ഗുജറാത്തിലെ പാവഗഡില്‍ കാര്‍ഗോ റോപ്‌വേ ട്രോളി കേബിളുകള്‍ പൊട്ടി ആറ് മരണം. നിര്‍മ്മാണ സാമഗ്രികള്‍ കൊണ്ടുപോവുകയായിരുന്ന റോപ്‌വേയുടെ കേബിള്‍ പൊട്ടിയതിനെ തുടര്‍ന്ന് ട്രോളി തകര്‍ന്നു വീഴുകയായിരുന്നു. വൈകിട്ട് 3.30 ഓടെയായിരുന്നു അപകടം ഉണ്ടായത്. അപകടത്തില്‍ രണ്ട് ലിഫ്റ്റ്മാന്‍മാരും രണ്ട് തൊഴിലാളികളും ഉള്‍പ്പെടെ ആറ് പേരാണ് മരിച്ചതെന്ന് പഞ്ചമഹല്‍ കളക്ടര്‍ പറഞ്ഞു. നാല് പേര്‍ക്ക് അപകടത്തില്‍ പരിക്കേറ്റു. മരിച്ചവരില്‍ മൂന്നുപേര്‍ പ്രദേശവാസികളും രണ്ടുപേര്‍ കാശ്മീര്‍ സ്വദേശികളും ഒരാള്‍ രാജസ്ഥാന്‍ സ്വദേശിയുമാണെന്നാണ് വിവരം.

സംഭവത്തില്‍ ജില്ലാ ഭരണകൂടം അന്വേഷണത്തിന് ഉത്തരവിട്ടിട്ടുണ്ട്. കുന്നിന്‍ മുകളിലെ ക്ഷേത്രത്തിന്റെ നിര്‍മ്മാണ പ്രവര്‍ത്തനങ്ങള്‍ക്ക് ഉപയോഗിച്ചിരുന്ന കാര്‍ഗോ റോപ്‌വേ ട്രോളി കേബിളുകള്‍ പൊട്ടിയതിനെ തുടര്‍ന്ന് താഴേക്ക് പതിക്കുകയായിരുന്നു. പൊലീസും ഫയര്‍ ബ്രിഗേഡ് സംഘവും ഉടനെ സംഭവസ്ഥലത്തെത്തി രക്ഷാപ്രവര്‍ത്തനം നടത്തിയത്. റോപ്‌വേയിലെ നാലാം നമ്പര്‍ ടവറിനടുത്ത് വച്ച് കേബിളുകള്‍ പൊട്ടുകയായിരുന്നു. ഇതോടെ ട്രോളി താഴെ ഒന്നാം നമ്പര്‍ ടവറിന് സമീപത്ത് വച്ച് ഇടിച്ചു തകര്‍ന്നു. കാബിനുള്ളില്‍ ഉണ്ടായിരുന്ന അഞ്ച് പേരും അപകടസ്ഥലത്തുണ്ടായിരുന്ന ഒരാളുമാണ് മരിച്ചത്.

2000 പടികള്‍ കയറിയെത്തേണ്ട ക്ഷേത്രം 800 മീറ്ററോളം ഉയരത്തിലാണ് സ്ഥിതി ചെയ്യുന്നത്. ക്ഷേത്രത്തിലേക്ക് തീര്‍ത്ഥാടകരെ കൊണ്ടുപോകുന്ന പാസഞ്ചര്‍ റോപ്‌വേ മോശം കാലാവസ്ഥയെ തുടര്‍ന്ന് അടച്ചിട്ടിരുന്നെങ്കിലും നിര്‍മ്മാണ പ്രവര്‍ത്തനങ്ങള്‍ക്കായി ഉപയോഗിച്ചിരുന്ന ഗുഡ്‌സ് റോപ്‌വേ പ്രവര്‍ത്തിച്ചിരുന്നു. അപകടത്തില്‍ പൊലീസ് അന്വേഷണം ആരംഭിച്ചു.