ആഴ്ചയിൽ അഞ്ച് പ്രവൃത്തി ദിവസമാക്കണം എന്നാവശ്യപ്പെട്ട് പൊതുമേഖല ബാങ്ക് ജീവനക്കാർ ഇന്ന് ​ പണിമുടക്കും. യുണൈറ്റഡ് ഫോറം ഒഫ് ബാങ്ക് യൂണിയൻസിന്റെ (യു.എഫ്.ബി.യു)​ നേതൃത്വത്തിലാണ് പണിമുടക്ക്. ഇതിന്റെ പശ്ചാത്തലത്തിൽ പൊതുമേഖലാ ബാങ്കുകളുടെ പ്രവർത്തനം ഇന്ന്  തടസപ്പെടാൻ സാദ്ധ്യതയേറെയാണ്.

ജീവനക്കാരുടെ 9 സംഘടനകളുടെ കൂട്ടായ്മയാണ് യു.എഫ്.ബി.യു. ജനുവരി 23ന് ലേബർ കമ്മിഷണറുമായി നടത്തിയ ചർച്ച പരാജയപ്പെട്ടതിനെ തുടർന്നാണ് പണിമുടക്ക് പ്രഖ്യാപിച്ചത്.

നിലവിൽ രണ്ടാമത്തെയും നാലാമത്തെയും ശനിയാഴ്ച ബാങ്ക് ജീവനക്കാർക്ക് അവധിയാണ്. ഇത് എല്ലാ ശനിയും ആക്കണമെന്നാണ് സംഘടനകൾ ആവശ്യപ്പെടുന്നത്. ഇതിനായി ദിവസവും 40 മിനിട്ട് അധികം ജോലി ചെയ്യാമെന്നും സംഘടനകൾ അറിയിച്ചിട്ടുണ്ടായിരുന്നു. ഏറെ നാളായിട്ടും ആവശ്യങ്ങൾ അംഗീകരിക്കാത്തതിനാലാണ് പണിമുടക്കിലേക്ക് പോകേണ്ടി വന്നതെന്ന് യൂണിയൻ നേതൃത്വം പറയുന്നു.

പണം നിക്ഷേപിക്കൽ,​ പിൻവലിക്കൽ,​ ചെക്കുകൾ പാസാക്കൽ,​ ഭരണപരമായ നടപടികൾ തുടങ്ങിയവ നാളെ തടസപ്പെട്ടേക്കും. അതേസമയം സ്വകാര്യ ബാങ്കുകളുടെ പ്രവർത്തനങ്ങളെ പണിമുടക്ക് ബാധിക്കുകയില്ല.