ഉത്തരാഖണ്ഡില്‍ അപകടത്തില്‍ മരിച്ച ട്രക്കിംഗ് സംഘത്തില്‍ രണ്ട് മലയാളികളും. കന്യാകുമാരി തക്കല സ്വദേശി ആശാ സുധാകര്‍ (71) പാലക്കാട് സ്വദേശിനി വി കെ സിന്ധു (45) എന്നിവരാണ് മരിച്ചത്. സിന്ധു സോഫ്റ്റ്വെയര്‍ എഞ്ചിനിയറാണ്. എസ് ബി ഐയില്‍ നിന്ന് സീനിയര്‍ മാനേജറായി വിരമിച്ചയാളാണ് ആശ. ഇന്ന് നാല് മൃതദേഹങ്ങള്‍ കൂടി കണ്ടെത്തി. ചൊവ്വാഴ്ച സഹസ്ര തടാകം മേഖലയിലുണ്ടായ മോശം കാലാവസ്ഥയിലാണ് അപകടമുണ്ടായത്.

ആശയേയും സിന്ധുവിനെയും കൂടാതെ ബംഗളൂരുവില്‍ താമസിക്കുന്ന അനിത രംഗപ്പ (55), കെ വെങ്കടേഷ് പ്രസാദ് (53), വിനായക് മുഖുര്‍വദി (52), സുജാത മുഖുര്‍വദി (52), കെ പി പത്മനാഭ (50), ചിത്ര പ്രനീത് (48), പത്മിനി ഹെഗ്ഡെ (34) എന്നിവരുടെയും മരണം സ്ഥിരീകരിച്ചു. കഴിഞ്ഞ ദിവസം അഞ്ച് മൃതദേഹങ്ങള്‍ കണ്ടെത്തിയിരുന്നു. കഴിഞ്ഞ മാസം 29നാണ് സംഘം പുറപ്പെട്ടത്. കര്‍ണാടക മൗണ്ടനറിംഗ് അസോസിയേഷന്റെ നേതൃത്വത്തിലായിരുന്നു ട്രക്കിംഗ്.

4,400 മീറ്റര്‍ ഉയരത്തിലുള്ള തടാകത്തിലായിരുന്നു പോയത്. ഇരുപത്തിരണ്ട് പേരാണ് സംഘത്തിലുണ്ടായിരുന്നത്. ഇതില്‍ 18 പേര്‍ ബംഗളൂരുവില്‍ നിന്നും,? ഒരാള്‍ മഹാരാഷ്ട്രയില്‍ നിന്നും ആയിരുന്നു. ഇവര്‍ക്കൊപ്പം മൂന്ന് ലോക്കല്‍ ഗൈഡുകളും ഉണ്ടായിരുന്നു. നാല് പേരെ കൂടി കണ്ടെത്താനുണ്ടെന്നാണ് റിപ്പോര്‍ട്ടുകള്‍. ഇവര്‍ക്കായി തെരച്ചില്‍ തുടരുന്നു. ആശയുടെ ഭര്‍ത്താവ് സുധാകറും സംഘത്തിലുണ്ടായിരുന്നു. ഇദ്ദേഹം അടക്കം ബാക്കിയുള്ളവരെ രക്ഷപ്പെടുത്തിയിരുന്നു.