ബീഹാറിൽ എൻഡിഎക്ക് മഹാവിജയം. ആകെയുള്ള 243 മണ്ഡലങ്ങളിൽ 202ലും വിജയിച്ചാണ് ബിജെപിയുടെയും ജെഡിയുവിന്റെയും നേതൃത്വത്തിലുള്ള എൻഡിഎ ഭരണത്തുടർച്ച നേടിയത്. ബിജെപി ഏറ്റവും വലിയ ഒറ്റക്കക്ഷിയായി. സഖ്യകക്ഷികളായ ജെഡിയു, എൽജെപി (ആർവി), എച്ച്എഎം, ആർഎൽഎം എന്നിവരും മുന്നേറ്റം കാഴ്ചവച്ചു. കോൺഗ്രസിന്റെയും ആർജെഡിയുടെയും നേതൃത്വത്തിലുള്ള മഹാസഖ്യം തകർന്നടിഞ്ഞു. കോൺഗ്രസ് ചരിത്രത്തിലെ ഏറ്റവും വലിയ തോൽവി ഏറ്റുവാങ്ങി ഒറ്റയക്കത്തിൽ ഒതുങ്ങി. തെരഞ്ഞെടുപ്പ് തന്ത്രജ്ഞൻ പ്രശാന്ത് കിഷോറിന്റെ ജൻസുരാജ് പാർട്ടി ഒരു സീറ്റ് പോലും നേടിയില്ലെന്ന് മാത്രമല്ല, വേരൂന്നാൻ പോലുമായില്ല.

സമീപകാലത്തെ കോൺഗ്രസിന്റെ ഏറ്റവും മോശം പ്രകടനങ്ങളിലൊന്നാണ് ബീഹാറിലേത് . കനത്ത പരാജയത്തിൽ തകർന്നടിഞ്ഞിരിക്കുന്ന ജീവനക്കാരൊന്നുമില്ലാത്ത ഒരു പാട്ടി മാത്രം കിടക്കുന്ന ഡൽഹി കോൺഗ്രസ് ഓഫീസിന്റെ ചിത്രങ്ങൾ ഇപ്പോൾ സോഷ്യൽ മീഡിയയിൽ പ്രചരിക്കുന്നുണ്ട്. ബീഹാർ തെരഞ്ഞെടുപ്പ് എല്ലാ തെരഞ്ഞെടുപ്പു ചരിത്രവും മറികടന്നുവെന്ന് പ്രധാനമന്ത്രി നരേന്ദ്ര മോദി. ബീഹാർ തെരഞ്ഞെടുപ്പ് വിജയമാഘോഷിക്കാൻ ദൽഹി പാർട്ടി ആസ്ഥാനത്ത് നടന്ന കൂറ്റൻ സമ്മേളനത്തെ അഭിസംബോധന ചെയ്യുകയായിരുന്നു പ്രധാനമന്ത്രി.
പ്രതിപക്ഷത്തോട്, കോൺഗ്രസിനോടും ആർജെഡിയോടും മോദി പറഞ്ഞു: ‘നിങ്ങൾ തിരിച്ചുവരില്ല. ബീഹാർ ജനതയ്‌ക്ക് വികാസമാണ് വേണ്ടത്, കാട്ടുഭരണമല്ല. അവർക്ക് വേണ്ടത് പ്രണീനമല്ല, സന്തോഷവും സംതൃപ്തിയുമാണ്.’ എന്നും പറഞ്ഞു.

ബിഹാറിലെ എൻഡിഎയുടെ വൻ വിജയം മമത ബാനർജിയുടെ തൃണമൂൽ കോൺഗ്രസ് അധികാരത്തിലിരിക്കുന്ന അയൽ സംസ്ഥാനമായ പശ്ചിമ ബംഗാളിലും സമാനമായ പ്രകടനത്തിന് അടിത്തറ പാകിയിട്ടുണ്ടെന്ന് പ്രധാനമന്ത്രി നരേന്ദ്ര മോദി ഡൽഹിയിലെ ബിജെപി ആസ്ഥാനത്ത് പറഞ്ഞു. "ഗംഗാ നദി ബീഹാർ വഴി ബംഗാളിലേക്ക് ഒഴുകുന്നു. നദിയെപ്പോലെ തന്നെ ബീഹാറിലെ വിജയവും ബംഗാളിലെ നമ്മുടെ വിജയത്തിന് വഴിയൊരുക്കി," ഒരു മണിക്കൂർ നീണ്ട പ്രസംഗത്തിന്റെ അവസാനത്തിൽ പ്രധാനമന്ത്രി മോദി പറഞ്ഞു. "നിങ്ങളുടെ പ്രതീക്ഷകളാണ് എന്റെ പ്രതിജ്ഞ, നിങ്ങളുടെ സ്വപ്നങ്ങളാണ് എന്റെ പ്രചോദനം. ബിജെപിയെ സംബന്ധിച്ചിടത്തോളം പാർട്ടി പ്രവർത്തകരാണ് അതിന്റെ ശക്തി," ബീഹാറിലെ മികച്ച പ്രകടനത്തിന് പ്രവർത്തകരെ പ്രശംസിച്ചുകൊണ്ട് പ്രധാനമന്ത്രി മോദി പറഞ്ഞു. "ബംഗാളിൽ മാത്രമല്ല, ഈ വിജയം ദക്ഷിണേന്ത്യയിലെയും നമ്മുടെ തൊഴിലാളികൾക്ക് പ്രചോദനമാകും," പ്രധാനമന്ത്രി മോദി കൂട്ടിച്ചേർത്തു.

അതിനിടെ ബീഹാറിൽ എൻഡിഎ വീണ്ടും സർക്കാർ രൂപീകരിക്കുമെന്ന് അനുമാനിക്കുമ്പോൾ, സഖ്യ പങ്കാളികൾക്ക് നന്ദി അറിയിച്ച മുഖ്യമന്ത്രി നിതീഷ് കുമാർ, "വമ്പിച്ച ഭൂരിപക്ഷം" സഖ്യത്തിന്റെ "ഐക്യത്തെ" പ്രതിഫലിപ്പിക്കുന്നുവെന്ന് ഊന്നിപ്പറഞ്ഞു. എക്‌സിലെ ഒരു പോസ്റ്റിൽ നിതീഷ് വോട്ടർമാർക്ക് നന്ദി പറയുകയും പ്രധാനമന്ത്രി നരേന്ദ്ര മോദി, ലോക് ജനശക്തി പാർട്ടി (രാം വിലാസ്), രാഷ്ട്രീയ ലോക് മോർച്ച, ഹിന്ദുസ്ഥാനി അവാം മോർച്ച എന്നിവരോട് നന്ദി അറിയിക്കുകയും ചെയ്തു. എല്ലാ എൻ‌ഡി‌എ അംഗങ്ങളുടെയും പിന്തുണയോടെ ബീഹാർ ഇപ്പോൾ കൂടുതൽ പുരോഗമിക്കുമെന്ന് അദ്ദേഹം ഉറപ്പിച്ചു പറഞ്ഞു.