വയോധികയെ അധിക്ഷേപിച്ച് പോസ്റ്റിട്ട സംഭവം; മാനനഷ്ടക്കേസില് ബത്തിന്ഡ കോടതിയില് ഹാജരായി കങ്കണ
കര്ഷക സമരത്തില് പങ്കെടുത്ത വയോധികയെ കുറിച്ച് നടത്തിയ പരാമര്ശത്തില് ക്ഷമാപണം നടത്തി ബിജെപി എംപിയും നടിയുമായ കങ്കണ റണാവത്ത്. 73കാരിയായ മഹീന്ദര് കൗര് നല്കിയ മാനനഷ്ടക്കേസില് അതീവ സുരക്ഷയിലാണ് ബത്തിന്ഡ കോടതിയില് കങ്കണ ഹാജരായത്.
സോഷ്യല് മീഡിയ പോസ്റ്റില് ക്ഷമ ചോദിക്കുന്നുവെന്നാണ് നടി കോടതിയോട് പറഞ്ഞത്. വീഡിയോ കോണ്ഫറന്സിലൂടെ ഹാജരാകാന് അനുവദിക്കണമെന്ന് ആവശ്യപ്പെട്ട് നടി നല്കിയ ഹര്ജി കഴിഞ്ഞ മാസം കോടതി തള്ളിയിരുന്നു. ഇന്ന് കോടതിയില് ഹാജരാകണമെന്നായിരുന്നു ഫസ്റ്റ് ക്ലാസ് ജുഡീഷ്യല് മജിസ്ട്രേറ്റ് ലഖ്ബീര് സിംഗ് നിര്ദ്ദേശിച്ചത്. തന്നെ തെറ്റായി ചിത്രീകരിച്ച് കങ്കണ എക്സില് പോസ്റ്റിട്ടുവെന്നും അത് അപകീര്ത്തിപ്പെടുത്തിയെന്നും കാണിച്ചാണ് മഹീന്ദര് കൗര് പരാതി നല്കിയത്. കര്ഷകസമരത്തില് പങ്കെടുക്കാനായി ബില്ക്കീസ് ബാനു ദാദിയെ 100 രൂപയ്ക്ക് ലഭ്യമാണെന്നായിരുന്നു കങ്കണയുടെ പോസ്റ്റ്.
2020ലെ കര്ഷക സമരത്തില് പങ്കെടുത്ത പ്രായമായ സ്ത്രീയെക്കുറിച്ച് നടത്തിയ പരാമര്ശത്തില് 2022 ഫെബ്രുവരിയില് ബത്തിന്ഡ ജുഡീഷ്യല് മജിസ്ട്രേറ്റ് സമന്സയച്ച് കങ്കണയോട് കോടതിയില് ഹാജരാകാന് നിര്ദേശിച്ചിരുന്നു. പിന്നാലെ തനിക്കെതിരായ മാനനഷ്ടക്കേസും കീഴ്കോടതിയുടെ സമന്സ് ഉത്തരവും റദ്ദാക്കണമെന്നാവശ്യപ്പെട്ട് കങ്കണ 2022 ജൂലായില് പഞ്ചാബ് ഹരിയാന ഹൈക്കോടതിയെ സമീപിച്ചു. എന്നാല് ഹൈക്കോടതി ഹര്ജി തള്ളുകയായിരുന്നു. കങ്കണ സുപ്രീംകോടതിയെ സമീപിച്ചെങ്കിലും ഈ വര്ഷം സെപ്തംബറില് ഹര്ജി പരിഗണിക്കാന് കോടതി വിസമ്മതിച്ചു. തുടര്ന്ന് ഹര്ജി പിന്വലിക്കുകയായിരുന്നു. കര്ഷക പ്രതിഷേധവുമായി ബന്ധപ്പെട്ട് നടത്തിയ വിവാദ പരാമര്ശങ്ങളില് പ്രതിഷേധിച്ച് ചണ്ഡീഗഢ് വിമാനത്താവളത്തില് നടന്ന സുരക്ഷ പരിശോധനക്കിടെ സി ഐ എസ് എഫ് വനിത കോണ്സ്റ്റബിള് കങ്കണയെ മര്ദിച്ചിരുന്നു.
https://www.facebook.com/Malayalivartha
