ഉത്തര്‍പ്രദേശിലെ മധുരയില്‍ മൂന്ന് കുട്ടികള്‍ ഉള്‍പ്പെടെ ഒരു കുടുംബത്തിലെ അഞ്ച് പേരെ മരിച്ച നിലയില്‍ കണ്ടെത്തി. പതിവ് പോലെ ഇന്ന് രാവിലെ കുട്ടികള്‍ കളിക്കാന്‍ പുറത്തിറങ്ങാത്തതിനെ തുടര്‍ന്ന് മനീഷ് കുമാറിന്റെ സഹോദരന്‍ നടത്തിയ തിരച്ചിലിലാണ് എല്ലാവരെയും വീടിനുള്ളില്‍ മരിച്ച നിലയില്‍ കണ്ടെത്തിയത്. ശേഷം സഹോദരനും നാട്ടുകാരും വാതില്‍ തകര്‍ത്ത് അകത്ത് കയറുകയായിരുന്നു. കര്‍ഷനായ മനീഷ് ജാദവ് (35), ഭാര്യ സീമ (32) പിന്നെ അവരുടെ മക്കളായ ഹണി (5), പ്രിയാന്‍ഷി (4), പങ്കജ് (2) എന്നിവരാണ് മരിച്ചത്.

ആദ്യം കൂട്ടആത്മഹത്യ ആയിട്ടായിരുന്നു പോലീസ് കരുതിയത്. എന്നാല്‍ മനീഷ് കുട്ടികളെ കഴുത്തു ഞെരിച്ചു കൊലപ്പെടുത്തുകയും പിന്നീട് ഭാര്യയെ തലക്കടിച്ചു കൊലപ്പെടുത്തുകയുമായിരുന്നു. എല്ലാവരുടെയും മരണം ഉറപ്പാക്കിയ ശേഷം മനീഷ് വൈദ്യുതാഘാതമേറ്റു സ്വയം മരിക്കുകയുമായിരുന്നെന്നാണ് പോലീസ് നിഗമനം.

സംഭവ സ്ഥലത്തു നിന്നു ആത്മഹത്യ കുറിപ്പും വിഡിയോയും പോലീസുകാര്‍ക്ക് ലഭിച്ചു. വീഡിയോയില്‍, താന്‍ ആത്മഹത്യ ചെയ്യുകയാണെന്നും ഇതിന് ആരും ഉത്തരവാദികളല്ലെന്നും അയാള്‍ പറയുന്നത് കാണാം. മുറിയുടെ ചുമരില്‍ സമാനമായ അതേ പ്രസ്താവന ആവര്‍ത്തിക്കുന്ന ഒരു കൈയെഴുത്ത് കുറിപ്പും കണ്ടെത്തി.

കഴിഞ്ഞ മൂന്ന് വര്‍ഷമായി മനീഷ് മന്ത്രവാദത്തില്‍ ഏര്‍പ്പെട്ടിരുന്നതായും അടുത്തിടെ ഏകദേശം 12.5 ലക്ഷം രൂപ വിലമതിക്കുന്ന ഭൂമി വിറ്റതായും ഉദ്യോഗസ്ഥര്‍ പറഞ്ഞു, എന്നാല്‍ ഈ കാര്യങ്ങള്‍ സംഭവവുമായി ബന്ധപ്പെട്ടിട്ടുണ്ടോ എന്ന് ഇതുവരെ വ്യക്തമായിട്ടില്ല. മൃതദേഹങ്ങള്‍ പോസ്റ്റ്‌മോര്‍ട്ടത്തിനായി അയച്ചിട്ടുണ്ട് കൂടാതെ ഫോറന്‍സിക് സംഘങ്ങള്‍ സംഭവസ്ഥലത്ത് നിന്ന് തെളിവുകള്‍ ശേഖരിച്ചിട്ടുണ്ട്. പോസ്റ്റ്‌മോര്‍ട്ടത്തിന്റെയും ഫോറന്‍സിക് റിപ്പോര്‍ട്ടുകളുടെയും ഫലങ്ങള്‍ ലഭിച്ചതിന് ശേഷം മാത്രമേ സംഭവത്തിന്റെ വിശദാംശങ്ങള്‍ പറയാന്‍ സാധിക്കു. പോലീസ് അന്വേഷണം ആരംഭിച്ചിരിക്കുകയാണ്.