തമിഴ്‌നാട്ടില്‍ വിജയ് സര്‍ക്കാര്‍ രൂപീകരണത്തിനുള്ള നീക്കങ്ങളില്‍ സസ്‌പെന്‍സ് അവസാനിക്കുന്നില്ല. 108 സീറ്റില്‍ നിന്ന് 120 എം എല്‍ എമാരുടെ പിന്തുണ ഉറപ്പാക്കിയ വിജയ്ക്ക് മുന്നില്‍ ഗവര്‍ണര്‍ രാജേന്ദ്ര അര്‍ലേക്കര്‍ വലിയ വെല്ലുവിളിയായി നിലയുറപ്പിച്ചിരിക്കുകയാണ്. ആദ്യം മുതലേ എം എല്‍ എമാരുടെ എണ്ണത്തിലെ കുറവ് ചൂണ്ടിക്കാട്ടി സര്‍ക്കാര്‍ രൂപീകരണത്തില്‍ ഉടക്കിട്ടിരുന്ന ഗവര്‍ണര്‍, ഇപ്പോള്‍ കൂടിക്കാഴ്ചക്ക് സമയം നല്‍കുന്നില്ലെന്നാണ് വ്യക്തമാകുന്നത്. 120 എം എല്‍ എമാരുടെയും പിന്തുണ കത്ത് ലഭിച്ചതിന് പിന്നാലെ ലോക്ഭവന്‍ റൂട്ടികേലക്ക് തിരിച്ച വിജയ്, പാതി വഴിയില്‍ യൂ ടേണ്‍ എടുത്ത് മടങ്ങി. ലോക്ഭവന്‍ റൂട്ടിലെ അഡയാര്‍ ഗാന്ധി നഗറില്‍ വച്ചാണ് വിജയ് വാഹനം തിരിച്ച് പട്ടണംപാക്കത്തെ വീട്ടിലേക്ക് മടങ്ങിയത്. ഗവര്‍ണര്‍ സമയം കൊടുത്തിട്ടില്ലെന്നാണ് സൂചന.

വിജയ് ഭൂരിപക്ഷം ഉറപ്പാക്കിയതിന് ശേഷമുള്ള ലോക് ഭവന്‍ തീരുമാനം ഇതുവരെയും പുറത്തുവന്നിട്ടില്ല. സര്‍ക്കാര്‍ രൂപീികരണത്തിനായി വിജയ് ലോക്ഭവനിലേക്ക് ഇറങ്ങുന്നത് നാലാം തവണയാണ്. ഭൂരിപക്ഷം ഉറപ്പിച്ച ശേഷം വിജയ് യെ കാണാന്‍ ഗവര്‍ണര്‍ തയാറാകാതിരിക്കുന്ന സാഹചര്യത്തില്‍ തമിഴകത്ത് സസ്‌പെന്‍സ് തുടരുകയാണ്. വിജയ്ക്ക് ഇന്ന് ഗവര്‍ണര്‍ സമയം നല്‍കിയേക്കില്ലെന്നും റിപ്പോര്‍ട്ടുണ്ട്. നാളെ രാവിലെ നാട്ടിലേക്ക് മടങ്ങാന്‍ ഗവര്‍ണര്‍ തീരുമാനിച്ചതായും ലോക്ഭവന്‍ വൃത്തങ്ങള്‍ പറയുന്നുണ്ട്. അങ്ങനെയെങ്കില്‍ വിജയ്ക്ക് സര്‍ക്കാര്‍ രൂപീകരണത്തിനായി കാത്തിരിക്കേണ്ടിവരും.