രാജസ്ഥാനില്‍ നാലു വയസ്സുള്ള മകളെ കൊലപ്പെടുത്തിയ ശേഷം മൃതദേഹം അലമാരയില്‍ ഒളിപ്പിച്ചുവച്ച അമ്മയും രണ്ടാനച്ഛനും പൊലീസ് പിടിയില്‍. രാജസ്ഥാനിലെ ബാരന്‍ ജില്ലയിലാണ് സംഭവം നടന്നത്. മകളുടെ മൃതദേഹവുമായി 300 കിലോമീറ്ററോളമാണ് ഇവര്‍ യാത്ര ചെയ്തത്. ശേഷം കുടുംബവീട്ടിലെ അലമാരയില്‍ ഒളിപ്പിക്കുകയായിരുന്നു. ദമ്പതികളായ റോഷന്‍ബായിയും മഹാവീര്‍ ബെര്‍വയുമാണ് ക്രൂരകൃത്യം നടത്തിയത്.

ജയ്പുരിലെ വീട്ടില്‍ വച്ച് റോഷന്‍ ബായിയും മഹാവീര്‍ ബെര്‍വയുമായി വഴക്കിട്ടിരുന്നു. ഇതു പിന്നീട് മകള്‍ ഇഷികയുടെ കൊലപാതകത്തിലേക്ക് നയിക്കുകയായിരുന്നുവെന്നാണ് വിവരം. തുടര്‍ന്ന് മൃതദേഹവുമായി റോഷന്‍ബായിയും മഹാവീര്‍ ബെര്‍വയും 300 കിലോമീറ്റര്‍ യാത്ര ചെയ്ത് മഹാവീറിന്റെ കുടുംബവീട്ടിലെത്തി. പെണ്‍കുട്ടിയുടെ മൃതദേഹം ഒരു ദുപ്പട്ട കൊണ്ട് കെട്ടി പ്ലാസ്റ്റിക് ബാഗില്‍ ഇട്ടാണ് അലമാരയില്‍ വച്ചത്.

അലമാരയില്‍ നിന്ന് ദുര്‍ഗന്ധം വമിച്ചതിനെ തുടര്‍ന്ന് ശനിയാഴ്ച മഹാവീര്‍ ബെര്‍വയുടെ പിതാവ് ജയറാം ബൈര്‍വ അലമാര തുറക്കുകയായിരുന്നു. അലമാരയില്‍ നിന്നും രക്തം ഒഴുകുന്ന നിലയിലായിരുന്നു മൃതദേഹം. റോഷന്‍ബായിയുടെയും മുന്‍ ഭര്‍ത്താവ് രവീന്ദര്‍ ബൈര്‍വയുടെയും മകളാണ് മരിച്ച ഇഷികയെന്ന് അസിസ്റ്റന്റ് പൊലീസ് സൂപ്രണ്ട് രാജേഷ് ചൗധരി പറഞ്ഞു. കഴിഞ്ഞ ഏഴു മാസമായി ഇഷിക റോഷന്‍ബായിക്കും മഹാവീറിനും ഒപ്പമാണ് താമസിച്ചിരുന്നത്. മഹാവീര്‍ അറസ്റ്റിലായെങ്കിലും റോഷന്‍ബായിക്കു വേണ്ടിയുള്ള തിരച്ചില്‍ തുടരുകയാണ്. കൊലപാതകം, മോഷണം, ആക്രമണം തുടങ്ങി 15 ഗുരുതരമായ കേസുകള്‍ മഹാവീറിന്റെ പേരിലുണ്ട്.