എ.ഐ വിപ്ളവത്തിനൊരുങ്ങി ഇന്ത്യ: രണ്ട് വര്ഷത്തിനുള്ളില് 20,000 കോടി ഡോളര് നിക്ഷേപമുണ്ടാകും
നിര്മ്മിത ബുദ്ധിയുടെ(എ.ഐ) അഞ്ച് പ്രധാന വിഭാഗങ്ങളിലായി രണ്ട് വര്ഷത്തിനുള്ളില് 20,000 കോടി ഡോളറിന്റെ(18.4 ലക്ഷം കോടി രൂപ) നിക്ഷേപം ആകര്ഷിക്കാനാണ് ലക്ഷ്യമെന്ന് കേന്ദ്ര ഐ.ടി മന്ത്രി അശ്വിനി വൈഷ്ണവ് പറഞ്ഞു. എ.ഐയുടെ വളര്ച്ചയിലും ഉത്തരവാദിത്ത ബാേധത്തോടെയുള്ള ഉപയോഗത്തിലും ആഗോള താത്പര്യമേറുകയാണെന്ന് ഇന്ത്യ എ.ഐ ഇംപാക്ട് ഉച്ചകോടിയോട് അനുബന്ധിച്ച പത്രസമ്മേളനത്തില് മന്ത്രി പറഞ്ഞു. പശ്ചാത്തല വികസനം മുതല് ഊര്ജം വരെയുള്ള എ.ഐ ഇക്കോസിസ്റ്റത്തില് വലിയ നിക്ഷേപ താത്പര്യമാണ് ലഭിക്കുന്നതെന്ന് അദ്ദേഹം കൂട്ടിച്ചേര്ത്തു.
ക്ലീന് എനര്ജിയുടെ ലഭ്യത ഉയര്ന്ന തലത്തിലായതിനാല് ഈ രംഗത്ത് ഇന്ത്യയ്ക്ക് വിപുലമായ സാദ്ധ്യതയാണുള്ളത്. പുതിയ സാങ്കേതികവിദ്യയുടെ പ്രയോജനങ്ങള് സമൂഹത്തിന് ലഭ്യമാക്കുന്നതിനൊപ്പം അവയുടെ അപകടങ്ങളെ നിയന്ത്രിക്കാനും സംവിധാനം ഒരുക്കും. എ.ഐ അധിഷ്ഠിത സാങ്കേതികവിദ്യകളിലേക്ക് മാറുന്നതിന് വ്യവസായ, അക്കാദമിക മേഖലകളുമായി യോജിച്ച് പ്രവര്ത്തിക്കുമെന്നും അശ്വിനി വൈഷ്ണവ് കൂട്ടിച്ചേര്ത്തു.
ഗവേഷണം, ഇന്നവേഷന്, കംപ്യൂട്ടിംഗ് ശേഷി വര്ദ്ധന തുടങ്ങിയവയില് ഊന്നല് നല്കി കേന്ദ്ര സര്ക്കാര് എ.ഐ മിഷന് 2.0 ഉടന് പ്രഖ്യാപിക്കും. കംപ്യൂട്ടിംഗ് ശേഷി ഉയര്ത്തുന്നതിനായി 20,000 പുതിയ ഗ്രാഫിക് പ്രോസസിംഗ് യൂണിറ്റുകള്(ജി.പി.യു) ആരംഭിക്കും. നിലവില് രാജ്യത്ത് 38,000 ജി.പി.യുകളാണുള്ളത്.
https://www.facebook.com/Malayalivartha
