പഠിക്കാത്തതിന് ശകാരിച്ചതിന്റെ പേരില്‍ 14 വയസ്സുകാരന്‍ അമ്മയെ തല്ലിക്കൊന്നു. കള്ളക്കുറിച്ചി ജില്ലയിലെ ഉളുന്ദൂര്‍പേട്ടിലാണ് സംഭവം. കൃഷിയിടത്തില്‍ ദേഹമാസകലം മുറിവേറ്റ നിലയില്‍ മൃതദേഹം കണ്ടെത്തിയത്. കീഴ്കുപ്പം വേലൂരില്‍ താമസിക്കുന്ന ലോറി ഡ്രൈവര്‍ ഗുണശേഖരന്റെ ഭാര്യ മഹേശ്വരിയാണ് (40) കൊല്ലപ്പെട്ടത്. ഇവരുടെ മകനെ പൊലീസ് അറസ്റ്റ് ചെയ്തു.

പഠിക്കാത്തതിന് നിരന്തരം ശകാരിച്ചതിനാലാണ് അമ്മയെ കൊലപ്പെടുത്തിയതെന്ന് കുട്ടി സമ്മതിച്ചതായി പൊലീസ് പറഞ്ഞു. അച്ഛനും അമ്മയും ഇടയ്ക്കിടെ വഴക്കിടുന്നതും കുട്ടിയെ അസ്വസ്ഥനാക്കിയിരുന്നുവെന്ന് പൊലീസ് പറയുന്നു.

പാടത്തേക്കുപോയ മഹേശ്വരി തിരിച്ചെത്താത്തതിനെത്തുടര്‍ന്നു നടത്തിയ തിരച്ചിലിലാണ് കൃഷിയിടത്തില്‍ ദേഹമാസകലം മുറിവേറ്റ നിലയില്‍ മൃതദേഹം കണ്ടെത്തിയത്. മൃതദേഹം പോസ്റ്റ്‌മോര്‍ട്ടത്തിനായി ഉളുന്തൂര്‍പ്പേട്ട സര്‍ക്കാര്‍ ആശുപത്രിയിലേക്കു മാറ്റി. ഗുണശേഖരന്‍മഹേശ്വരി ദമ്പതിമാര്‍ക്ക് 16 വയസ്സുള്ള ഒരു മകളുമുണ്ട്.