മിസോറാം തലസ്ഥാനമായ ഐസോളിന്റെ ഹൃദയഭാഗത്തുണ്ടായിരുന്ന അസം റൈഫിള്‍സിന്റെ ആസ്ഥാനം സോഖ്വാസാങ്ങിലേക്ക് മാറ്റി ഭൂമി മിസോറാം സര്‍ക്കാരിന് ഔദ്യോഗികമായി കൈമാറിയെന്ന് കേന്ദ്ര ആഭ്യന്തര മന്ത്രി അമിത് ഷാ. 1890 മുതല്‍ അസം റൈഫിള്‍സ് കൈവശംവച്ചിരുന്ന ഐസോളിലെ 106.85 ഏക്കര്‍ ഭൂമിയാണ് സംസ്ഥാന സര്‍ക്കാരിനു തിരികെ ലഭിച്ചത്. 35 വര്‍ഷത്തിലേറെയായുള്ള മിസോ ജനതയുടെ ആവശ്യമായിരുന്നു അസം റൈഫിള്‍സിന്റെ ആസ്ഥാന മാറ്റം.

മിസോ ജനതയോടുള്ള കേന്ദ്ര സര്‍ക്കാരിന്റെ ഉത്തരവാദിത്തത്തിന്റെ പ്രതീകമായാണ് ഭൂമി തിരികെ സംസ്ഥാന സര്‍ക്കാരിനു നല്‍കിയതെന്നു മന്ത്രി അമിത് ഷാ പറഞ്ഞു. ''35 വര്‍ഷത്തിലേറെയായി മിസോ ജനത ആവശ്യപ്പെടുന്നതാണ് അസം റൈഫിള്‍സിന്റെ സ്ഥലം മാറ്റം. അതാണ് പ്രധാനമന്ത്രി നരേന്ദ്ര മോദിയുടെ സുപ്രധാന തീരുമാനത്തിലൂടെ നിറവേറുന്നത്. ഇതൊരു ഭരണപരമായ തീരുമാനം മാത്രമല്ല, മിസോ ജനതയോടുള്ള കേന്ദ്ര സര്‍ക്കാരിന്റെ ഉത്തരവാദിത്തത്തിന്റെയും മിസോറാമിന്റെ വികസനത്തിലുള്ള കേന്ദ്ര സര്‍ക്കാരിന്റെ പ്രതിബദ്ധതയുടെയും പ്രതിഫലനമാണ്. 1890ലാണ് ഐസോളില്‍ ആദ്യത്തെ സൈനിക ക്യാംപ് സ്ഥാപിക്കുന്നത്. അതിനുശേഷം ഐസോളിന്റെ വികസന ചരിത്രത്തിലെ ഏറ്റവും സുപ്രധാനമായ നീക്കമാണിത്. '' - അസം റൈഫിള്‍സ് ആസ്ഥാനം മാറ്റുന്നതുമായി ബന്ധപ്പെട്ട ചടങ്ങില്‍ പങ്കെടുത്ത് അമിത് ഷാ പറഞ്ഞു.

ടൂറിസം മുതല്‍ സാങ്കേതികവിദ്യ വരെ, കൃഷി മുതല്‍ സംരംഭകത്വം വരെയുള്ള എല്ലാ മേഖലയിലും വികസനത്തിന്റെ പുതിയ മാനങ്ങള്‍ സ്ഥാപിക്കുന്നതിനും മുഴുവന്‍ വടക്കുകിഴക്കന്‍ പ്രദേശത്തെയും ശക്തിപ്പെടുത്തുന്നതിനും ഒന്നിപ്പിക്കുന്നതിനും കേന്ദ്ര സര്‍ക്കാര്‍ കഴിഞ്ഞ 10 വര്‍ഷമായി അക്ഷീണം പ്രയത്‌നിക്കുകയാണെന്നും അമിത് ഷാ പറഞ്ഞു. പ്രധാനമന്ത്രിയായ ശേഷം നരേന്ദ്ര മോദി 78 തവണ ഈ വടക്കുകിഴക്കന്‍ മേഖല സന്ദര്‍ശിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.