ഇഡി വലയില്‍ ദക്ഷിണേന്ത്യന്‍ സംസ്ഥാനങ്ങള്‍. തെലങ്കാന, ബംഗാള്‍, കര്‍ണാടക, തമിഴ്‌നാട് എന്നിവിടങ്ങളില്‍ രാഷ്ട്രീയ നേതാക്കളുടെ വീടുകളിലും സ്ഥാപനങ്ങളിലും റെയ്ഡ്. ഒരല്‍പ്പം ഇളവ് കൊടുത്തിരിക്കുന്നത് കേരളത്തില്‍ പിണറായി സര്‍ക്കാരിന്. അന്തര്‍ദ്ധാര സജീവമാണന്നെ് ആക്ഷേപം. എങ്കിലും കരുവന്നൂരില്‍ വരിഞ്ഞ് മുറുക്കുന്നുണ്ട്. ദക്ഷിണേന്ത്യന്‍ സംസ്ഥാനങ്ങളിലെ രാഷ്ട്രീയക്കാരുടെ കോട്ടകൊത്തളങ്ങളില്‍ കേറിയാണ് ഇഡി പരിശോധന നടത്തുന്നത്. ഡല്‍ഹി മദ്യനയക്കേസുമായി ബന്ധപ്പെട്ട് കള്ളപ്പണം വെളുപ്പിച്ച സഞ്ജയ് സിങ്ങിനെ ഇഡി അറസ്റ്റ് ചെയ്തിരുന്നു. കേരളത്തില്‍ കരുവന്നൂര്‍ ബാങ്ക് തട്ടിപ്പില്‍ സിപിഎം നേതാവിനെ ഇഡി തൂക്കിയിട്ടുണ്ട്. ഈ പേടിയിലാണ് ദക്ഷിണേന്ത്യന്‍ സംസ്ഥാനങ്ങളിലെ രാഷ്ട്രീയക്കാര്‍. തെലങ്കാന മുഖ്യമന്ത്രി ചന്ദ്രശേഖര്‍ റാവു വിറയ്ക്കുന്നുണ്ട്. മകള്‍ കവിത് ഡല്‍ഹി മദ്യനയ കേസില്‍ കവിതയും ആരോപണവിധേയ ആണ്. മകളെ തൂക്കുമോ എന്നൊരു ഭയം ഉള്ളില്‍ കിടപ്പുണ്ട്. ദക്ഷിണേന്ത്യന്‍ സംസ്ഥാനങ്ങളെ മുള്‍മുനയില്‍ നിര്‍ത്തി ഇഡി.

തെലങ്കാന, ബംഗാള്‍, കര്‍ണാടക, തമിഴ്‌നാട് എന്നിവിടങ്ങളില്‍ രാഷ്ട്രീയ നേതാക്കളുടെ വീടുകളിലും സ്ഥാപനങ്ങളിലും ഇ.ഡിയും ആദായ നികുതി വകുപ്പും കയറി ഇറങ്ങുകയാണ്. തെലങ്കാനയില്‍ ഹൈദരാബാദില്‍ ഭരണകക്ഷിയായ ബിആര്‍എസിന്റെ കേന്ദ്രങ്ങളിലും പാര്‍ട്ടിയുമായി അടുത്ത ബന്ധം പുലര്‍ത്തുന്ന വ്യവസായികളുടെ വീടുകളിലുമായി 14 ഇടത്താണ് റെയ്ഡ് നടന്നു. നൂറിലേറെ ഉദ്യോഗസ്ഥരാണ് റെയ്ഡിന് ഇരച്ചെത്തുന്നത്. പ്രധാനമന്ത്രിയുടെ രണ്ട് ദിന സന്ദര്‍ശനത്തില്‍ ബിആര്‍എസിനെതിരെ രൂക്ഷമായ വിമര്‍ശനം അഴിച്ചുവിട്ടിരുന്നു. ഇതിനു പിന്നാലെയാണ് റെയ്ഡ് നടക്കുന്നത്. നിയമസഭാ തിരഞ്ഞെടുപ്പ് അടുത്തിരിക്കുന്ന സംസ്ഥാനത്ത് തിരഞ്ഞെടുപ്പ് പ്രഖ്യാപനം ഏതു നിമിഷവും ഉണ്ടാകുമെന്നിരിക്കേയാണ് കേന്ദ്ര ഏജന്‍സികളുടെ പരിശോധന.

കര്‍ണാടകയിലെ ബംഗലൂരുവില്‍ കോണ്‍ഗ്രസ് നേതാവ് ഷിവമോഗയിലെ മഞ്ചുനാഥ് ഗൗഡയുമായി ബന്ധപ്പെട്ട കേന്ദ്രങ്ങളില്‍ ആദായ നികുതി വകുപ്പ് ആണ് പരിശോധന നടത്തി. ആദായ നികുതി വെട്ടിപ്പ് ഇദ്ദേഹത്തിന്റെ സ്ഥാപനങ്ങളിലുണ്ടായി എന്നാണ് ആരോപണം. പശ്ചിമ ബംഗാളില്‍ തൃണമൂല്‍ കോണ്‍ഗ്രസ് നേതാക്കളെ ലക്ഷ്യമിട്ടാണ് പരിശോധന. ഭക്ഷ്യമന്ത്രി രതിന്‍ ഖോഷിന്റെ സ്ഥാപനങ്ങളിലും വസതിയിലും അദ്ദേഹവുമായി ബന്ധപ്പെട്ടവരുടെ സ്ഥാപനങ്ങളിലുമായി 13 ഇടത്താണ് പരിശോധന. മുന്‍സിപ്പല്‍ നിയമന കോഴയുമായി ബന്ധപ്പെട്ടാണ് പരിശോധന നടന്നത്. കേന്ദ്രസര്‍ക്കാരിനെതിരെ ഡല്‍ഹിയിലേക്ക് തൃണമൂല്‍ കോണ്‍ഗ്രസ് പ്രക്ഷോഭം നയിക്കുന്ന പശ്ചാത്തലത്തിലാണ് റെയ്ഡുമെത്തിയത്. കഴിഞ്ഞ ദിവസം മുഖ്യമന്ത്രി മമത ബാനര്‍ജിയുടെ അനന്തരവനും പാര്‍ട്ടി ജനറല്‍ സെക്രട്ടറിയുമായ അഭിഷേക് ബാനര്‍ജിയെ ഇ.ഡി ചോദ്യം ചെയ്യാന്‍ പല തവണയായി നോട്ടീസ് നല്‍കിയിരുന്നു.

തമിഴ്‌നാട്ടിലെ ചെന്നൈയില്‍ മുന്‍കേന്ദ്രമന്ത്രി എസ്. ജഗത്‌രക്ഷകന്റെ സ്ഥാപനങ്ങളിലാണ് പരിശോധന. ആദായ നികുതി ഉദ്യോഗസ്ഥര്‍ ചെന്നൈ, പോണ്ടിച്ചേരി എന്നിവിങ്ങളിലെ 40 ഓളം കേന്ദ്രങ്ങളിലാണ് പരിശോധന നടന്നത്. നിരവധി മെഡിക്കല്‍ കോളജുകളും ഹോട്ടല്‍ ശൃംഖലയുമുള്ളയാളാണ് ജഗത്‌രക്ഷകന്‍. 2016ല്‍ ആദായ നികുതിയും 2020ല്‍ ഇഡിയും പരിശോധന നടത്തിയിരുന്നു. 80 കോടിയോളം രൂപയുടെ വിദേശ ഇടപാടുകള്‍ മരവിപ്പിച്ചിരുന്നു. കേരളത്തില്‍ സഹകരണ ബാങ്കുകല്‍ക്ക് മുകളില്‍ വട്ടമിട്ട് പറക്കുകയാണ് ഇഡി. സിപിഎമ്മിനെ വിറപ്പിച്ച് ഒരു അറസ്റ്റും നടന്നു. അടുത്തത് കരുത്തനായ ഒരു നേതാവെന്ന സൂചനകള്‍ പുറത്ത് വരുന്നു. എസി മൊയ്തീനിലേക്ക് അടുത്ത് കൊണ്ടിരിക്കുന്നുവെന്നും റിപ്പോര്‍ട്ട്. ഇതോടെ സിപിഎം നില പരുങ്ങലിലാണ്.

ഇങ്ങനെ തെക്ക് കയറി വിഹരിക്കുകയാണ് ഇഡി. നേതാക്കന്മാരുടെ ചങ്കിടിപ്പ് കൂട്ടുകയാണ് കേന്ദ്ര ഏജന്‍സി. എന്നാല്‍ ഇത് കേന്ദ്ര സര്‍ക്കാരിന്റെ വേട്ടയാടലാണെന്ന ആരോപണം ശക്തമാകുന്നു. തിരഞ്ഞെടുപ്പ് അടുത്തിരിക്കെ ബിജെപി സര്‍ക്കാര്‍ നടത്തുന്ന നാറിയ രാഷ്ട്രീയം കളിയെന്ന് എതിരാളികല്‍ പറയുന്നു. ദക്ഷിണേന്ത്യന്‍ സംസ്ഥാനങ്ങളില്‍ ചുവടുറപ്പിച്ച് നില്‍ക്കാന്‍ ബിജെപിക്ക് കഴിയുന്നില്ല അതുകൊണ്ട് വെടക്കാക്കി തനിക്കാക്കാം എന്ന നിലപാട്. ബിജെപി സര്‍ക്കാര്‍ ഈ നെറികെട്ട രാഷ്ട്രീയക്കളി അവസാനിപ്പിക്കണമെന്നാണ് നേതാക്കന്മാരുടെ ആവശ്യം. മോദി സര്‍ക്കാര്‍ കുറച്ച് വളഞ്ഞ വഴി പിടിക്കുകയാണ്. തിരഞ്ഞെടുപ്പ് അടുത്തതോടെ ഇറക്കുന്ന ആയുധം തന്നെയാണ് ഇത്. അല്ല അഴിമതിക്കാരായ രാഷ്ട്രീയക്കാരെ പൂട്ടുക എന്ന ശരിയായ ഉദ്ദേശം ആയിരുന്നെങ്കില്‍ എന്നേ ഇവരൊക്കെ അകത്ത് കിടന്നേനേ. ഇത് കേസെടുത്ത് അകത്താക്കുമെന്ന ഭീഷണി മുനയില്‍ നിര്‍ത്താനുള്ള തന്ത്രമാണ്. കേരളത്തില്‍ തന്നെ കണ്ടില്ലെ പിണറായി സര്‍ക്കാരിനെ പൂട്ടാനാണെഹ്കില്‍ ആവശ്യത്തിലധികം കേസുണ്ട് എന്നാല്‍ അതിലൊന്നും തൊടില്ല. പകരം അവരിങ്ങനെ അണ്ണനും തമ്പിയും കളിക്കുന്നു. ജനങ്ങല്‍ പൊട്ടരാകുന്നു അത്ര തന്നെ. ഏതായാലും ദക്ഷിണേന്തയന്‍ സംസ്ഥാനങ്ങളിലെ അഴിമതിക്കാര്‍ നെട്ടോട്ടം തുടങ്ങിയിട്ടുണ്ട്.