ഉത്തരകാശിയിലെ സില്‍ക്യാര ടണലില്‍ കുടുങ്ങിയ തൊഴിലാളികളെ രക്ഷപ്പെടുത്തുന്നതിനായുള്ള മാനുവല്‍ ഡ്രില്ലിങ് പുരോഗമിക്കുന്നു... 24 റാറ്റ് മൈനേഴ്‌സിന്റെ നേതൃത്വത്തില്‍ 24 മണിക്കൂര്‍ ഡ്രില്ലിങ് നടക്കും, മൂന്ന് ഷിഫ്റ്റുകളിലായാലും രക്ഷാപ്രവര്‍ത്തനം നടക്കുക, അടുത്ത രണ്ടു ദിവസം മഴയും മഞ്ഞു വീഴ്ചയും ഉണ്ടാവാന്‍ സാധ്യത.

ഓഗര്‍ ഡ്രില്ലിന്റെ പ്രവര്‍ത്തനം നിലച്ചതോടെ ഏഴ് മണിയോടെയാണ് മാനുവല്‍ ഡ്രില്ലിങ് ആരംഭിച്ചത്. റാറ്റ് മൈനേഴ്‌സിന്റെ നേതൃത്വത്തിലാണ് തിരശ്ചീനമായിട്ടുള്ള (ഹൊറിസോണ്ടല്‍) തുരക്കുന്ന ജോലികള്‍ പുരോഗമിക്കുന്നത്. പല രക്ഷാപ്രവര്‍ത്തന രീതികളും പരാജയമായതോടെയാണ് അധികൃതര്‍ മാനുവല്‍ ഡ്രില്ലിങ്ങിലേക്ക് കടന്നത്.

അതിനിടെ വെര്‍ട്ടിക്കല്‍ ഡ്രില്ലിങ് 36 മീറ്റര്‍ പിന്നിട്ടതായി അധികൃതര്‍ . കുടുങ്ങിക്കിടക്കുന്ന തൊഴിലാളികളെ രക്ഷിക്കാന്‍ 86 മീറ്റര്‍ കൂടി തുരക്കേണ്ടതുണ്ട്. കാലാവസ്ഥ പ്രതികൂലമാകാന്‍ സാധ്യതയുള്ളതിനാല്‍ രക്ഷാപ്രവര്‍ത്തനം ദുഷ്‌കരമായേക്കും. അവശിഷ്ടങ്ങള്‍ക്കിടയിലൂടെ സ്ഥാപിക്കുന്ന 800എംഎം വ്യാസമുള്ള പൈപ്പുകളിലൂടെ ഇവരെ കടത്തിവിടും. ഇവര്‍ അതിലൂടെ അകത്തുകയറി അവശിഷ്ടങ്ങള്‍ നീക്കം ചെയ്ത് തൊഴിലാളികള്‍ കുടുങ്ങിയ സ്ഥലത്തേക്കുള്ള പാത സുഗമമാക്കും. ഹെല്‍മറ്റ്, യൂണിഫോം, മുഖംമൂടി, കണ്ണട എന്നിവ ധരിച്ചാണ് റാറ്റ്‌ഹോള്‍ ഖനിത്തൊഴിലാളികള്‍ പൈപ്പുകള്‍ക്കുള്ളില്‍ പോകുന്നത്.