ഇഷ്ടമല്ലെന്ന കാരണത്താൽ മൂന്നര വയസുകാരനെ രണ്ടാനമ്മ മര്‍ദിച്ച്‌ കൊലപ്പെടുത്തി. 28 കാരിയായ യുവതിയാണ് പി‌ടിയിലായത്. മുംബൈ ഡോംബിവ്‌ലിയിലാണ് സംഭവം. കുട്ടിയെ ഇഷ്ടമില്ലാത്തതാണ് കൊലപ്പെടുത്താന്‍ കാരണമെന്ന് യുവതി സമ്മതിച്ചതായി പൊലീസ് പറഞ്ഞു.
ബുധനാഴ്ച വൈകുന്നേരം നാല് മണിയോടെയാണ് ഡോംബിവ്‌ലി വെസ്റ്റിലെ ശാസ്ത്രി നഗര്‍ ഹോസ്പിറ്റലില്‍ കുട്ടിയെ പരിക്കുകളോടെ പ്രവേശിപ്പിച്ചത്.

തുടര്‍ന്ന് ആശുപത്രി അധികൃതര്‍ പൊലീസിനെ വിവരമറിയിക്കുകയായിരുന്നു.വൈകിട്ട് 4.25 ഓടെ കുട്ടി മരണപ്പെടുകയായിരുന്നു. കുട്ടിയുടെ ശരീരത്തിലുടനീളം ഒന്നിലധികം മുറിവുകളുണ്ടായിരുന്നെന്ന് ഡോക്ടര്‍ പൊലീസിനെ അറിയിച്ചു. അടിവയറ്റിലേറ്റ ആഴത്തിലുള്ള മുറിവ് കാരണമുണ്ടായ രക്തസ്രാവമാണ് മരണ കാരണമെന്ന് പോസ്റ്റ്മോര്‍ട്ടം റിപ്പോര്‍ട്ടില്‍ പറയുന്നു.

പിതാവ് സഞ്ജയ് ജയ്‌സ്വാള്‍, സഹോദരന്‍, രണ്ടാനമ്മ ആന്റിമാദേവി എന്നിവര്‍ക്കൊപ്പമാണ് കുട്ടി താമസിച്ചിരുന്നത്. യുവതി കൂട്ടിയെ നിഷ്കരുണം മര്‍ദിക്കാറുണ്ടെന്നും ശ്വാസം മുട്ടിക്കാറുമുണ്ടെന്ന് കുട്ടിയുടെ സഹോദരന്‍ പൊലീസിനോട് പറഞ്ഞു. പലപ്പോഴായി വീട്ടില്‍ നിന്ന് കുട്ടിയുടെ നിലവിളി കേട്ടിരുന്നതായി അയല്‍വാസികളും പൊലീസിനെ അറിയിച്ചു.