നേതാജി സുഭാഷ് ചന്ദ്രബോസിനെ ഇന്ത്യയുടെ ആദ്യ പ്രധാനമന്ത്രിയെന്ന് വിളിച്ച് ബോളിവുഡ് നടിയും ബിജെപി സ്ഥാനാര്‍ത്ഥിയുമായ കങ്കണ റണാവത്. ഒരു ടെലിവിഷന്‍ അഭിമുഖത്തിലാണ് കങ്കണ റണാവത് സുഭാഷ് ചന്ദ്രബോസിനെ പ്രധാനമന്ത്രിയെന്ന് വിശേഷിപ്പിച്ചത്. ഹിമാചല്‍ പ്രദേശിലെ മാണ്ഡി സീറ്റില്‍ നിന്നാണ് താരം മത്സരിക്കുന്നത്.

നടിയുടെ പരാമര്‍ശത്തെ പരിഹസിച്ച് ബിആര്‍എസ് വര്‍ക്കിംഗ് പ്രസിഡന്റ് കെ ടി രാമറാവുവും രംഗത്തെത്തി. 'വടക്കുനിന്നുള്ള ഒരു ബിജെപി സ്ഥാനാര്‍ത്ഥി പറയുന്നു, സുഭാഷ് ചന്ദ്രബോസാണ് നമ്മുടെ ആദ്യ പ്രധാനമന്ത്രിയെന്ന്, തെക്കില്‍ നിന്നുള്ള മറ്റൊരു ബിജെപി സ്ഥാനാര്‍ത്ഥി പറയുന്നു മഹാത്മാ ഗാന്ധിയാണ് നമ്മുടെ പ്രധാനമന്ത്രിയെന്ന്. ഇവരൊക്കെ എവിടെനിന്നാണ് ബിരുദം നേടിയത്?'- കെടിആര്‍ സമൂഹമാദ്ധ്യത്തിലൂടെ പരിഹസിച്ചു.

ഒരു ടെലിവിഷന്‍ അഭിമുഖത്തിലാണ് കങ്കണ റണാവത് സുഭാഷ് ചന്ദ്രബോസിനെ പ്രധാനമന്ത്രിയെന്ന് വിശേഷിപ്പിച്ചത്. 'നമുക്ക് സ്വാതന്ത്ര്യം ലഭിച്ചപ്പോള്‍ ഇന്ത്യയുടെ ആദ്യ പ്രധാനമന്ത്രി നേതാജി സുഭാഷ് ചന്ദ്രബോസ് എവിടെപ്പോയി?' എന്നായിരുന്നു നടിയുടെ ചോദ്യം. ഇത് വലിയ വിമര്‍ശനങ്ങള്‍ക്കും പരിഹാസങ്ങള്‍ക്കും ഇടയാക്കിയിരുന്നു. കോണ്‍ഗ്രസ് നേതാവ് സുപ്രിയ ശ്രീനാതെയും കങ്കണയെ പരിഹസിച്ച് രംഗത്തെത്തി.

കങ്കണയെ സാധാരണക്കാരിയായി കാണരുതെന്നും ബിജെപി നേതാക്കളുടെ പട്ടികയില്‍ അവര്‍ മുന്‍നിരയിലെത്തുമെന്നുമായിരുന്നു കോണ്‍ഗ്രസ് നേതാവിന്റെ പരിഹാസം. നേരത്തെ ഇന്ത്യയ്ക്ക് യഥാര്‍ത്ഥ സ്വാതന്ത്ര്യം ലഭിച്ചത് നരേന്ദ്ര മോദി 2014ല്‍ പ്രധാനമന്ത്രിയായി അധികാരത്തിലെത്തിയതിനുശേഷമാണെന്നുള്ള കങ്കണയുടെ പരാമര്‍ശവും ട്രോളുകള്‍ ഏറ്റുവാങ്ങിയിരുന്നു.