ലോക്സഭാ തിരഞ്ഞെടുപ്പ് ഫലങ്ങളുടെ അവലോകനത്തിനും പുതിയ സര്‍ക്കാര്‍ രൂപീകരണത്തിന്റെ വിശദാംശങ്ങള്‍ ആലോചിക്കുന്നതിനുമായി ഇന്ന് ഡല്‍ഹിയില്‍ എന്‍ഡിഎ യോഗം സംഘടിപ്പിച്ചു. കേന്ദ്രത്തില്‍ തുടര്‍ച്ചയായി മൂന്നാം തവണയും സര്‍ക്കാര്‍ രൂപീകരിക്കാനൊരുങ്ങുകയാണ് നരേന്ദ്ര മോദി.

ബിജെപി നേതൃത്വത്തിലുള്ള നാഷണല്‍ ഡെമോക്രാറ്റിക് അലയന്‍സ് പാര്‍ട്ടികള്‍ പ്രസിഡന്റ് ദ്രൗപതി മുര്‍മുവിനെ കാണുകയും നരേന്ദ്ര മോദിയുടെ നേതൃത്വത്തില്‍ സര്‍ക്കാര്‍ രൂപീകരിക്കാന്‍ അവകാശവാദം ഉന്നയിക്കുകയും ചെയ്യുമെന്ന് വൃത്തങ്ങള്‍ അറിയിച്ചു. എന്‍ഡിഎ 292 സീറ്റുകള്‍ നേടിയ ലോക്സഭാ തിരഞ്ഞെടുപ്പ് ഫലം പ്രഖ്യാപിച്ചതിന് തൊട്ടുപിന്നാലെ സഖ്യകക്ഷികള്‍ ഇന്ന് ഡല്‍ഹിയില്‍ യോഗം ചേര്‍ന്നു.

ആഭ്യന്തരമന്ത്രി അമിത് ഷാ, ടിഡിപി അധ്യക്ഷന്‍ ചന്ദ്രബാബു നായിഡു, ബിഹാര്‍ മുഖ്യമന്ത്രി നിതീഷ് കുമാര്‍, ജെഡിയു നേതാക്കളായ ലല്ലന്‍ സിംഗ്, സഞ്ജയ് ഝാ എന്നിവര്‍ യോഗത്തില്‍ പങ്കെടുത്തു.സര്‍ക്കാര്‍ രൂപീകരണത്തില്‍ നിര്‍ണായക പങ്ക് വഹിക്കാന്‍ കഴിയുന്ന ജെഡിയു, ടിഡിപി, പവന്‍ കല്യാണിന്റെ ജനസേന എന്നിവയിലായിരുന്നു എല്ലാ കണ്ണുകളും.

'ഞങ്ങള്‍ എന്‍ഡിഎയിലാണ്, ഞാന്‍ എന്‍ഡിഎ യോഗത്തിന് പോകുകയാണ്, എന്തെങ്കിലും ഉണ്ടെങ്കില്‍ ഞങ്ങള്‍ നിങ്ങളെ അറിയിക്കും.'ഡല്‍ഹിയില്‍ നടക്കുന്ന എന്‍ഡിഎ പങ്കാളികളുടെ യോഗത്തില്‍ പങ്കെടുക്കുന്നതിന് മുന്നോടിയായി ചന്ദ്രബാബു നായിഡു പറഞ്ഞിരുന്നു.

ആന്ധ്രാപ്രദേശിലെ 25 ലോക്സഭാ സീറ്റുകളില്‍ 16ലും ടിഡിപി വിജയിച്ചപ്പോള്‍ ബിഹാറിലെ 40ല്‍ 12ലും ജെഡിയു വിജയിച്ചു. 240 ലോക്സഭാ സീറ്റുകളില്‍ മാത്രം വിജയിച്ച ബിജെപിയുടെ ഭൂരിപക്ഷം ഇത്തവണ കുറഞ്ഞു. സഖ്യകക്ഷികളുടെ സഹായത്തോടെ എന്‍ഡിഎ 292 സീറ്റുകള്‍ നേടി.