നിരോധനം ലംഘിച്ച് പ്രാവുകള്‍ക്ക് തീറ്റ കൊടുത്തതിന് ഇന്ത്യക്കാരിക്ക് സിംഗപ്പൂര്‍ കോടതി രണ്ട് ലക്ഷം രൂപ പിഴ ചുമത്തി. സിംഗപ്പൂരില്‍, അനിമല്‍സ് ആന്‍ഡ് ബേര്‍ഡ്‌സ് ആക്ട് പ്രകാരം, പ്രാവുകളെ വളര്‍ത്തുന്നതിനോ പ്രജനനം നടത്തുന്നതിനോ അഭയം നല്‍കുന്നതിനോ ലൈസന്‍സ് ആവശ്യമാണ്. കഴിഞ്ഞ 6 മാസത്തിനിടെ 9 തവണ ഇവര്‍ പ്രാവുകള്‍ക്ക് തീറ്റ നല്‍കിയതായി നാഷണല്‍ പാര്‍ക്‌സ് ബോര്‍ഡ് കണ്ടെത്തി.

സിംഗപ്പൂരിലെ ടോ പായോ ഹൗസിംഗ് എസ്‌റ്റേറ്റില്‍ താമസിക്കുന്ന സണ്‍മുഖനാഥന്‍ ഷംലയ്ക്കാണ് 3,200 സിംഗപ്പൂര്‍ ഡോളര്‍ (ഏകദേശം 2,27,556 ഇന്ത്യന്‍ രൂപ) പിഴ ചുമത്തിയത്. ആറ് മാസത്തിനിടയില്‍ ഒമ്പത് തവണ ഇവര്‍ പ്രാവുകള്‍ക്ക് തീറ്റ നല്‍കിയെന്ന് കണ്ടെത്തിയതിനെ തുടര്‍ന്നാണ് സിംഗപ്പൂര്‍ വന്യജീവി നിയമപ്രകാരം വയോധികയ്ക്ക് പിഴ ചുമത്തിയിരിക്കുന്നത്.

സിംഗപ്പൂര്‍ വൈല്‍ഡ് ലൈഫ് ആക്ട് പ്രകാരമാണ് ഇവര്‍ക്കെതിരെ നടപടിയെടുത്തത്. മുന്‍പും ഇതേ കുറ്റത്തിന് ഇവര്‍ക്ക് 1,200 ഡോളര്‍ പിഴ ശിക്ഷ ലഭിച്ചിരുന്നു. ഇനി ആവര്‍ത്തിക്കില്ല എന്ന് കോടതിയില്‍ ഉറപ്പ് നല്‍കിയിരുന്നെങ്കിലും ഒരു മാസത്തിനുള്ളില്‍ തന്നെ ഇവര്‍ വീണ്ടും പ്രാവുകള്‍ക്ക് തീറ്റ നല്‍കി തുടങ്ങിയതായി പ്രോസിക്യൂട്ടര്‍ ചൂണ്ടിക്കാട്ടി.

നിയമത്തോടുള്ള നിരന്തരമായ അവഗണനയാണ് പ്രതി കാണിച്ചതെന്ന് കോടതി നിരീക്ഷിച്ചു. പ്രതിക്ക് 71 വയസ്സ് പ്രായം പരിഗണിക്കുമ്പോഴും, ശിക്ഷാ നടപടി എന്ന നിലയില്‍ വലിയൊരു തുക പിഴയായി നല്‍കണമെന്നും കോടതി വ്യക്തമാക്കി. തനിക്ക് ജോലിയില്ലെന്നും സാമ്പത്തിക ബുദ്ധിമുട്ടുണ്ടെന്നും അതിനാല്‍ പിഴ കുറയ്ക്കണമെന്നും ഷംല കോടതിയില്‍ അപേക്ഷിച്ചെങ്കിലും അത് അംഗീകരിക്കപ്പെട്ടില്ല. തുടര്‍ന്ന് ശിക്ഷാ തുക ഉടന്‍ അടയ്ക്കാന്‍ ഇവര്‍ സമ്മതിച്ചു. സിംഗപ്പൂരിലെ പൊതുജനാരോഗ്യം മുന്‍നിര്‍ത്തി പ്രാവുകളെ തീറ്റുന്നത് കര്‍ശനമായി നിരോധിച്ചിട്ടുള്ള കാര്യമാണ്.