ഇസ്രായേൽ - ഹമാസ് യുദ്ധം ഏഴാം ദിവസം പിന്നിടുമ്പോൾ, ഗാസ മുനമ്പിൽ വ്യോമ, കര, നാവിക സേനകളെ ഉൾപ്പെടുത്തി "ഏകീകൃത" ആക്രമണത്തിന് തയ്യാറാണെന്ന് ഇസ്രായേൽ പ്രതിരോധ സേന (ഐഡിഎഫ്) അറിയിച്ചു. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു ഗാസ അതിർത്തിക്ക് സമീപം സൈനികരുമായി കൂടിക്കാഴ്ച നടത്തിയതിന് പിന്നാലെയാണ് സൈന്യത്തിന്റെ പ്രസ്താവന. ഗാസ പിടിച്ചെടുക്കാനുള്ള വിപുലമായ ആക്രമണത്തിനായി 10,000 സൈനികരെ അയക്കാൻ ഇസ്രായേൽ പദ്ധതിയിടുന്നതായാണ് റിപ്പോർട്ട്. എന്നാൽ ആക്രമണം എപ്പോൾ തുടങ്ങുമെന്ന് സൈന്യം വ്യക്തമാക്കിയിട്ടില്ല. യുദ്ധം കലുഷിതമായ സാഹചര്യത്തിൽ പതിനായിരക്കണക്കിന് പലസ്തീനികൾ വടക്കൻ ഗാസയിൽ നിന്ന് പലായനം ചെയ്യുന്നത് തുടരുകയാണ്. യുദ്ധത്തിൽ ഇതുവരെ 3500 പേരാണ് കൊല്ലപ്പെട്ടത്.

അതേസമയം ആക്രമണം ശക്തമാക്കാൻ ഇസ്രായേൽ പദ്ധതിയിടുമ്പോൾ, "യുദ്ധക്കുറ്റങ്ങളും വംശഹത്യയും" ഇസ്രായേൽ തുടരുകയാണെങ്കിൽ "ദൂരവ്യാപകമായ പ്രത്യാഘാതങ്ങൾ" ഉണ്ടാകുമെന്ന് ഇറാൻ മുന്നറിയിപ്പ് നൽകി. ഹമാസിന്റെ നിയന്ത്രണത്തിലുള്ള ഗാസ മുനമ്പിൽ ഇസ്രായേൽ കര ആക്രമണം നടത്തിയാൽ ടെഹ്‌റാൻ ഇടപെടുമെന്നും ഇറാന്റെ ഉന്നത ഉദ്യോഗസ്ഥർ പറഞ്ഞു. അതിനിടെ, ഇറാൻ വിദേശകാര്യ മന്ത്രി ഹുസൈൻ അമിറാബ്ദൊല്ലാഹിയാൻ ദോഹയിൽ ഹമാസ് പൊളിറ്റ് ബ്യൂറോ മേധാവി ഇസ്മായിൽ ഹനിയേയുമായി കൂടിക്കാഴ്ച നടത്തിയതായി ഇറാൻ സർക്കാർ മാധ്യമങ്ങൾ റിപ്പോർട്ട് ചെയ്യുന്നു.

ഹമാസിനെതിരായ പോരാട്ടത്തിൽ ഇസ്രായേലിനെ പിന്തുണയ്ക്കുന്നതിനായി രണ്ടാമത്തെ നാവിക കാരിയർ സ്ട്രൈക്ക് ഗ്രൂപ്പിനെ അയയ്ക്കാൻ അമേരിക്ക പദ്ധതിയിടുന്നതായി അടുത്ത വൃത്തങ്ങളെ ഉദ്ധരിച്ച് അസോസിയേറ്റഡ് പ്രസ് റിപ്പോർട്ട് ചെയ്തു. 'യുഎസ്എസ് ഡ്വൈറ്റ് ഡി ഐസൻഹോവർ കാരിയർ സ്ട്രൈക്ക്' ഗ്രൂപ്പിനെ കിഴക്കൻ മെഡിറ്ററേനിയനിലേക്ക് അയയ്ക്കും. അമേരിക്കൻ കാരിയർ സ്ട്രൈക്ക് ഗ്രൂപ്പ് 'യുഎസ്എസ് ജെറാൾഡ് ആർ ഫോർഡ്' ഇതിനകം ഇസ്രായേലിന് സമീപമെത്തയിട്ടുണ്ട്. എന്നാൽ ഇസ്രായേലിൽ 29 അമേരിക്കക്കാർ മരിച്ചതായി സ്ഥിരീകരിച്ച യുഎസ് സ്റ്റേറ്റ് ഡിപ്പാർട്ട്മെന്റ് മറ്റുള്ളവർക്കായി തിരച്ചിൽ നടത്തുന്നതായും അറിയിച്ചു.

ഗാസ അതിർത്തി സന്ദർശനത്തിനും പ്രതിരോധ ഉദ്യോഗസ്ഥരുമായുള്ള കൂടിക്കാഴ്ചയ്ക്കും ശേഷം ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു അഞ്ചാം തവണ യുഎസ് പ്രസിഡന്റ് ജോ ബൈഡനുമായി സംസാരിച്ചു. ഇസ്രായേൽ രാഷ്ട്രത്തിനുള്ള അമേരിക്ക നൽകുന്ന പിന്തുണയ്ക്കും സ്വയം പ്രതിരോധിക്കാനുള്ള അവകാശത്തിനും പ്രധാനമന്ത്രി നെതന്യാഹു ബിഡന് നന്ദി പറഞ്ഞതായി പ്രധാനമന്ത്രിയുടെ ഓഫീസ് അറിയിച്ചു.

ഏറ്റവും പുതിയ കണക്കനുസരിച്ച്, ഹമാസിന്റെ ആക്രമണത്തിൽ കുറഞ്ഞത് 1,300 പേർ കൊല്ലപ്പെടുകയും 3,227 പേർക്ക് പരിക്കേൽക്കുകയും ചെയ്തിട്ടുണ്ട്. തുടർന്ന് ഇസ്രായേൽ നടത്തിയ തിരിച്ചടിയിൽ 2,228 പേർ കൊല്ലപ്പെട്ടു, 8,744 പേർക്ക് പരിക്കേൽക്കുകയും ചെയ്തു. പലസ്തീൻ ആരോഗ്യ മന്ത്രാലയത്തിന്റെ കണക്കനുസരിച്ച്, കഴിഞ്ഞ 24 മണിക്കൂറിനുള്ളിൽ ഗാസയിൽ 300 പേർ കൊല്ലപ്പെടുകയും 800 പേർക്ക് പരിക്കേൽക്കുകയും ചെയ്തു.

അതേസമയം ഇസ്രായേൽ-ഹമാസ് യുദ്ധവും ഗാസയിലെ ആക്രമണവും ചർച്ച ചെയ്യാൻ വരുന്ന ബുധനാഴ്ച അടിയന്തര യോഗം ചേരുമെന്ന് ഓർഗനൈസേഷൻ ഓഫ് ഇസ്ലാമിക് കോർപ്പറേഷൻ (ഒഐസി) അറിയിച്ചു. യുദ്ധഭൂമിയിലെ സൈനിക സാഹചര്യങ്ങളെക്കുറിച്ചും സാധാരണക്കാരുടെ ജീവിതത്തെ അപകടപ്പെടുത്തുന്ന മോശമായ സാഹചര്യങ്ങളെക്കുറിച്ചും രാജ്യത്തിന്റെ മൊത്തത്തിലുള്ള സുരക്ഷയും ചർച്ച ചെയ്യുമെന്ന് ഒഐസി പ്രസ്താവനയിൽ പറഞ്ഞു