യെമനിലെ പ്രധാന ഹൊദൈദ തുറമുഖത്തും സമീപ പ്രദേശങ്ങളിലുമുള്ള സൗകര്യങ്ങൾക്കു നേരെ തിങ്കളാഴ്ച ഇസ്രായേൽ വ്യോമാക്രമണം നടത്തിയതായും 21 ഓളം പേർക്ക് പരിക്കേറ്റതായും ഹൂത്തി ആരോഗ്യ മന്ത്രാലയ വക്താവ് അനീസ് അൽ-അസ്ബാഹി വ്യക്തമാക്കിരുന്നു. യെമനിലെ ദശലക്ഷക്കണക്കിന് ആളുകൾക്ക് ഭക്ഷണത്തിനും അവശ്യ സഹായത്തിനുമുള്ള ഒരു ജീവനാഡിയാണ് ഹുദൈദ, ടെൽ അവീവിലെ പ്രധാന വിമാനത്താവളത്തിനു സമീപം ഹൂതികൾ കഴിഞ്ഞ ദിവസം നടത്തിയ മിസൈൽ ആക്രമണത്തിന് തിരിച്ചടിയായാണ് ഇസ്രയേൽ തുറമുഖം ആക്രമിച്ചത്. ഞായറാഴ്ച രാവിലെയാണ് ഇസ്രയേലിലെ ബെൻ ഗുറിയോൺ വിമാനത്താവളത്തിൽ ആക്രമണമുണ്ടായത്.

ബെൻ ഗുറിയോൺ വിമാനത്താവളത്തിന്റെ മൂന്നാം ടെർമിനലിന് 75 മീറ്റർ മാത്രം അകലെയാണ് മിസൈൽ പതിച്ചത്. മിസൈൽ പതിച്ച സ്ഥലത്ത് 25 മീറ്ററോളം ആഴത്തിൽ ഗർത്തം രൂപപ്പെട്ടിരുന്നു. മിസൈലിനെ തകർക്കാൻ ഇസ്രയേൽ തദ്ദേശീയമായി വികസിപ്പിച്ചെടുത്ത ആരോ പ്രതിരോധ സംവിധാനവും യുഎസ് നിർമിത ഥാട് സംവിധാനവും ശ്രമിച്ചെങ്കിലും പരാജയപ്പെടുകയായിരുന്നു. എട്ടുപേർക്കാണ് സംഭവത്തിൽ പരുക്കേറ്റത്. യെമനിലെ ഹൂതി വിമതർക്കുള്ള തിരിച്ചടി ഒന്നിൽ നിൽക്കില്ലെന്ന് ഇസ്രയേൽ പ്രധാനമന്ത്രി ബെന്യാമിൻ നെതന്യാഹു മുന്നറിയിപ്പ് നൽകിയിരുന്നു.

2023 അവസാനത്തോടെ ഹൂതികൾ രാജ്യത്തെ ലക്ഷ്യമിടുന്നത് ആരംഭിച്ചതിനുശേഷം ഇസ്രായേലിന്റെ മിസൈൽ പ്രതിരോധ സംവിധാനങ്ങളെ മറികടക്കുന്ന ആദ്യത്തെ പ്രൊജക്റ്റലാണിത്. ഹൂതികളുടെ നിയന്ത്രണത്തിലുള്ള മാധ്യമങ്ങൾ സംപ്രേഷണം ചെയ്ത ദൃശ്യങ്ങളിൽ ഹൊദൈദ തുറമുഖത്ത് നിന്ന് വൻ സ്ഫോടനങ്ങളെ തുടർന്ന് പുകപടലങ്ങളും ഉയരുന്നത് കണ്ടു.

തുരങ്കങ്ങളും മറ്റ് സൈനിക ഘടനകളും നിർമ്മിക്കാൻ ഉപയോഗിച്ചതായി അവകാശപ്പെടുന്ന ഒരു സിമന്റ് ഫാക്ടറി ഉൾപ്പെടെ, തുറമുഖത്തും പരിസരത്തുമുള്ള "ഭീകര അടിസ്ഥാന സൗകര്യങ്ങൾ" ലക്ഷ്യമിട്ടതായി ഇസ്രായേൽ സൈന്യം സ്ഥിരീകരിച്ചു. ഹൊദൈദ തുറമുഖം ഹൂതികൾക്ക് ഇറാനിയൻ ആയുധ കൈമാറ്റത്തിന്റെ കേന്ദ്രമാണെന്നും ഇസ്രായേൽ പ്രതിരോധ സേന (ഐഡിഎഫ്) ആരോപിച്ചു - സ്വതന്ത്രമായി സ്ഥിരീകരിക്കാൻ കഴിയാത്ത അവകാശവാദമാണിത്. ഇസ്രായേലിനുമേൽ "സമഗ്രമായ വ്യോമ ഉപരോധം" ഏർപ്പെടുത്തുമെന്ന് ഹൂത്തി നേതൃത്വം പ്രതിജ്ഞയെടുത്തതിന് പിന്നാലെയാണ് ആക്രമണങ്ങൾ നടന്നത്.