കനത്തമഴയില് ഒറ്റപ്പെട്ട് ചെന്നൈ, ഏഴ് ദിവസം കൂടി മഴ കുറയില്ല: ഇന്നുമുതല് ഒരാഴ്ചത്തേക്ക് ചെന്നൈയില് ബി.എസ്.എന്.എല് ഫോണ്വിളിയ്ക്ക് ചാര്ജ്ജ് ഈടാക്കില്ല
116 കൊല്ലത്തിനിടെ കണ്ട ഏറ്റവും വലിയ പ്രളയത്തില് മറ്റുപ്രദേശങ്ങളില് നിന്നും സമ്പര്ക്കമറ്റു ചെന്നൈ അക്ഷരാര്ത്ഥത്തില് ദ്വീപ് പോലെയായി .പ്രാന്തപ്രദേശങ്ങളിലെയും സമീപ ജില്ലകളിലെയും സുപ്രധാന റോഡുകളും റെയില്പ്പാതകളും തകര്ന്നതോടെയാണ് ജനജീവിതം ചലനരഹിതമായി.റണ്വെയില് വെള്ളം കയറിയതിനെതുടര്ന്ന് വിമാനത്താവളം അടച്ചപ്പോള് അവിടെ കുടുങ്ങിയത് 1500 ഓളം പേര്. മഴ-അനുബന്ധ അപകടങ്ങളില് മരിച്ചവര് 197 ആയതായും ഉദ്യോഗസ്ഥര് പറഞ്ഞു.
അവസാന 24 മണിക്കൂറില് ചെന്നൈയില് മാത്രം പെയ്തത് 49 സെന്റീമീറ്റര് മഴയാണ്. ബംഗാള് ഉള്ക്കടലില് രൂപംകൊണ്ട ന്യൂനമര്ദ്ദം മൂലം അടുത്ത 48 മണിക്കൂര് നിര്ണ്ണായകമാണെന്ന് റീജിയണല് മീറ്റീരിയോളജിക്കല് വകുപ്പദ്ധ്യക്ഷന് എസ്.ആര് രമണന് അറിയിച്ചു. കൂഡല്ലൂര്,കോയമ്പത്തൂര്, നീലഗിരി ജില്ലകളില് കനത്ത മഴ തുടരുകയാണ്. അടുത്ത 24 മണിക്കൂര് കൂടി ചെന്നൈയില് കനത്ത മഴ തുടരും. ഇനി ഏഴ് ദിവസം കൂടി മഴ കുറയില്ലെന്നാണ് നിഗമനം. മഴ കനത്ത് റണ്വെ മുങ്ങിയതോടെ ചെന്നൈ വിമാനത്താവളം ഈ മാസം ആറുവരെ അടച്ചിടാനാണ് തീരുമാനം.
പ്രധാനമന്ത്രി നരേന്ദ്രമോദി, ആഭ്യന്തരമന്ത്രി രാജ്നാഥ് സിംഗ്, ധനകാര്യമന്ത്രി അരുണ് ജെയ്റ്റ്ലി, വിദേശകാര്യ മന്ത്രി സുഷമാ സ്വരാജ് എന്നിവര് അടിയന്തര യോഗം ചേര്ന്നിരുന്നു. ഇന്നലെ രാത്രി മുഖ്യമന്ത്രി ജയലളിതയുമായി ചര്ച്ച നടത്തിയ മോദി എല്ലാ സഹായങ്ങളും വാഗ്ദാനം ചെയ്തിരുന്നു. ഇന്നുമുതല് ഒരാഴ്ചത്തേക്ക് ചെന്നൈയില് ബി.എസ്.എന്.എല് ഫോണ്വിളിയ്ക്ക് ചാര്ജ്ജ് ഈടാക്കില്ലെന്ന് ടെലികോം മന്ത്രി ആര്.എസ് പ്രസാദ് അറിയിച്ചു. കാബിനറ്റ് സെക്രട്ടറി പി.കെ സിന്ഹയുടെ നേതൃത്വത്തിലുള്ള ദേശീയ െ്രെകസിസ് മാനേജ്മെന്റ് കമ്മിറ്റി സ്ഥിതിഗതികള് വിലയിരുത്തുകയുംകേന്ദ്രത്തിന്റെ എല്ലാ സഹായങ്ങളും വാഗ്ദാനം ചെയ്യുകയും ചെയ്തു. സംസ്ഥാനത്തിന്റെ അവസ്ഥ കണക്കിലെടുത്ത് ഉന്നതതല പ്രതിനിധി സംഘത്തെ അയയ്ക്കണമെന്നും ദേശീയ ദുരന്തമായി പ്രഖ്യാപിക്കണമെന്നും പ്രതിപക്ഷമായ ഡി.എം.കെയുടെ എം.പി കനിമൊഴി ആവശ്യപ്പെട്ടു.
കരസേന, നാവികസേന,ദുരന്ത പ്രതികരണ സേന എന്നിവയ്ക്കൊപ്പം പ്രദേശവാസികളും സോഷ്യല് മീഡിയ കൂട്ടങ്ങളും രക്ഷാപ്രവര്ത്തനത്തില് സജീവമാണ്. ബുധനാഴ്ച രക്ഷാപ്രവര്ത്തനത്തിനെത്തിയ കരസേന 65 പേരെ രക്ഷിച്ചതായാണ് കണക്ക്. കൂടുതല് സേന എത്തുമെന്നാണ് പ്രതീക്ഷിക്കുന്നത്. വെള്ളപ്പൊക്കത്തിലായ ബസില് കുടുങ്ങിയ 15 പേരെ രക്ഷിച്ചു. 10000 പൊലീസുകാരെയും നീന്തല് വിദഗ്ദ്ധരെയും വിനിയോഗിച്ചതായി പൊലീസ് തലവന് ജെ.കെ തൃപാഠി അറിയിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
