സംഗീതാർച്ചനയ്ക്ക് യേശുദാസ് അമേരിക്കയിൽ നിന്ന് വീഡിയോ കാളിൽ ആശംസ നേർന്നു.

​ഗാനഗന്ധർവൻ കെ.ജെ.യേശുദാസിന്റെ 86-ാം ജന്മദിനത്തിൽ കൊല്ലൂർ മൂകാംബികയ്ക്ക് മുന്നിൽ അവതരിപ്പിച്ച ഉദയാസ്തമയ സംഗീതാർച്ചനയിൽ പങ്കെടുത്ത് മകൻ വിജയ് യേശുദാസ്.

തന്റെ ഇഷ്ടദേവതാ സന്നിധിയിൽ നടന്ന സംഗീതാർച്ചനയ്ക്ക് യേശുദാസ് അമേരിക്കയിൽ നിന്ന് വീഡിയോ കാളിൽ ആശംസ നേർന്നു. സംഗീതരത്നം ഡോ. കാഞ്ഞങ്ങാട് രാമചന്ദ്രന്റെ നേതൃത്വത്തിലാണ് സംഗീതാർച്ചന നടത്തിയത്. യേശുദാസിന്റെ ഷഷ്ടിപൂർത്തി മുതൽ കാഞ്ഞങ്ങാട് രാമചന്ദ്രന്റെ നേതൃത്വത്തിലുള്ള മൂകാംബികാ സംഗീതാർച്ചന സമിതി ഉദയാസ്തമയ സംഗീതാരാധന നടത്തിവരുന്നു.

വിജയ് കീർത്തനം ആലപിക്കുന്നതിനിടയിലാണ് യേശുദാസ് വീഡിയോ കാളിലെത്തിയത്. 'അമ്മേ മൂകാംബികേ..." എന്ന പ്രാർത്ഥനയോടെ സംസാരിച്ചു തുടങ്ങിയ അദ്ദേഹം, 'അമ്മ അനുഗ്രഹിക്കട്ടെ" എന്നും ആശംസിച്ചു. സംഗീതാർച്ചന നടത്തുന്ന കാഞ്ഞങ്ങാട് രാമചന്ദ്രനും സൗപർണികാമൃതം പുരസ്കാരത്തിന് അർഹനായ ഗാനരചയിതാവ് ആർ.കെ.ദാമോദരനും അദ്ദേഹം ഭാവുകങ്ങൾ നേരുകയും ചെയ്തു.

കേരളത്തിന്റെ വിവിധ ഭാഗങ്ങളിൽ നിന്നെത്തിയ നൂറിലേറെ സംഗീതജ്ഞരാണ് ഇക്കുറി വാഗ്ദേവിയുടെ മുന്നിൽ ഗാനഗന്ധർവന്റെ ആയുരാരോഗ്യത്തിനായുള്ള സംഗീതാർച്ചനയിൽ പങ്കെടുത്തത്.

പിറന്നാൾ ദിനത്തിൽ യേശുദാസിനായി മൂകാംബികാ ക്ഷേത്രത്തിൽ മകൻ വിജയ് യേശുദാസ് പ്രത്യേക പൂജ നടത്തി. വെള്ളിയാഴ്ച തന്നെ വിജയ് കൊല്ലൂരിൽ എത്തിയിരുന്നു. യേശുദാസിന്റെ സുഹൃത്തുക്കളായ ആർ.കെ.ദാമോദരൻ, ഡോ. സി.എം.രാധാകൃഷ്ണൻ എന്നിവരും കൂടെയുണ്ടായിരുന്നു,