ജമ്മു കശ്മീരിലെ കിഷ്ത്വാറിൽ ഭീകരരും സുരക്ഷാസേനയും തമ്മിൽ ഏറ്റുമുട്ടൽ. കിഷ്ത്വാറിലെ സിങ്‌പോര മേഖലയിലാണ് മൂന്ന് ഭീകരരെ സൈന്യം വളഞ്ഞിരിക്കുന്നത്.

റിപ്പബ്ലിക് ദിന ആഘോഷങ്ങളോടനുബന്ധിച്ച് അതിർത്തി മേഖലകളിൽ സുരക്ഷാ വിന്യാസവും നിരീക്ഷണവും ശക്തമാക്കിയിട്ടുണ്ടായിരുന്നു. ഇതിന്റെ ഭാഗമായി നടത്തിയ പരിശോധനയിലാണ് ഭീകരരുടെ സാന്നിധ്യം കണ്ടെത്തിയതും തുടർന്ന് സൈന്യം പ്രദേശം വളഞ്ഞതും. നിലവിൽ സൈന്യത്തിന്റെ പാരാ സ്പെഷ്യൽ ഫോഴ്‌സിലെ സൈനികരാണ് ഈ മേഖലയിൽ ഊർജ്ജിതമായ തിരച്ചിൽ നടത്തുന്നത്. പ്രാഥമിക വിവരങ്ങൾ അനുസരിച്ച് ജെയ്‌ഷെ മുഹമ്മദുമായി ബന്ധപ്പെട്ട ഭീകരരാണ് ഈ മേഖലയിൽ കുടുങ്ങിക്കിടക്കുന്നത്.

ഭീകരർക്ക് പ്രദേശം വിട്ടു പുറത്തുപോകാനായി കഴിയാത്ത രീതിയിൽ എല്ലാ വഴികളും അടച്ച് പഴുതടച്ചുള്ള പരിശോധനയാണ് സൈന്യം നടത്തുന്നത്.

നിലവിൽ സൈനികരുടെ ഭാഗത്ത് പരിക്കുകളോ മറ്റ് നാശനഷ്ടങ്ങളോ ഉള്ളതായി റിപ്പോർട്ടുകളില്ല. ഓപ്പറേഷൻ പൂർത്തിയായ ശേഷം മാത്രമേ സംഭവത്തെക്കുറിച്ച് സൈന്യത്തിന്റെ ഔദ്യോഗിക വിശദീകരണം ലഭ്യമാകൂ.