ആം ആദ്മി പാര്ട്ടി എംഎല്എമാര്ക്ക് കൈക്കൂലി നല്കാന് ശ്രമിച്ചെന്ന ആരോപണം... ഡല്ഹി മുഖ്യമന്ത്രി കെജ്രിവാളിനെതിരെ നടപടിയുമായി ക്രൈംബ്രാഞ്ച്
ആം ആദ്മി പാര്ട്ടി എംഎല്എമാര്ക്ക് കൈക്കൂലി നല്കാന് ശ്രമിച്ചെന്ന ആരോപണവുമായി ബന്ധപ്പെട്ട് ഡല്ഹി മുഖ്യമന്ത്രി അരവിന്ദ് കെജ്രിവാളിനെതിരെ നടപടിയുമായി ക്രൈംബ്രാഞ്ച്. ആരോപണത്തില് നോട്ടീസ് നല്കാന് ഡല്ഹി പൊലീസിന്റെ ക്രൈംബ്രാഞ്ച് സംഘം വെള്ളിയാഴ്ച വൈകിട്ട് കെജ്രിവാളിന്റെ വീട്ടിലെത്തി. എന്നാല്, നോട്ടീസ് നല്കാതെ ക്രൈംബ്രാഞ്ച് ഉദ്യോഗസ്ഥര് മടങ്ങിയതായി മുഖ്യമന്ത്രിയുടെ ഓഫീസ് അറിയിച്ചു. എഎപി എംഎല്എമാരെ ബിജെപി പ്രലോഭിപ്പിച്ചെന്ന കെജ്രിവാളിന്റെ ആരോപണത്തില് അന്വേഷണം ആവശ്യപ്പെട്ട് ബിജെപി പ്രതിനിധി സംഘം പൊലീസ് കമ്മീഷണറെ കണ്ടതിന് പിന്നാലെയാണ് ക്രൈംബ്രാഞ്ചിന്റെ നടപടി.
ആരോപണത്തില് പ്രത്യേക അന്വേഷണ സംഘത്തിന്റെ (എസ്ഐടി) അന്വേഷണം വേണമെന്ന് ബിജെപി പ്രതിനിധികള് ആവശ്യപ്പെട്ടിരുന്നു. കെജ്രിവാള് സര്ക്കാരിനെ താഴെയിറക്കുമെന്ന് ഭീഷണിപ്പെടുത്തി പാര്ട്ടി വിടാന് ഏഴ് എംഎല്എമാര്ക്ക് ബിജെപി 25 കോടി രൂപ വീതം വാഗ്ദാനം ചെയ്തതായി ഡല്ഹി മന്ത്രി അതിഷി കഴിഞ്ഞയാഴ്ചയാണ് ആരോപിച്ചത്. പാര്ട്ടി എംഎല്എമാരില് ഒരാളുമായി ബന്ധപ്പെട്ടയാളുടെ റെക്കോര്ഡിംഗ് ലഭ്യമാണെന്നും അത് പിന്നീട് കാണിക്കുമെന്നും അവര് അവകാശപ്പെട്ടിരുന്നു.
തന്റെ പാര്ട്ടിയിലെ ഏഴ് എം.എല്.എമാരെ ബി.ജെ.പി ബന്ധപ്പെട്ടിട്ടുണ്ടെന്ന് കെജ്രിവാളും എക്സില് പങ്കുവെച്ച പോസ്റ്റില് അവകാശപ്പെട്ടു. ഡല്ഹി സര്ക്കാരിനെ താഴെയിറക്കിയതിന് ശേഷം തിരഞ്ഞെടുപ്പില് മത്സരിക്കാന് എംഎല്എമാര്ക്ക് 25 കോടി രൂപയും ബിജെപി ടിക്കറ്റും വാഗ്ദാനം ചെയ്തതായും എഎപി നേതാവ് ആരോപിച്ചു. ഏഴ് എഎപി എംഎല്എമാരും പാര്ട്ടി വിടാന് വിസമ്മതിച്ചതായും കെജ്രിവാള് കൂട്ടിച്ചേര്ത്തു.
എന്നാല് ഡല്ഹി ബിജെപി സെക്രട്ടറി ഹരീഷ് ഖുറാന ഈ ആരോപണങ്ങള് തള്ളിക്കളയുകയും ഓഫറുമായി തങ്ങളുമായി ബന്ധപ്പെട്ടെന്ന് ആരോപിക്കപ്പെടുന്ന എംഎല്എമാരെയും ആളുകളെയും പേരുനല്കാന് എഎപിയെ വെല്ലുവിളിക്കുകയും ചെയ്തു. മദ്യ കുംഭകോണത്തില് ഇഡി സമന്സ് ഒഴിവാക്കിയ കെജ്രിവാളിന്റെ നടപടിയില് നിന്ന് ശ്രദ്ധ തിരിക്കാന് എഎപി ശ്രമിക്കുകയാണെന്നും അദ്ദേഹം പറഞ്ഞു.
അതേസമയം ഡല്ഹി മദ്യ നയക്കേസില് എന്ഫോഴ്സ്മെന്റ് ഡയറക്ടറേറ്റിന്റെ (ഇഡി) സമന്സ് അഞ്ചാം തവണയും അരവിന്ദ് കെജ്രിവാള് തള്ളി. ആവര്ത്തിച്ചുള്ള സമന്സ് അദ്ദേഹത്തെ അറസ്റ്റ് ചെയ്യാനുള്ള ശ്രമമാണെന്ന് ആം ആദ്മി പാര്ട്ടി (എഎപി) ആരോപിക്കുന്നു. കഴിഞ്ഞ നാല് മാസത്തിനിടെ ഇത് അഞ്ചാം തവണയാണ് ഇഡി കെജ്രിവാളിന് നോട്ടീസ് അയക്കുന്നത്. നേരത്തെ നാല് തവണ അയച്ച സമന്സിലും കെജ്രിവാള് ഇഡിക്ക് മുന്നില് ഹാജരായിരുന്നില്ല. സമന്സ് നിയമവിരുദ്ധമാണെന്നാണ് ഡല്ഹി മുഖ്യമന്ത്രിയുടെ ആരോപണം. 'കെജ്രിവാളിനെ അറസ്റ്റ് ചെയ്യുകയാണ് മോദി ജിയുടെ ലക്ഷ്യം. തന്നെ അറസ്റ്റു ചെയ്ത് ഡല്ഹി സര്ക്കാരിനെ താഴെയിറക്കാനാണ് പ്രധാനമന്ത്രി ആഗ്രഹിക്കുന്നത്' കെജ്രിവാള് പറഞ്ഞു.
https://www.facebook.com/Malayalivartha
