അയല്വാസിയായ യുവാവ് അഭിഭാഷകയോട് വ്യക്തിവൈരാഗ്യം തീര്ത്തത് ഇങ്ങനെ... ആളുകള് നോക്കിനില്ക്കെ അഭിഭാഷകയെ തല്ലിച്ചതച്ച് യുവാവ്
വ്യക്തിവൈരാഗ്യത്തിന്റെ പേരില് നടുറോഡില് ആളുകള് നോക്കി നില്ക്കേ ക്രൂര മര്ദനത്തിനിരയായി അഭിഭാഷക. സംഭവത്തില് യുവാവിനെ പോലീസ് പിടികൂടി. കര്ണാടകയിലെ ബാഗല്കോട്ട് ജില്ലയിലെ വിനായക് നഗറില് ശനിയാഴ്ച ഉച്ചയ്ക്കാണ് സംഭവം. അഭിഭാഷകയായ സംഗീതയെ അയല്വാസിയായ മഹന്തേഷ് ആണ് ക്രൂരമായി തല്ലുകയും ചവിട്ടുകയും ചെയ്തത്.
റോഡിലും സമീപത്തുമായി നിരവധി പേരുണ്ടായിരുന്നെങ്കിലും ആരും പ്രതികരിക്കുകയോ അക്രമിയില് നിന്ന് അഭിഭാഷകയായ സംഗീതയെ രക്ഷപ്പെടുത്താന് മുന്നോട്ടു വരികയോ ചെയ്തില്ല. ഒരു സിവില് കേസുമായി ബന്ധപ്പെട്ടുള്ള വ്യക്തിവൈരാഗ്യം മൂലമാണ് മഹന്തേഷ് സംഗീതയെ ആക്രമിച്ചതെന്നാണ് പോലീസ് പറയുന്നത്.
അഭിഭാഷക തന്നെ മാനസികമായി പീഡിപ്പിച്ചിരുന്നുവെന്ന് മഹന്തേഷ് ആരോപിച്ചു. ഇരുവരും തമ്മില് നേരത്തെയും വാക്കേറ്റവും അടിപിടിയും ഉണ്ടായിട്ടുള്ളതായി പോലീസ് അറിയിച്ചു.
സംഭവത്തിന്റെ ദൃശ്യങ്ങള് പുറത്തുവന്നു. സംഗീതയ്ക്കെതിരെ ആക്രോശിച്ചുകൊണ്ടെത്തിയ മഹന്തേഷ് കടുത്ത ദേഷ്യത്തില് ഇവരെ ആക്രമിക്കുന്നത് വീഡിയോയില് നിന്ന് വ്യക്തമാകുന്നുണ്ട്. സംഗീതയുടെ നേര്ക്കെത്തി ആദ്യം അവരെ ചവിട്ടിയ മഹന്തേഷ് പിന്നീട് തുടരെ അടിക്കുന്നതും ഈ അടിയുടെ ശക്തിയില് സംഗീത പുറകോട്ട് വീഴുകയും ചെയ്യുന്നത് വീഡിയോയില് കാണാം.
വീണ് കിടക്കുന്ന സംഗീതയുടെ വയറ്റത്ത് ഇയാള് ചവിട്ടുന്നുണ്ട്. അടുത്തുണ്ടായിരുന്ന ഒരു പ്ലാസ്റ്റിക് കസേരയെടുത്ത് സംഗീത പ്രതിരോധിക്കാന് ശ്രമിച്ചെങ്കിലും മഹന്തേഷ് വീണ്ടും തല്ലുകയും ചവിട്ടുകയും ചെയ്യുന്നതാണ് വീഡിയോയില് കാണാന് കഴിയുന്നത്.
https://www.facebook.com/Malayalivartha
