പാലക്കാടെത്തിയ ട്രെയിനിന്റെ പാഴ്സല് ബോഗിയില് നിന്ന് രണ്ട് ടണ് പഴകിയ മത്സ്യം ഉദ്യോഗസ്ഥര് പിടികൂടി
തമിഴ്നാട്ടില് നിന്ന് ട്രെയിനില് പാലക്കാട്ടേയ്ക്കു വില്പനയ്ക്കെത്തിച്ച രണ്ട് ടണ് പഴകിയ മത്സ്യം ഉദ്യോഗസ്ഥര് പിടികൂടി. ഒലവക്കോട് റെയില്വേ ജംഗ്ഷനില് ആര്പിഎഫും റെയില്വേ പൊലീസും ചേര്ന്നാണ് പഴകിയ മത്സ്യം പിടികൂടിയത്. തമിഴ്നാട് ആരോഗ്യവകുപ്പ് നാഗര്കോവില് നിന്ന് പിടികൂടി തിരിച്ചയച്ച മത്സ്യമാണിതെന്നാണ് ഉദ്യോഗസ്ഥര് സംശയിക്കുന്നത്. ഇത് തെളിയിക്കുന്നതിനും പരിശോധനകള് നടത്തുന്നുണ്ട്.
ഇന്നലെ രാത്രി ഒമ്പതരയോടെ ഐലന്റ് എക്സ്പ്രസിലെ പാഴ്സല് ബോഗിയില് നിന്നാണ് മത്സ്യം പിടികൂടിയത്. 24 പെട്ടികളിലായാണ് മത്സ്യം സൂക്ഷിച്ചിരുന്നത്. ഇവയില് നിന്നും ദുര്ഗന്ധം പരക്കുന്നതായി അറിയിച്ചെങ്കിലും ആരോഗ്യ, ഭക്ഷ്യസുരക്ഷാ ഉദ്യോഗസ്ഥര് സ്ഥലത്തെത്തിയില്ലെന്ന് പൊലീസ് ആരോപിക്കുന്നു. ഇതോടെ പുലര്ച്ചവരെ പെട്ടികള്ക്ക് പൊലീസ് കാവല് നില്ക്കേണ്ടി വന്നു. ഉദ്യോഗസ്ഥരെത്തി പരിശോധന നടത്തിയാല് മാത്രമേ മത്സ്യത്തിന്റെ പഴക്കം സംബന്ധിച്ച കൂടുതല് വിവരങ്ങള് ലഭ്യമാകൂ.
ഭക്ഷ്യയോഗ്യമല്ലാത്ത പഴകിയ മത്സ്യം കടത്താന് ശ്രമിക്കുന്നുവെന്ന തമിഴ്നാട് ആര്പിഎഫ് ഇന്റലിജന്സിന്റെ രഹസ്യവിവരത്തെ തുടര്ന്നായിരുന്നു പരിശോധന. കഴിഞ്ഞ മാസവും ഇത്തരത്തില് ട്രെയിന് മാര്ഗം എത്തിച്ച പഴകിയ മത്സ്യം പൊലീസ് പിടികൂടിയിരുന്നു. ഇത്തരം മത്സ്യങ്ങളുടെ ദുര്ഗന്ധം രാസവസ്തുക്കള് ഉപയോഗിച്ച് മാറ്റി മാര്ക്കറ്റില് എത്തിക്കാനാകുമെന്ന് ഉദ്യോഗസ്ഥര് പറയുന്നു.
https://www.facebook.com/Malayalivartha
