കഴിഞ്ഞ വ്യാഴാഴ്ച കുത്തേറ്റു മരിച്ച നഴ്സ് ദമ്പതികളായ സൂരജിനും ബിൻസിക്കും ഒരേ കല്ലറയിൽ അന്ത്യനിദ്രയൊരുക്കി. ഇരുവരുടെയും സംസ്ക്കാരം ഇന്ന് 11.30 ന് മണ്ടളം സെയ്ൻ്റ് ജൂഡ്സ് പള്ളി സെമിത്തേരിയിൽ നടന്നു. മണ്ടളം പുല്ലംവനം റോഡിലെ കുഴിയാത്ത് സൂരജ് കെ. ജോൺ,ഭാര്യ ബിൻസി എന്നിവരാണ് അബ്ബാസിയയിലെ ഫ്ലാറ്റിൽ കൊല്ലപ്പെട്ടത്.ഇവരുടെ മൃതദേഹങ്ങൾ രാവിലെ 8.30-ന് മണ്ടളത്തെ വീട്ടിൽ എത്തിക്കുകയായിരുന്നു. കണ്ണൂർ വിമാനത്താവളം വഴിയാണ് മൃതദേഹങ്ങൾ എത്തിച്ചത്.

തുടർന്ന് പൊതുദർശനത്തിനു വച്ചു. മണ്ടളത്തെ വീട്ടിൽ അമ്മ തങ്കമ്മയും മൂത്ത സഹോദരിയും ബന്ധുക്കളുമായിരുന്നു ഉണ്ടായിരുന്നത്. മരിച്ച ദമ്പതികളുടെ ഏഴും നാലും വയസുള്ള മക്കളെ ഇന്ന് രാവിലെയോടു കൂടി ഇവിടെ എത്തിക്കുകയായിരുന്നു. പള്ളിയിലേയ്ക്ക് മൃതദേഹങ്ങൾ എത്തിച്ചപ്പോൾ മൂത്തമകൾ വിങ്ങിപ്പൊട്ടി. എന്നാൽ ഇളയകാൻ എന്ത് സംഭവിക്കുന്നുവെന്ന് പോലും തിരിച്ചറിയാതെ പകച്ചു നിന്നു. സൂരജിന്റെ കുവൈത്തിലുള്ള സഹോദരി സുമയും മൃതദേഹങ്ങളെ അനുഗമിച്ച് നാട്ടിലെത്തിയിരുന്നു.