കർണാടകയിലെ ചെന്നമ്മന കേരെയിൽ പൂജയുടെ മറവിൽ യുവതിയെ ലൈംഗികമായി പീഡിപ്പിക്കാൻ ശ്രമിച്ച ജോത്സ്യൻ പിടിയിൽ. 38 വയസ്സുകാരനായ മോഹൻകുമാറിനെയാണ് പോലീസ് അറസ്റ്റ് ചെയ്തത്. സാമ്പത്തിക അഭിവൃദ്ധിക്കായി പൂജ നടത്താമെന്ന് വിശ്വസിപ്പിച്ചാണ് ഇയാൾ യുവതിയുടെ വീട്ടിലെത്തിയത്. ബ്യൂട്ടീഷ്യനായി ജോലി ചെയ്യുന്ന 35-കാരിയുടെ പരാതിയിലാണ് നടപടി. 2025 ഫെബ്രുവരിയിലാണ് മോഹൻകുമാർ യുവതിയുടെ വീട്ടിലെത്തുന്നത്. പൂജയുടെ ഭാഗമായി ഒരു മണിക്കൂർ നേരം മരത്തെ വലംവെക്കണമെന്ന് നിർദ്ദേശിച്ച് യുവതിയുടെ ഭർത്താവിനെയും മകനെയും ഇയാൾ പുറത്തേക്ക് അയച്ചു.

ഈ സമയത്താണ് ഇയാൾ യുവതിയെ ലൈംഗികമായി ഉപദ്രവിക്കാൻ ശ്രമിച്ചത്.യുവതി ഇതിനെ എതിർത്തപ്പോൾ, താൻ ദുർമന്ത്രവാദം ചെയ്ത് കുടുംബത്തെ നശിപ്പിക്കുമെന്ന് ഇയാൾ ഭീഷണിപ്പെടുത്തിയതായും പരാതിയിൽ പറയുന്നു. സംഭവത്തെത്തുടർന്ന് കടുത്ത മാനസിക വിഷമത്തിലായിരുന്ന യുവതി അടുത്തിടെ ആത്മഹത്യയ്ക്ക് ശ്രമിച്ചിരുന്നു. ഇതിന് പിന്നാലെയാണ് പീഡനവിവരം പുറത്തുപറഞ്ഞതും പോലീസിൽ പരാതി നൽകിയതും. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.