ആന്ധ്രയില്‍ ചെന്ന് കൊറിയറില്‍ കടത്തിക്കൊണ്ടു വന്ന് പേയാടിന് സമീപം വീട്ടിലും പാറ മടയിലുമായി 246 കിലോ കഞ്ചാവ് സൂക്ഷിച്ച കേസില്‍ 10 പ്രതികള്‍ക്ക് മേല്‍ കോടതി കുറ്റം ചുമത്തി. വിചാരണ കോടതിയായ തിരുവനന്തപുരം രണ്ടാം അഡീ. ജില്ലാ സെഷന്‍സ് കോടതിയാണ് പ്രതികളെ കുറ്റപത്രം വായിച്ചു കേള്‍പ്പിച്ച് കുറ്റം ചുമത്തിയത്.

ആന്ധ്രാ പ്രദേശില്‍ പോയി കഞ്ചാവ് വാങ്ങിയവരും സാമ്പത്തിക സഹായം നല്‍കിയവരും കടത്തുന്നതിന് കൂട്ടുനിന്നവരുമടക്കം 12 പേര്‍ക്കെതിരെ എക്‌സൈസ് കുറ്റപത്രം സമര്‍പ്പിച്ച കേസിലാണ് വിചാരണക്ക് മുന്നോടിയായി കോടതി ചുമത്തിയത്. വാണിജ്യ അളവില്‍ മയക്കുമരുന്ന് സൂക്ഷിച്ച കേസില്‍ 2021 ഒക്ടോബര്‍ 21 മുതല്‍ ജയിലില്‍ കഴിയുന്ന 10പ്രതികള്‍ക്കും കോടതി ജാമ്യം നിരസിച്ചു.


പ്രതികളെ ജയിലിലിട്ട് കസ്റ്റോഡിയല്‍ വിചാരണ ചെയ്യാനും ജഡ്ജി ജി.രാജേഷ് ഉത്തരവിട്ടു. 1 മുതല്‍ 8 വരെ പ്രതികളായ പേയാട് പിറയില്‍ സ്വദേശി അനീഷ് (30), ഇയാളുടെ അയല്‍വാസി സജി (35), മൂങ്ങോട് മണലി സ്വദേശി അനൂപ് എം മോഹന്‍ എന്ന അനു (35), ശാസ്തമംഗലത്ത് സ്വകാര്യ സ്ഥാപനം നടത്തിയിരുന്ന പേയാട് താമസിക്കുന്ന വിതുര സ്വദേശി രഞ്ജിത് (35), തച്ചോട്ടുകാവ് സ്വദേശി സിബിന്‍ എന്ന ഉണ്ണി (25), മൂങ്ങോട് മണലി സ്വദേശി അനന്തു എന്ന താറാവ് നന്ദു (25), ബാലരാമപുരം രാമപുരം സ്വദേശി രഞ്ജിത്. യു.എസ് (25) , കാട്ടാക്കട വീരണകാവ് പന്നിയോട് ഉരുവിലാംകോട് വിനീഷ് ഭവനില്‍ വിനീഷ് (25) , പതിനൊന്നും പന്ത്രണ്ടും പ്രതികളായ അജിത് എന്ന സുനന്ദന്‍ , സുജിന്‍. ജി. എസ് എന്നിവര്‍ക്ക് മേലാണ് കുറ്റം ചുമത്തിയത്.


12 പ്രതികളുള്ള കേസില്‍ 2 പ്രതികള്‍ ഒളിവിലാണ്. ഒളിവില്‍ പോയ ഒമ്പതാം പ്രതി പനയം കോട് ഉണ്ണിയെന്ന സതീഷ് , പത്താം പ്രതി മേധാ രാജ് ബാബു എന്നിവര്‍ ഒളിവില്‍ പോയതിനാല്‍ ഇവരെ പിടികിട്ടാപ്പുള്ളികളായി പ്രഖ്യാപിച്ച കോടതി അറസ്റ്റ് വാറണ്ടും ജപ്തി വാറണ്ടും പുറപ്പെടുവിച്ചു.

2021 ഒക്ടോബറിലാണ് പേയാടിന് സമീപം പിറയില്‍ അനീഷിന്റെ വീട്ടില്‍ നിന്നും മൂങ്ങോട് മണലി ഭാഗത്ത് നിന്നും 246 കിലോ കഞ്ചാവ് തെക്കന്‍ മേഖല എക്‌സൈസ് ക്രൈംബ്രാഞ്ച് അധികൃതര്‍ പിടികൂടിയത്. ആന്ധ്രാപ്രദേശിലെ നരസിപ്പട്ടണത്ത് നിന്ന് കഞ്ചാവ് വാങ്ങി പാഴ്‌സല്‍ സര്‍വീസിലൂടെ തിരുവനന്തപുരത്തെത്തിക്കുകയായിരുന്നു.


പാഴ്‌സല്‍ സര്‍വീസിന്റെ ഓഫീസില്‍ നിന്ന് ഓട്ടോറിക്ഷയില്‍ പേയാടുള്ള വീട്ടിലും മൂങ്ങോട് പാറക്കൂട്ടത്തിനിടയിലും സൂക്ഷിച്ചിരുന്ന കഞ്ചാവാണ് പിടികൂടിയത്. പ്രതികളില്‍ അനീഷ്, സിബിന്‍, വിനീഷ് എന്നിവരാണ് ആന്ധ്രാ പ്രദേശില്‍ പോയി കഞ്ചാവ് വാങ്ങിയതെന്ന് എക്‌സൈസ് കുറ്റപത്രത്തില്‍ പറയുന്നു. ഇവര്‍ക്ക് സാമ്പത്തികസഹായം നല്‍കിയത് രജിത്, രഞ്ജിത് എന്നിവരാണെന്നും മറ്റുള്ളവര്‍ കഞ്ചാവ് കടത്തുന്നതിന് കൂട്ടുനിന്നവരാണെന്നും എക്‌സൈസ് കുറ്റപത്രത്തില്‍ പറയുന്നു. വിനീഷിനെ 2022 ഫെബ്രുവരി 10 നാണ് എക്‌സൈസ് അറസ്റ്റ് ചെയ്തത്.

തെക്കന്‍ മേഖലാ എക്‌സൈസ് ക്രൈംബ്രാഞ്ച് സര്‍ക്കിള്‍ ഇന്‍സ്‌പെക്ടര്‍ എച്ച്.നൂറുദ്ദീന്‍, ഗ്രേഡ് അസി. എക്‌സൈസ് ഇന്‍സ്‌പെക്ടര്‍ ദിലീപ് കുമാര്‍, പ്രിവന്റീവ് ഓഫീസര്‍ സുരേഷ് കുമാര്‍ എന്നിവരുടെ നേതൃത്വത്തിലാണ് പ്രതികളെ പിടികൂടിയത്.