ആധുനിക ലോകം കണ്ട ആഫ്രിക്കന്‍ ഭൂഖണ്ഡത്തിലെ ഏറ്റവും വലിയ എഴുത്തുകാരിലൊരാളായ ഗുഗി വാ തിയോംഗോ (87) അന്തരിച്ചു. കെനിയയുടെ ബ്രിട്ടിഷ് ഇംപീരിയല്‍ കാലവും അതിനുശേഷമുള്ള ഏകാധിപത്യ ഭരണസംവിധാനങ്ങളും തൂലികയില്‍ ആവാഹിച്ച എഴുത്തുകാരനായിരുന്നു അദ്ദേഹം.

അത്‌ലാന്റയിലായിരുന്നു അന്ത്യം. ജന്മദേശത്തെ ഭരണകൂടം നിരന്തരം വേട്ടയാടിയ എഴുത്തുകാരനായ അദ്ദേഹം പലതവണ നൊബേലിന് പരിഗണിക്കപ്പെടുകയും ചെയ്തു. ആഫ്രിക്കന്‍ സാഹിത്യത്തെ മാറ്റിമറിക്കുകയും പുനര്‍നിര്‍വചിക്കുകയും ചെയ്ത പോരാളിയായ എഴുത്തുകാരനായാണ് ഗുഗിയെ ലോകം വിലയിരുത്തുന്നത്.

2010ല്‍ ഇദ്ദേഹത്തെ മറികടന്നാണ് പെറൂവിയന്‍ എഴുത്തുകാരനായ യോസക്ക് നൊബേല്‍ ലഭിച്ചത്. അദ്ദേഹത്തിന്റെ കൊളോണിയല്‍ വിരുദ്ധ ലേഖനങ്ങള്‍ ഈ രംഗത്തെ പാഠപുസ്തകമായാണ് അറിയപ്പെടുന്നത്.

'വീപ് നോട്ട് ചൈല്‍ഡ്', 'ഡെവിള്‍ ഓണ്‍ ദ ക്രോസ്', 'വിസാഡ് ഓഫ് ദ ക്രോ' തുടങ്ങിയവയാണ് പ്രശസ്ത നോവലുകള്‍. 1938ല്‍ കെനിയയിലായിരുന്നു ജനനം. അന്ന് ബ്രിട്ടീഷ് കോളനിയാണ് കെനിയ. പിതാവിന് നാലുഭാര്യമാരിലായി 28 മക്കളുണ്ടായിരുന്നു. തന്റെ കൗമാര കാലത്തുതന്നെ നാടിനെ ഇളക്കി മറിച്ച പ്രതിഷേധങ്ങളും പോരാട്ടങ്ങളും നേരില്‍ കാണുകയും അതു സ്വാധീനിക്കപ്പെടുകയും ചെയ്തു. ഇതെല്ലാം എഴുത്തിലേക്ക് ആവാഹിക്കാനും ഇദ്ദേഹത്തിനായി. നിരവധി ചെറുകഥകളും നാടകങ്ങളും എഴുതിയിട്ടുണ്ട്.