ഇന്ത്യയുടെ അഭിമാന ചാന്ദ്ര ദൗത്യം ചന്ദ്രയാന്‍ 3 കഴിഞ്ഞ കുറച്ച് ദിവസങ്ങളായി ഉറക്കത്തിലാണ്. ചാന്ദ്ര പകല്‍ അവസാനിച്ചതോടെയാണ് ഊര്‍ജ്ജ സംരക്ഷണത്തിനായി ചന്ദ്രയാന്‍ 3ന്‍റെ വിക്രം ലാൻഡറും പ്രഗ്യാൻ റോവറും സ്ലീപ്പ് മോഡിലേക്ക് മാറ്റിയത്. സെപ്തംബർ 22ന് വീണ്ടും അതായത് ഇന്ന് സൂര്യ പ്രകാശം കിട്ടും. ചന്ദ്രോപരിതലത്തിലെ വളരെ കുറഞ്ഞ താപനിലയെ അതിജീവിച്ച് ചന്ദ്രയാൻ മൂന്നിന്‍റെ വിക്രമും പ്രഗ്യാനും ഇന്ന് ഉണരുകയാണെങ്കിൽ അത് ചരിത്രമാകും.

സൗരോർജ്ജം ഉപയോഗിച്ചാണ് റോവറിന്റെ പ്രവർത്തനം. അതിനാൽ റോവറിന് ശൈത്യത്തെ അതിജീവിക്കാൻ കഴിയുമോയെന്നതാണ് പ്രധാനം. ഇത് സാധിക്കുകയാണെങ്കിൽ ഐഎസ്ആർഒയ്ക്ക് അഭിമാനകരമായ നേട്ടമായി അത് മാറും .ന്യൂക്ലിയര്‍ ഹീറ്റിംഗ് സംവിധാനമില്ലാതെ ചാന്ദ്ര രാത്രിയിലെ അതിശൈത്യം അതിജീവിക്കാന്‍ ലാന്‍ഡറിനായാല്‍ അത് ഇന്ത്യന്‍ സാങ്കേതിക വിദ്യയുടെ മികവിന്‍റെ സാക്ഷ്യമാകും. വീണ്ടും പ്രവര്‍ത്തനം ആരംഭിച്ചാല്‍ നിലവില്‍ ലഭിച്ച വിവരങ്ങ‍ളിലെ സം‍ശയങ്ങല്‍ ദൂരീകരിക്കാനും നിര്‍ണ്ണായകമായ പുതിയ വിവരങ്ങള്‍ കൂടി ശേഖരിക്കാനും ക‍ഴിയും.

ചന്ദ്രോപരിതലത്തിലെ വളരെ കുറഞ്ഞ താപനിലയെ ദീർഘനേരം അതിജീവിച്ചും സിസ്റ്റങ്ങൾ വീണ്ടും പ്രവർത്തിക്കുന്നുവെന്ന് ഉറപ്പാക്കുന്നത് ശരിക്കും ബുദ്ധിമുട്ടുള്ള കാര്യമാണെന്ന് ഐഎസ്ആർഒ ചെയര്‍മാൻ എസ് സോമനാഥ് ഒരു പ്രമുഖ മാധ്യമത്തിന് നൽകിയ അഭിമുഖത്തിൽ പറഞ്ഞു. എന്നാൽ സെപ്റ്റംബറിൽ വീണ്ടും സൂര്യരശ്മികൾ പതിക്കുമ്പോൾ വിക്രം ലാൻഡറും പ്രഗ്യാൻ റോവറും സ്വിച്ച് ചെയ്യാൻ കഴിയുമെങ്കിൽ അത് പുതിയ ചരിത്രമാകുമെന്നും അദ്ദേഹം പറഞ്ഞു.

ക്രമം അനുസരിച്ച്, ഐഎസ്ആർഒ വിക്രം ലാൻഡറിനായുള്ള സ്ലീപ്പ് മോഡ് സെപ്റ്റംബർ അഞ്ചിനാണ് ആരംഭിച്ചത്. ഇതിന് മുമ്പ് ഹോപ്പ് ടെസ്റ്റ് വിജയകരമായി പൂർത്തിയാക്കി. തുടര്‍ന്ന് ChaSTE, RAMBHA-LP, ILSA payloads എന്നിവ ഉൾപ്പെടുന്ന ഇൻ-സിറ്റു പരീക്ഷണങ്ങളുടെ ഒരു പരമ്പര പുതിയ സ്ഥലത്ത് നടത്തുകയും ചെയ്തു. അങ്ങനെ ശേഖരിച്ച ഡാറ്റ ഭൂമിയിലേക്ക് കൈമാറുകയും പേലോഡുകൾ നിർജ്ജീവമാക്കുകയും ചെയ്തു. ഈ സാഹചര്യത്തിലും ലാൻഡറിലെ റിസീവറുകൾ പ്രവർത്തനക്ഷമമായിരുന്നു എന്നത് ശ്രദ്ധേയമായ കാര്യമാണെന്നും സോമനാഥ് പറഞ്ഞു.

സെപ്റ്റംബര്‍ 22ന് ലാൻഡറിലും പ്രഗ്യാൻ റോവറിലുമുള്ള ഉപകരണങ്ങൾ പുനരുജ്ജീവിപ്പിക്കാനുള്ള ശ്രമങ്ങൾ നടത്താൻ ശാസ്ത്രജ്ഞർ ഒരുങ്ങുകയാണ്. അതികഠിനമായ താഴ്ന്ന താപനിലയെ ചെറുക്കാനുള്ള ഈ ഉപകരണങ്ങളുടെ കഴിവിനെ ആശ്രയിച്ചാകും ഇതിന്‍റെ വിജയം. ചന്ദ്രനിലെ രാത്രികാല താപനില ഏകദേശം മൈനസ് 200 ഡിഗ്രി സെൽഷ്യസ് വരെ കുത്തനെ താഴ്ന്നേക്കുമെന്നാണ് മുൻ ചാന്ദ്ര ദൗത്യങ്ങളിൽ നിന്നുള്ള വിവരങ്ങൾ വ്യക്തമാക്കുന്നത്.

ചന്ദ്രയാൻ മൂന്ന്, വിക്രം ലാൻഡർ, പ്രഗ്യാൻ റോവർ എന്നിവയ്‌ക്ക് വേണ്ടി ചെയ്ത കാര്യങ്ങളില്‍ പൂർണ്ണ ആത്മവിശ്വാസമാണ് ഉള്ളതെന്ന് സോമനാഥ് പറഞ്ഞു. സിസ്റ്റത്തിലെ സംവിധാനങ്ങള്‍ പ്രവര്‍ത്തിക്കുകയും അയക്കുന്ന കമാൻഡുകൾ റിസീവ് ചെയ്ത് അത് പോലെ പ്രവര്‍ത്തിക്കുകയും ചെയ്യുന്ന തരത്തിലേക്കാണ് അവ രണ്ടും മാറേണ്ടതെന്നും അദ്ദേഹം പറഞ്ഞു.