സര്‍ക്കാരിനെ സോണിയ വിമര്‍ശിച്ചു. അയല്‍രാജ്യവുമായി സര്‍ക്കാരിന് യുക്തിസഹമായ നയമില്ല. എന്താണ് ചെയ്യേണ്ടതെന്ന് സര്‍ക്കാരിന് നിശ്ചയമില്ല. ഇതുമുലം നമ്മുടെ ജവാന്മാരെയും നാട്ടുകാരെയും അവര്‍ ലക്ഷ്യമിടുന്നുവെന്നും അവര്‍ കുറ്റപ്പെടുത്തി.
ഭൂമി ഏറ്റെടുക്കല്‍ ഓര്‍ഡിനന്‍സിലെ നിലപാട് മാറ്റം മോഡി സര്‍ക്കാരിന് യഥാര്‍ത്ഥ്യങ്ങളുമായി ബന്ധമില്ലെന്നതിന്റെ തെളിവാണ്. കോണ്‍ഗ്രസിന്റെ ശക്തമായ പ്രക്ഷോഭം കര്‍ഷക വിരുദ്ധ ദേഭഗതികളില്‍ നിന്ന് പിന്നാക്കം പോകുന്നതില്‍ സര്‍ക്കാരിനെ നിര്‍ബന്ധിതമാക്കി. മുന്‍ പ്രധാനമന്ത്രി ജവഹര്‍ലാല്‍ നെഹ്‌റുവിനെയാണ് മോഡി ഉന്നം വച്ചിരിക്കുന്നത്. ഇതുവഴി ചരിത്രം തിരുത്തിയെഴൂതാമെന്നാണ് മോഡി കരുതുന്നതെന്നും സോണിയ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha