ഹമാസ് നടത്തിയ ആക്രമണത്തിന്റെ ഭീകരത വ്യക്തമാക്കുന്ന ചിത്രങ്ങള്‍ പങ്കുവച്ച് ഇസ്രായേല്‍. ഹമാസിന്റെ ഭീകരത ബഹിരാകാശത്ത് നിന്നുപോലും ദൃശ്യമാണെന്ന് ഇസ്രായേല്‍ പ്രതിരോധ സേന (ഐഡിഎഫ്) പറഞ്ഞു. ആക്രമണത്തിനു മുന്നെയും പിന്നെയുമുള്ള ഉപഗ്രഹ ചിത്രങ്ങള്‍ പങ്കുവച്ചാണ് ഐഡിഎഫിന്റെ പ്രതികരണം.

ആക്രമണത്തിനു ശേഷം എടുത്ത ഉപഗ്രഹ ചിത്രങ്ങളില്‍ ഗാസയോട് ചേര്‍ന്നു കിടക്കുന്ന ഇസ്രയേലില്‍ മുഴുവന്‍ കറുത്ത പുക ഉയരുന്നതാണ് കാണാന്‍ സാധിക്കുന്നത്. ഹാമസ് ആക്രമണ സമയത്ത് നിരവധി ബോംബുകള്‍ പ്രയോഗിക്കുകയും റോക്കറ്റ് ആക്രമണവും നടന്നിരുന്നു.

ഒക്‌ടോബര്‍ ഏഴിനാണ് ഹമാസ് ആക്രമണം അഴിച്ചുവിട്ടത്. യുദ്ധക്കുറ്റങ്ങള്‍ ചെയ്യാന്‍ ഹമാസ് എത്രത്തോളം തയ്യാറാണ് എന്നത് ബഹിരാകാശത്ത് നിന്ന് പോലും ദൃശ്യമാണെന്ന് എക്‌സിലെ പോസ്റ്റില്‍ ഐഡിഎഫ് പറയുന്നു.

ഇസ്രായേലികളെ കൊല്ലാന്‍ ഹമാസ് ഉപയോഗിച്ച ചില ആയുധങ്ങള്‍ കണ്ടുകെട്ടിയതായും ഇസ്രായേല്‍ പ്രതിരോധ സേന മറ്റൊരു പോസ്റ്റില്‍ വ്യക്തമാക്കി. ഗാസയിലെ ഹമാസിന്റെ ഭീകരവാദ അടിസ്ഥാന സൗകര്യങ്ങളും ആയുധ നിര്‍മ്മാതാക്കളും നീക്കം ചെയ്യുമെന്ന് ഐഡിഎഫ് പറഞ്ഞു.

ഗാസയുടെ വടക്കന്‍ പ്രദേശത്തു നിന്ന് ജനങ്ങള്‍ക്ക് ഒഴിയാന്‍ ഇസ്രായേല്‍ നല്‍കിയ സമയം അവസാനിച്ചിരിക്കുകയാണ്. ഗാസയില്‍ നിലവില്‍ ഒളിച്ചിരിക്കുന്ന ഹമാസ് ഭീകരര്‍ക്കു നേരെ ശക്തമായ ആക്രമണം അഴിച്ചു വിടുന്നതിനാണ് ജനങ്ങളോട് ഒഴിയാന്‍ ആവശ്യപ്പെട്ടത്.

ഹമാസ് ഭീകരര്‍ക്കെതിരെ ആക്രമണം നടത്താന്‍ ഇസ്രായേല്‍ പ്രതിരോധ സേന (ഐഡിഎഫ്) പദ്ധതിയിടുന്നതിനാല്‍ ഗാസയുടെ വടക്കന്‍ ഭാഗത്ത് താമസിക്കുന്ന 1.1 ദശലക്ഷം നിവാസികള്‍ക്ക് തെക്കന്‍ മേഖലയിലേക്ക് മാറാന്‍ ഇസ്രായേല്‍ സമയപരിധി നല്‍കിയിരുന്നു. തങ്ങളുടെ യുദ്ധം ഗാസയിലെ ജനങ്ങളോടല്ലെന്നും ഹമാസുമായും ആണെന്ന് ആവര്‍ത്തിച്ചുകൊണ്ടാണ് ഐഡിഎഫ് ഗാസയുടെ ചില ഭാഗങ്ങളില്‍ നിരന്തരം ബോംബാക്രമണം തുടരുന്നതും.

അതേസമയം, ഹമാസ് തങ്ങളെ യുദ്ധബാധിത പ്രദേശത്ത് നിന്ന് ഒഴിപ്പിക്കാന്‍ അനുവദിക്കുന്നില്ലെന്നും സുരക്ഷ തേടുന്നത് തടയാന്‍ അവരുടെ ഐഡികളും മൊബൈല്‍ ഫോണുകളും എടുത്ത് മാറ്റുന്നില്ലെന്നും ഗാസയിലെ ജനങ്ങള്‍ വെളിപ്പെടുത്തി. ഇത് ഗാസയില്‍ നൂറുകണക്കിന് സാധാരണക്കാര്‍ കൊല്ലപ്പെടാനുള്ള സാധ്യത വര്‍ദ്ധിപ്പിക്കുന്നു. ജനങ്ങളെ പ്രതിരോധമായി വച്ചുകൊണ്ട് ആക്രമണം അഴിച്ചുവിടുന്ന സമീപനമാണ് ഹമാസിനുള്ളത്. ഇരവാദം ഉന്നായിക്കാന്‍ ഇതു സഹായിക്കുമെന്ന ലക്ഷ്യത്തിലാണ് ഇത്തരം പ്രവര്‍ത്തങ്ങള്‍.