മഹാരാഷ്ട്രയില് മൂന്ന് മാസത്തിനിടെ 179 നവജാത ശിശു മരണം... മരണങ്ങള് തടയാന് ജില്ലാ ഭരണകൂട മിഷന് ലക്ഷ്യ 84 ദിവസം പദ്ധതിക്ക് തുടക്കം കുറിച്ചു
മഹാരാഷ്ട്രയിലെ നന്ദുര്ബാര് ജില്ലയില് മൂന്ന് മാസത്തിനിടെ മരിച്ചത് 179 നവജാത ശിശുക്കള്. ശിശുമരണങ്ങളുടെ ക്രമാതീതമായ വര്ധനവിനെ തുടര്ന്ന് മരണങ്ങള് തടയാന് ജില്ലാ ഭരണകൂട മിഷന് ലക്ഷ്യ 84 ദിവസം പദ്ധതിക്ക് തുടക്കം കുറിച്ചു. നന്ദുര്ബാര് ജില്ലയുടെ സിഎംഒ എം. സാവന് കുമാറാണ് ഇക്കാര്യം പറഞ്ഞത്. മഹാരാഷ്ട്രയിലെ ഏറ്റവും പിന്നോക്ക ജില്ലകളിലൊന്നാണ് നന്ദുര്ബാര്. 2007 മുതലുള്ള നിരവധി പൊതുതാല്പ്പര്യ ഹര്ജികള് ജില്ലയിലെ ശിശുമരണവുമായി ബന്ധപ്പെട്ട് കോടതികളിലുണ്ട്. ജൂലൈയില് 75 കുട്ടികളും ഓഗസ്റ്റില് 86 കുട്ടികളും സെപ്റ്റംബറില് 18 കുട്ടികളും ജില്ലയില് മരിച്ചെന്ന് സാവന് കുമാറിനെ ഉദ്ധരിച്ച് എഎന്ഐ റിപ്പോര്ട്ട് ചെയ്തു. ഭാരക്കുറവ്, ജനന സമയത്തെ ശ്വാസംമുട്ടല്, സെപ്സിസ്, ശ്വാസകോശ സംബന്ധമായ അസുഖങ്ങള് എന്നിവയാണ് മരണത്തിന്റെ പ്രധാന കാരണങ്ങളെന്നും റിപ്പോര്ട്ടില് പറയുന്നു.
028 ദിവസം പ്രായമുള്ള കുട്ടികളാണ് 70 ശതമാനവും മരിച്ചത്. പല സ്ത്രീകള്ക്കും ഇവിടെ അരിവാള് രോഗമുണ്ട്. ഈ രോഗം പ്രസവസമയത്ത് സങ്കീര്ണതകള് ഉണ്ടാക്കുന്നു. നിലവിലെ പ്രശ്നങ്ങള് പരിഹരിക്കാനായി 'ലക്ഷ്യ 84 ഡേയ്സ്' എന്ന ദൗത്യം ആരംഭിച്ചെന്നും ഉദ്യോഗസ്ഥന് പറഞ്ഞു. മഹാരാഷ്ട്രയിലെ ഏറ്റവും കുറഞ്ഞ മാനവ വികസന സൂചിക മാര്ക്കുള്ള ജില്ലയാണ് നന്ദുര്ബാര്. നേരത്തെ പോഷകാഹാരക്കുറവ് പ്രശ്നം പരിഹരിക്കുന്നതിനായി മൂന്ന് വര്ഷത്തെ പദ്ധതി ആരംഭിച്ചിരുന്നു. കൗമാരക്കാര്ക്ക് പോഷകാഹാരം നല്കുക എന്നതായിരുന്നു പദ്ധതി. കൂടാതെ, ഗര്ഭിണികള്ക്കും മുലയൂട്ടുന്ന അമ്മമാര്ക്കും ഈ സഹായത്തിന്റെ പ്രയോജനം ലഭിക്കും. ശിശുമരണങ്ങളുടെയും മാതൃമരണങ്ങളുടെയും അടിസ്ഥാനത്തില് 2022 സെപ്റ്റംബറില് ബോംബെ ഹൈക്കോടതി നന്ദൂര്ബാറിലെ ജില്ലാ കളക്ടറോട് നേരിട്ട് ഹാജരാകാന് ആവശ്യപ്പെട്ടത് വലിയ വാര്ത്തയായിരുന്നു.
2022 ജനുവരി മുതല് ജില്ലയില് 411 പേര് മരിച്ചതായി ആദിവാസി അവകാശ പ്രവര്ത്തകനായ ബന്ദു സാനെ ബോംബെ ഹൈക്കോടതിയെ നേരിട്ട് അറിയിച്ചു. അപര്യാപ്തമായ മെഡിക്കല് സൗകര്യങ്ങളും പോഷകാഹാരക്കുറവുമാണ് ഉയര്ന്ന മരണനിരക്കിന് കാരണമെന്ന് സാനെ പറഞ്ഞു. ഫ്ലോട്ടിംഗ് ബോട്ട് ഹോസ്പിറ്റലുകളും ആംബുലന്സുകളും കാലഹരണപ്പെട്ടതാണെന്നും നവീകരണം അനിവാര്യമാണെന്നും പഠന സംഘം തയ്യാറാക്കിയ റിപ്പോര്ട്ടില് പറയുന്നു. ആരോഗ്യ പദ്ധതികളുടെ പരാജയം ശിശുമരണ നിരക്ക് വര്ധിക്കാന് കാരണമായതായി റിപ്പോര്ട്ട് പറയുന്നു. കൂടാതെ, മെഡിക്കല് ജീവനക്കാരുടെ കുറവും പ്രതിസന്ധി സൃഷ്ടിച്ചു.
https://www.facebook.com/Malayalivartha
