ഇന്ത്യ'ക്കു പകരം 'ഭാരത്'....പ്‌ളസ് ടു വരെയുള്ള സാമൂഹിക പാഠം പുസ്തകങ്ങളില്‍ രാജ്യത്തിന്റെ പേര് 'ഇന്ത്യ'ക്കു പകരം 'ഭാരത്' എന്നു മാറ്റാനും ഭാരതീയ രാജാക്കന്‍മാരുടെ വിജയങ്ങള്‍ക്ക് പ്രാധാന്യം നല്‍കാനും എന്‍.സി.ഇ.ആര്‍.ടിയുടെ പാഠ്യപദ്ധതി പരിഷ്‌കരണ സമിതിയുടെ ശുപാര്‍ശ.

അടുത്ത കൊല്ലം നടപ്പാക്കണമെന്നാണ് നിര്‍ദ്ദേശം. ഇതു സംബന്ധിച്ച് തീരുമാനമെടുത്തിട്ടില്ലെന്ന് എന്‍.സി.ഇ.ആര്‍.ടി ചെയര്‍മാന്‍ .ദേശീയ വിദ്യാഭ്യാസ നയത്തിന്റെ ഭാഗമായി പാഠപുസ്തകങ്ങള്‍ പരിഷ്‌കരിക്കാന്‍ ചരിത്രകാരനും മലയാളിയുമായ സി.ഐ. ഐസക്കിന്റെ നേതൃത്വത്തില്‍ രൂപം നല്‍കിയ ഏഴംഗ സമിതിയുടേതാണ് ശുപാര്‍ശ.

ഇന്ത്യ 'ഭാരത്' എന്നും പുരാതന ചരിത്രം 'ക്ലാസിക്കല്‍ ഹിസ്റ്ററി' എന്നും മാറ്റുമെന്ന് ഐസക് . എല്ലാ വിഷയങ്ങളിലും ഇന്ത്യന്‍ നോളജ് സിസ്റ്റം (ഐ.കെ.എസ്-ഇന്ത്യന്‍ അറിവുകള്‍) ഉള്‍പ്പെടുത്തണം. 'ഭാരത്' എന്നത് കമ്മിറ്റിയുടെ ഏകകണ്ഠ ശുപാര്‍ശയാണ്. ഭാരതം വളരെ പഴക്കമുള്ള പേരാണ്. 7,000 വര്‍ഷം പഴക്കമുള്ള വിഷ്ണുപുരാണം പോലുള്ള പുരാതന ഗ്രന്ഥങ്ങളില്‍ ഭാരതം എന്ന് ഉപയോഗിച്ചിട്ടുണ്ട്.

1757ലെ പ്ലാസി യുദ്ധത്തിനും ഈസ്റ്റ് ഇന്ത്യ കമ്പനി രൂപീകരണത്തിനും ശേഷമാണ് ഇന്ത്യ എന്ന പേര് ഉപയോഗത്തിലായത്. ഭരണഘടനയിലും ഇന്ത്യ അഥവാ ഭാരത് എന്നാണ് പറയുന്നതെന്നും ഐസക് ചൂണ്ടിക്കാട്ടുന്നു.
വിവിധ വിഷയങ്ങളില്‍ പാഠ്യപദ്ധതി പരിഷ്‌ക്കരിക്കാന്‍ 2021 ല്‍ 25 സമിതികളാണ് എന്‍സിഇആര്‍ടി രൂപീകരിച്ചത്. അതില്‍ സാമൂഹിക ശാസ്ത്രം സംബന്ധിച്ച സമിതിയുടെ അധ്യക്ഷനാണ് മലയാളിയായ ഐസക്.