കോണ്‍ഫിഡന്റ് ഗ്രൂപ്പിന്റെ പ്രവര്‍ത്തനങ്ങള്‍ കൃത്യമായി മുന്നോട്ട് പോകുമെന്ന് ആത്മഹത്യ ചെയ്ത വ്യവസായി ഡോ. റോയ് സി ജെയുടെ മകന്‍ രോഹിത് റോയ്. കോണ്‍ഫിഡന്റ് ഗ്രൂപ്പിന്റെ ക്ഷേമപ്രവര്‍ത്തനങ്ങള്‍ മുടങ്ങാതെ മുന്നോട്ട് പോകും. ഇതുവരെ കൂടെ നിന്നവരെയെല്ലാം ചേര്‍ത്ത് നിര്‍ത്തുമെന്നും രോഹിത് റോയ്. സമൂഹമാധ്യമത്തിലൂടെയാണ് രോഹിത് റോയിയുടെ പ്രതികരണം.

കോണ്‍ഫിഡന്റ് ഗ്രൂപ്പ് തന്റേതല്ലെന്നും നമ്മുടേതാണെന്നും പിതാവ് ഡോ. റോയ് സിജെ എപ്പോഴും പറയുമായിരുന്നു. അതേ അര്‍ത്ഥത്തില്‍ തന്നെ കോണ്‍ഫിഡന്റ് ഗ്രൂപ്പ് മുന്നോട്ടുപോകുമെന്ന് രോഹിത് റോയ് പറഞ്ഞു. കമ്പനിയുടെ എല്ലാ പ്രോജക്ടുകളും മുന്‍നിശ്ചയിച്ച പ്രകാരം തന്നെ തുടരുമെന്നും കേരളത്തിലെ ചുമതലയുള്ള ജോസഫും റോയിയുടെ മകന്‍ രോഹിത്തും ചേര്‍ന്ന് ഇനി കമ്പനിയെ നയിക്കുമെന്നും സഹോദരന്‍ സി ജെ ബാബു നേരത്തെ അറിയിച്ചിരുന്നു.

ആത്മഹത്യയിലേക്ക് ഡോ റോയിയെ നയിച്ചത് എന്തെന്ന് ചോദ്യത്തിന് പൂര്‍ണ്ണമായുള്ള ഉത്തരം ഇനിയും അന്വേഷണസംഘത്തിന് കിട്ടിയിട്ടില്ല.അതിനുപുറമെ സാമ്പത്തിക ഇടപാടുകളും ആയി ബന്ധപ്പെട്ട വിവരങ്ങളും അന്വേഷണസംഘം പരിശോധിച്ചു വരികയാണ്. മൊബൈല്‍ ഫോണുകള്‍ രണ്ടും ലോക്ക് ചെയ്ത അവസ്ഥയിലായിതിനാല്‍ ഇവയുടെ ഫോറന്‍സിക് പരിശോധന ഫലം നിര്‍ണായകമാണ്. മനസിക സമ്മര്‍ദ്ദം കുറയ്ക്കാന്‍ ഡോ റോയി ചികിത്സ തേടിയിരുന്നോ എന്നും പോലീസ് അന്വേഷിക്കുന്നു.