22 കാരനായ വിദ്യാര്‍ഥിയെ തട്ടിക്കൊണ്ടുപോയി ബലംപ്രയോഗിച്ച് വിവാഹം കഴിപ്പിച്ചതായി പരാതി. ബിഹാറിലെ സമസ്തിപൂര്‍ ജില്ലയില്‍ ഫെബ്രുവരി 7 നാണ് സംഭവം. നിതീഷ് കുമാര്‍ എന്ന വിദ്യാര്‍ഥിയെ സുഹൃത്തുക്കള്‍ ലഹരി കലര്‍ന്ന വെള്ളം നല്‍കി മയക്കിയ ശേഷം കടത്തിക്കൊണ്ടുപോവുകയായിരുന്നു. തുടര്‍ന്ന് അടുത്തുള്ള ഗ്രാമത്തിലെ പെണ്‍കുട്ടിയെ കൊണ്ട് ബലമായി വിവാഹം കഴിപ്പിച്ചു. വിദ്യാര്‍ഥിയുടെ പരാതിയില്‍ പൊലീസ് കേസെടുത്തു. തന്നെ ബന്ദിയാക്കിയ ശേഷമാണ് വിവാഹം നടത്തിയതെന്നാണ് 22 കാരന്‍ പൊലീസിനു നല്‍കിയ പരാതിയില്‍ ആരോപിക്കുന്നത്.

നേരത്തെ മകനെ കാണുന്നില്ലെന്നു കാട്ടി നിതീഷിന്റെ കുടുംബവും പരാതി നല്‍കിയിരുന്നു. പൊലീസ് അന്വേഷണത്തിലാണ് നിതീഷ് തടവില്‍നിന്നും രക്ഷപ്പെട്ടത്. പട്ടോരി പോലീസ് സ്‌റ്റേഷന്‍ പരിധിയിലുള്ള ചക്രജ് അലി ഗ്രാമത്തിലെ താമസക്കാരനായ നിതീഷ്, കുന്ദന്‍ രാജ്വന്‍ഷി, രാഹുല്‍ എന്നിവരാണ് നിതീഷിനെ തട്ടിക്കൊണ്ടുപോയതെന്നാണ് സൂചന.സംഭവത്തില്‍ പൊലീസ് ആരെയും അറസ്റ്റ് ചെയ്തിട്ടില്ല.

നിതീഷ് കുമാറിന്റെ വിവാഹത്തിന്റെയും തടവില്‍ പാര്‍പ്പിച്ചിരിക്കുന്നതിന്റെയും വിഡിയോ സുഹൃത്തുക്കള്‍ സമൂഹ മാധ്യമങ്ങളിലൂടെ പ്രചരിപ്പിച്ചിരുന്നു. വിവാഹത്തിനു ശേഷവും നിതീഷ് കുമാറിനെ ഇവര്‍ രണ്ടു ദിവസത്തോളം പൂട്ടിയിട്ടു. ഒടുവില്‍ ബോധം വന്നു നിലവിളിച്ചപ്പോള്‍ പെണ്‍കുട്ടികളുടെ വീട്ടുകാര്‍ വിഡിയോ കാണിച്ച് ഭീഷണിപ്പെടുത്തിയെന്നാണ് യുവാവിന്റെ പരാതി. തന്നെ തട്ടിണ്ടുപോയവര്‍ മയക്കമരുന്ന് നല്‍കിയെന്നും ഒരു വീഡിയോ ബലമായി എടുത്തെന്നും നിതീഷ് ആരോപിച്ചു. സോഷ്യല്‍ മീഡിയയില്‍ പ്രചരിച്ച വിവാഹ ചടങ്ങിന്റെ വീഡിയോയില്‍ നിതീഷ് തലകറങ്ങി വീഴുന്നതും മാല മാറ്റുന്ന ചടങ്ങിനിടെ കൈകള്‍ ഉയര്‍ത്താന്‍ ബുദ്ധിമുട്ടുന്നതും കാണാം.