ബെംഗളൂരുവില്‍ പ്രീയൂണിവേഴ്‌സിറ്റി വിദ്യാര്‍ഥികള്‍ സഞ്ചരിച്ച കാര്‍ അപകടത്തില്‍പെടാന്‍ കാരണം അമിതവേഗതയാണെന്ന് പ്രാധമിക റിപ്പോര്‍ട്ട്. കാര്‍ ബൈക്കിലും ലോറിയിലും ഇടിച്ചുണ്ടായ അപകടത്തില്‍ 2 മലയാളികള്‍ ഉള്‍പ്പെടെ 7 പേര്‍ മരിച്ചിരുന്നു. ഏകദേശം 150-160 കിലോമീറ്റര്‍ വേഗത്തിലാണ് കാര്‍ സഞ്ചരിച്ചതെന്നാണ് കണ്ടെത്തല്‍. കാറില്‍ യാത്ര ചെയ്ത 6 വിദ്യാര്‍ഥികളും ബൈക്ക് യാത്രക്കാരനുമാണ് മരിച്ചത്.

തനിസന്ദ്ര ഭാരതീയ സിറ്റിക്കു സമീപം താമസിക്കുന്ന വര്‍ക്കല ചെറുന്നിയൂര്‍ ചെക്കാല വിളാകത്തില്‍ (ശ്രീവിലാസം) ടി.എസ്.അജിത്തിന്റെയും സ്മിത നായരുടെയും (മായ) മകന്‍ അശ്വിന്‍ നായര്‍, പത്തനംതിട്ട മല്ലപ്പള്ളി ആനിക്കാട് ഏണാട്ടു തോമസ് ജോര്‍ജ് – പേള്‍ ജോര്‍ജ് ദമ്പതികളുടെ മകന്‍ ഈതന്‍ ജോണ്‍ ജോര്‍ജ്, കൊത്തന്നൂര്‍ സ്വദേശികളായ അര്‍ഹാന്‍ ഷെരീഫ്, അയാന്‍ അലി, ഫര്‍ഹാന്‍, ഭരത് (എല്ലാവരും 17 വയസ്സ്) ബൈക്ക് യാത്രക്കാരന്‍ ഗഗന്‍ (26) എന്നിവരാണു മരിച്ചത്. സാറ്റലൈറ്റ് ടൗണ്‍ റിങ് റോഡില്‍ ഹൊസ്‌കോട്ടെ–ദൊബാസ്‌പേട്ട് ഇടനാഴിയിലെ സത്യവാരയില്‍ ഇന്നലെ പുലര്‍ച്ചെ 5.30നായിരുന്നു അപകടം.

ഹോസ്‌കോട്ടില്‍ നിന്ന് ദേവനഹള്ളി ഭാഗത്തേക്ക് പോവുകയായിരുന്നു വിദ്യാര്‍ഥികള്‍. അയാന്‍ ആണ് വാഹനം ഓടിച്ചിരുന്നത്. നിയന്ത്രണം വിട്ട കാര്‍ ആദ്യം ഗഗന്‍ സഞ്ചരിച്ചിരുന്ന ബൈക്കില്‍ ഇടിച്ചു. ഇടിയുടെ ആഘാതത്തില്‍ തെറിച്ചു വീണ ഗഗന്‍ സംഭവസ്ഥലത്തുതന്നെ മരിച്ചു. തുടര്‍ന്ന് മുന്നില്‍ പോവുകയായിരുന്ന ട്രക്കിന്റെ പിന്നില്‍ ഇടിച്ചു. ആക്‌സില്‍ വേര്‍പെട്ട ട്രക്ക് നിയന്ത്രണം വിട്ട് സര്‍വീസ് റോഡിലേക്ക് മറിഞ്ഞു. ട്രക്ക് ഡ്രൈവര്‍ ബാലസുബ്രഹ്മണ്യത്തിന് (32) നിസ്സാര പരിക്കേറ്റു. ട്രക്കില്‍ ഇടിച്ച ശേഷം റോഡിലെ ക്രാഷ് ബാരിയറിലേക്ക് ഇടിച്ചുകയറിയ എസ്‌യുവി 150 മീറ്ററോളം ദൂരം അതില്‍ ഉരസിയാണ് നിന്നത്.

അയാന്‍ അലിയുടെ പിതാവിന്റെ കാറിലാണു സംഘം പോയത്. പ്രീയൂണിവേഴ്‌സിറ്റി വിദ്യാര്‍ഥികളായ ഇവര്‍ പത്താം ക്ലാസില്‍ ഒരുമിച്ചു പഠിച്ചവരാണ്. മൃതദേഹങ്ങള്‍ ഹോസ്‌കോട്ടെ എംവിജെ മെഡിക്കല്‍ കോളജ് ആശുപത്രിയില്‍ പോസ്റ്റ്‌മോര്‍ട്ടത്തിന് ശേഷം എഐകെഎംസിസി, ബാംഗ്ലൂര്‍ കേരളസമാജം, കേരളസമാജം ദൂരവാണിനഗര്‍ പ്രവര്‍ത്തകരുടെ സഹായത്തോടെ ബന്ധുക്കള്‍ക്ക് വിട്ടുകൊടുത്തു.