വടക്കു കിഴക്കന്‍ സംസ്ഥാനങ്ങളില്‍ ശക്തമായ മഴ. വിവിധയിടങ്ങളിലുണ്ടായ മണ്ണിടിച്ചിലിലും മിന്നല്‍ പ്രളയത്തിലും കഴിഞ്ഞ രണ്ടുദിവസത്തിനിടെ 30 പേര്‍ മരിച്ചു. അരലക്ഷത്തിലേറെ പേരെ മഴക്കെടുതി ബാധിച്ചതായാണ് സൂചനകള്‍. മഴ ശക്തമായതിന്റെ പശ്ചാത്തലത്തില്‍ ടുറയ്ക്കും അസമിലെ ഗുവാഹത്തിക്കും ഇടയിലുള്ള എന്‍എച്ച് -17 തകര്‍ന്നു. ഗതാഗതം തടസ്സപ്പെട്ടനിലയിലാണ്. ബോക്കോ, ചായ്ഗാവ് എന്നിവിടങ്ങളില്‍ എന്‍എച്ച്-17ന്റെ പ്രധാനഭാഗങ്ങള്‍ ഒലിച്ചുപോയതായായി റിപ്പോര്‍ട്ടിലുണ്ട്.

ശക്തമായ മണ്ണിടിച്ചിലും വെള്ളപ്പൊക്കത്തിലുമാണ് പലര്‍ക്കും ജീവന്‍ നഷ്ടപ്പെട്ടത്. അസം, അരുണാചല്‍, മേഘാലയ, മണിപ്പുര്‍, മിസോറം എന്നിവിടങ്ങളില്‍ മണ്ണിടിച്ചിലും വെള്ളപ്പൊക്കവും ഉണ്ടായി. അസമിലെ 12 ജില്ലകളില്‍നിന്നായി 60,000ലേറെ പേരെ മഴക്കെടുതി ബാധിച്ചതായാണ് വിവരം. അഞ്ചുപേരാണ് അസമില്‍ മരിച്ചത്.

അരുണാചല്‍പ്രദേശില്‍ മിന്നല്‍ പ്രളയത്തിലും മണ്ണിടിച്ചിലിലും ഒമ്പതുപേര്‍ മരിച്ചു. അരുണാചലിലെ ഈസ്റ്റ് കമെങ് ജില്ലയില്‍ മണ്ണിടിച്ചിലില്‍ കാര്‍ ഒലിച്ചു പോയി രണ്ട് കുടുംബങ്ങളിലെ ഏഴുപേര്‍ മരിച്ചു.

മണ്ണിടിച്ചിലില്‍ പ്രധാന റോഡുകളൊക്കെ തകര്‍ന്നതിനാല്‍ വടക്കന്‍ സിക്കിമിലെ വിവിധ ഭാഗങ്ങളില്‍ 1500 ഓളം വിനോദ സഞ്ചാരികള്‍ കുടുങ്ങിക്കിടക്കുന്നതായി അധികൃതര്‍.