മമതയ്ക്കെതിരെ 100 കോടിയുടെ മാനനഷ്ടക്കേസ് ഫയല് ചെയ്ത് സുവേന്ദു അധികാരി
കല്ക്കരി കുംഭകോണത്തില് തനിക്ക് പങ്കുണ്ടെന്ന ആരോപണം ഉന്നയിച്ച മുഖ്യമന്ത്രി മമതാ ബാനര്ജിക്കെതിരെ 100 കോടി രൂപയുടെ മാനനഷ്ടക്കേസ് ഫയല് ചെയ്ത് പ്രതിപക്ഷ നേതാവ് സുവേന്ദു അധികാരി. തന്റെ ഔദ്യോഗിക സോഷ്യല് മീഡിയ അക്കൗണ്ടിലൂടെയാണ് സുവേന്ദു അധികാരി ഈ വിവരം പുറത്തുവിട്ടത്.
അപകീര്ത്തികരമായ പരാമര്ശങ്ങള് പിന്വലിക്കണമെന്ന് ആവശ്യപ്പെട്ട് സുവേന്ദു അധികാരി നേരത്തെ മമതാ ബാനര്ജിക്ക് വക്കീല് നോട്ടീസ് അയച്ചിരുന്നു. എന്നാല് നിശ്ചിത സമയപരിധിക്കുള്ളില് മറുപടി ലഭിക്കാത്ത സാഹചര്യത്തിലാണ് ആലിപ്പൂര് സിവില് ജഡ്ജി കോടതിയെ സമീപിച്ചതെന്ന് അദ്ദേഹം വ്യക്തമാക്കി. തനിക്കെതിരെ ഉന്നയിച്ച ആരോപണങ്ങള് വസ്തുതയില്ലാത്തതാണെന്നും രാഷ്ട്രീയ പ്രേരിതമാണെന്നുമാണ് അദ്ദേഹത്തിന്റെ വാദം. എക്സില് പങ്കുവെച്ച കുറിപ്പിലൂടെ കടുത്ത ഭാഷയിലാണ് സുവേന്ദു അധികാരി മുഖ്യമന്ത്രിയെ വിമര്ശിച്ചത്.
'ബഹുമാനപ്പെട്ട മമതാ ബാനര്ജി, നിങ്ങള് പ്രശ്നങ്ങളില് നിന്നും ജനങ്ങളില് നിന്നും ഒളിച്ചോടുമ്പോള്, ഞാന് എന്റെ പ്രതിബദ്ധതകള് പാലിക്കുന്നു. കല്ക്കരി കുംഭകോണത്തില് എനിക്ക് പങ്കുണ്ടെന്ന നിങ്ങളുടെ ആരോപണങ്ങളോട് മൗനം പാലിക്കുന്നത് നിങ്ങള്ക്ക് ഗുണം ചെയ്യില്ല.'എന്ന് അദ്ദേഹം കുറിച്ചു.
തന്റെ അഭിഭാഷകരുമായി എത്രയും പെട്ടെന്ന് ബന്ധപ്പെടാന് മമതയ്ക്ക് അദ്ദേഹം മുന്നറിയിപ്പ് നല്കി. കോടതി വിധി അനുകൂലമായാല് ലഭിക്കുന്ന 100 കോടി രൂപയുടെ നഷ്ടപരിഹാരത്തുക ജീവകാരുണ്യ പ്രവര്ത്തനങ്ങള്ക്കായി നല്കുമെന്നും അധികാരി അറിയിച്ചിട്ടുണ്ട്.
https://www.facebook.com/Malayalivartha
