ജീവനൊടുക്കാനും ഓണ്‍ലൈന്‍. ഓണ്‍ലൈനായി വാങ്ങിയ സയനൈഡ് കഴിച്ച് ഇന്ത്യന്‍ വിദ്യാര്‍ഥിനി ജീവനൊടുക്കിയ സംഭവത്തില്‍, ഓണ്‍ലൈന്‍ വ്യാപാരികളായ ആമസോണ്‍ ഡോട്ട് കോമിനെതിരെ അമ്മ പരാതി നല്‍കി. ഓണ്‍ലൈനിലൂടെ വാങ്ങിയ സയനൈഡ് കഴിച്ചാണ് ആത്മഹത്യ ചെയ്തതെന്നു ചൂണ്ടിക്കാട്ടിയാണ് പരാതി. 2013ലാണ് പെന്‍സല്‍വേനിയ സര്‍വകലാശാലയിലെ നഴ്‌സിംഗ് വിദ്യാര്‍ഥിനിയായ ആര്യ സിംഗ് ആത്മഹത്യ ചെയ്തത്.
സര്‍വകലാശാലയ്ക്ക് എതിരെയും ആര്യയുടെ അമ്മ പരാതി നല്‍കിയിട്ടുണ്ട്. 2011ല്‍ സഹപാഠി തന്നെ പീഡിപ്പിച്ച കാര്യം ചൂണ്ടിക്കാട്ടി ആര്യ കോളജ് അധികൃതര്‍ക്കു പരാതി നല്‍കിയിരുന്നു. എന്നാല്‍ കുറ്റക്കാര്‍ക്കെതിരെ നടപടിയെടുക്കാതെ വന്നതോടെ മാനോനില തകര്‍ന്ന ആര്യ, പഠനത്തിലും പിന്നോക്കമായി. പിന്നീട് അമിതമായി മദ്യപിച്ച നിലയിലും വീട്ടുകാര്‍ കുട്ടിയെ കണ്ടെത്തി. 2013ല്‍ ദുര്‍നടപ്പ് ആരോപിച്ച് കോളജ് അധികൃതര്‍ ആര്യക്കു നോട്ടീസ് നല്‍കുകയും പരീക്ഷയെഴുതുന്നതില്‍ നിന്നു വിലക്കുകയും ചെയ്തു. 2013 ഫെബ്രുവരി എട്ടിന് വിദ്യാര്‍ഥിനിയെ ജീവനൊടുക്കിയ നിലയില്‍ ഹോസ്റ്റല്‍ മുറിയില്‍ നിന്നു കണ്ടത്തെുകയായിരുന്നു.
ഈയൊരു സംഭവത്തിനു മുമ്പുവരെ ആമസോണ്‍ വെബ്‌സൈറ്റില്‍ വ്യാപകമായി സയനൈഡ് വില്‍പന നടന്നിരുന്നതായി മാതാവിന്റെ പരാതിയില്‍ ചൂണ്ടിക്കാട്ടുന്നു. യുഎസില്‍ മാത്രം 51 സയനൈഡ് കമ്പനി വിറ്റഴിച്ചു. ഇതു കഴിച്ച് 11 പേര്‍ ജീവനൊടുക്കിയതായും തന്റെ മകളും അതില്‍പെടുമെന്നും പരാതിയില്‍ പറയുന്നു. എന്നാല്‍ സംഭവത്തെ കുറിച്ച് ആമസോണ്‍ അധികൃതര്‍ ഇതുവരെ പ്രതികരിച്ചിട്ടില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha