മേഘാലയില്‍ മധുവിധു യാത്രയ്ക്കിടെ ഭര്‍ത്താവ് രാജ രഘുവംശിയെ കൊലപ്പെടുത്തിയ കേസില്‍ മേഘാലയ പോലീസ് 790 പേജുള്ള കുറ്റപത്രം സമര്‍പ്പിച്ചു. അഞ്ചുപേരെ മുഖ്യപ്രതികളാക്കിയാണ് സോഹ്‌റ കോടതിയില്‍ പോലീസ് വിശദമായ കുറ്റപത്രം സമര്‍പ്പിച്ചിരിക്കുന്നത്. കൊല്ലപ്പെട്ട രാജാ രഘുവംശിയുടെ ഭാര്യ സോനം രഘുവംശി, അവരുടെ കാമുകന്‍ രാജ് കുശ്വാഹ, വാടകക്കൊലയാളികളായ വിശാല്‍ സിങ് ചൗഹാന്‍, ആകാശ് രജ്പുത്, ആനന്ദ് കുര്‍മി എന്നിവരെ പ്രതികളാക്കി 790 പേജുള്ള റിപ്പോര്‍ട്ടാണ് പ്രത്യേക അന്വേഷണ സംഘം (എസ്.ഐ.ടി.) സമര്‍പ്പിച്ചത്.ഒന്നാം പ്രതിയായ സോനം രഘുവംശി, രാജയുമായുള്ള വിവാഹത്തിന് ശേഷവും രാജ് കുശ്വാഹയുമായുള്ള ബന്ധം തുടര്‍ന്നിരുന്നു. മധുവിധു യാത്രയുടെ മറവില്‍ രാജയെ ഇല്ലാതാക്കാന്‍ സോനവും കുശ്വാഹയും ഗൂഢാലോചന ആരംഭിച്ചു.

മേയ് 20ന് ദമ്പതിമാര്‍ ഷില്ലോങ്ങിലേക്കും തുടര്‍ന്ന് സോഹ്‌റയിലേക്കും മധുവിധുയാത്ര തിരിച്ചു. മൂന്ന് തവണ കൊലപാതകശ്രമം പരാജയപ്പെട്ടതായും നാലാമത്തെ ശ്രമത്തിലാണ് രാജയെ അഞ്ചംഗ സംഘം കൊലപ്പെടുത്തിയതെന്നും കുറ്റപത്രത്തില്‍ പറയുന്നു.മേയ് 23ന്, സോഹ്‌റയിലെ വെയ് സോഡോങ് വെള്ളച്ചാട്ടത്തിനടുത്ത് വെച്ചായിരുന്നു കൃത്യം നടത്തിയത്. സോനത്തിന് മുന്നില്‍വെച്ചാണ് മറ്റുള്ളവര്‍ രാജയെ കത്തി ഉപയോഗിച്ച് ആക്രമിച്ചത്. തുടര്‍ന്ന് മൃതദേഹം കൊക്കയിലെറിഞ്ഞു. ജൂണ്‍ 2നാണ് മൃതദേഹം കണ്ടെടുത്തത്. മധ്യപ്രദേശിലും ഉത്തര്‍പ്രദേശിലുമായി നടത്തിയ അന്വേഷണത്തില്‍ ഒരാഴ്ചയ്ക്കുള്ളില്‍ അന്വേഷണ സംഘം പ്രതികളെ പിടികൂടി.

തെളിവുകള്‍ നശിപ്പിച്ചതിന് പ്രോപ്പര്‍ട്ടി ഡീലര്‍ സിലോം ജെയിംസ്, ഫ്‌ലാറ്റുടമ ലോകേന്ദ്ര തോമര്‍, സെക്യൂരിറ്റി ഗാര്‍ഡ് ബല്‍ബീര്‍ അഹിര്‍വാര്‍ എന്നിവരെയും അറസ്റ്റ് ചെയ്തിരുന്നു. മൂവരും ഇപ്പോള്‍ ജാമ്യത്തിലാണ്.കുറ്റപത്രം സമര്‍പ്പിച്ചതിനെ സ്വാഗതം ചെയ്ത രാജയുടെ സഹോദരന്‍ വിപിന്‍ രഘുവംശി എല്ലാ പ്രതികള്‍ക്കും വധശിക്ഷ നല്‍കണമെന്ന് ആവശ്യപ്പെട്ടു. തങ്ങള്‍ക്ക് ഇതുവരെ കുറ്റപത്രം ലഭിച്ചിട്ടില്ലെന്നും തിങ്കളാഴ്ച മേഘാലയിലെത്തി കുറ്റപത്രം വായിക്കുമെന്നും അദ്ദേഹം കൂട്ടിച്ചേര്‍ത്തു.