സമഗ്ര വോട്ടര്‍ പട്ടിക പരിഷ്‌കരണത്തിന്റെ (എസ്‌ഐആര്‍) നടപടികള്‍ തടസ്സപ്പെടുത്താന്‍ പാടില്ലെന്ന് സുപ്രീം കോടതി സംസ്ഥാന സര്‍ക്കാരുകള്‍ക്കു മുന്നറിയിപ്പ് നല്‍കി. ബംഗാളിലെ എസ്‌ഐആര്‍ നടപടികള്‍ പൂര്‍ത്തിയാക്കാനുള്ള സമയപരിധി ഫെബ്രുവരി 14ല്‍ നിന്ന് ഒരാഴ്ച കൂടി കോടതി നീട്ടി നല്‍കി.

എസ്‌ഐആര്‍ നടപടികള്‍ക്ക് യാതൊരുവിധ തടസ്സങ്ങളും അനുവദിക്കില്ലെന്നും ഇത് എല്ലാ സംസ്ഥാനങ്ങളും മനസ്സിലാക്കണമെന്നും ചീഫ് ജസ്റ്റിസ് സൂര്യകാന്ത് വ്യക്തമാക്കി. ബംഗാളിലെ വോട്ടര്‍ പട്ടിക പരിഷ്‌കരണത്തെ ചോദ്യം ചെയ്ത് മുഖ്യമന്ത്രി മമത ബാനര്‍ജി സമര്‍പ്പിച്ച ഹര്‍ജിയില്‍ തിരഞ്ഞെടുപ്പ് കമ്മിഷന്റെ മറുപടി കേള്‍ക്കുന്നതിനിടയിലായിരുന്നു കോടതിയുടെ പരാമര്‍ശം. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വിപുല്‍ എം.പഞ്ചോളി എന്നിവരടങ്ങിയ ബെഞ്ചാണ് കേസ് പരിഗണിക്കുന്നത്.

പശ്ചിമ ബംഗാളിലെ വോട്ടര്‍ പട്ടിക പരിഷ്‌കരണവുമായി ബന്ധപ്പെട്ട് ആയിരക്കണക്കിന് സൂക്ഷ്മ നിരീക്ഷകരെ വിന്യസിച്ചതിനെയാണ് മമത ബാനര്‍ജി കോടതിയില്‍ ചോദ്യം ചെയ്തത്. നടപടിക്രമങ്ങളില്‍ ക്രമക്കേടുണ്ടെന്നും അവര്‍ ആരോപിച്ചിരുന്നു. തിരഞ്ഞെടുപ്പ് കമ്മിഷന്റെ നടപടികളെ ന്യായീകരിച്ച കോടതി, സംസ്ഥാന സര്‍ക്കാര്‍ പൂര്‍ണമായി സഹകരിക്കുന്നില്ലെന്ന് കുറ്റപ്പെടുത്തി. സൂക്ഷ്മ നിരീക്ഷകര്‍ക്കു പകരം നിയോഗിക്കേണ്ട 8,000ല്‍ അധികം ഗ്രൂപ്പ് ബി ഓഫിസര്‍മാരുടെ പേരുകള്‍ അയയ്ക്കാന്‍ എന്തുകൊണ്ട് വൈകിയെന്ന് കോടതി ചോദിച്ചു.

ആവശ്യമായ ഉദ്യോഗസ്ഥരുടെ വിവരങ്ങള്‍ തേടി 5 തവണ കത്തയച്ചിട്ടും സംസ്ഥാന സര്‍ക്കാര്‍ മറുപടി നല്‍കിയില്ലെന്നും അതുകൊണ്ടാണ് സൂക്ഷ്മ നിരീക്ഷകരെ നിയോഗിക്കേണ്ടി വന്നതെന്നും തിരഞ്ഞെടുപ്പ് കമ്മിഷന്‍ കോടതിയെ അറിയിച്ചു. വോട്ടര്‍ പട്ടികയുടെ സുതാര്യത ഉറപ്പാക്കാന്‍ കമ്മിഷന് ഭരണഘടനാപരമായ അധികാരമുണ്ടെന്നും അവര്‍ വാദിച്ചു. ബംഗാള്‍ സര്‍ക്കാരിനു വേണ്ടി ഹാജരായ അഭിഭാഷകന്‍ അഭിഷേക് മനു സിങ്‌വി തിരഞ്ഞെടുപ്പ് കമ്മിഷന്റെ വാദങ്ങളെ എതിര്‍ത്തു. ഗ്രൂപ്പ് ബി ഓഫിസര്‍മാരെ ആവശ്യപ്പെട്ട് കമ്മിഷന്‍ ഒരിക്കലും കത്തയച്ചിട്ടില്ലെന്ന് അദ്ദേഹം പറഞ്ഞു.