തമിഴ് വികാരം; ശ്രീലങ്കയില് നടക്കുന്ന കോമണ്വെല്ത്ത് സമ്മേളനത്തില് പ്രധാനമന്ത്രി പങ്കെടുക്കില്ല;
ശ്രീലങ്കയിലെ കൊളംബോയില് അടുത്ത വെള്ളിയാഴ്ച തുടങ്ങുന്ന കോമണ്വെല്ത്ത് ഭരണത്തലവന്മാരുടെ സമ്മേളനത്തില് (ചോഗം) പ്രധാനമന്ത്രി മന്മോഹന് സിംഗ് പങ്കെടുക്കില്ല. ഇക്കാര്യം ഇരുപത്തിനാല് മണിക്കൂറിനകം ശ്രീലങ്കന് സര്ക്കാരിനെ അറിയിക്കും. ഔദ്യോഗിക പ്രഖ്യാപനം ഉടനുണ്ടാകുമെന്ന് വിദേശകാര്യ വകുപ്പ് അറിയിച്ചു.
കോണ്ഗ്രസ് അധ്യക്ഷ സോണിയഗാന്ധിയുടെ അധ്യക്ഷതയില് നടന്ന നേതൃയോഗത്തില് ശ്രീലങ്കയിലേക്കു പോകേണ്ടതിന്റെ ആവശ്യകത പ്രധാനമന്ത്രി വിശദീകരിച്ചു. എന്നാല് തമിഴ്നാട്ടില് ഇതിനെതിരേയുള്ള ശക്തമായ എതിര്പ്പിന്റെ വിശദാംശങ്ങള് ധനമന്ത്രി പി. ചിദംബരം വിശദീകരിച്ചു. ചിദംബരത്തിന്റെ അഭിപ്രായം തന്നെയാണ് കോര് കമ്മിറ്റിയില് ഭൂരിപക്ഷം അംഗങ്ങളും സ്വീകരിച്ചത്.
പ്രധാനമന്ത്രിയുടെ ശ്രീലങ്കന് യാത്ര സംബന്ധിച്ച് തമിഴ്നാട്ടിലെ എതിര്പ്പു ശക്തമാണെങ്കിലും രാജ്യത്തിന്റെ ദീര്ഘകാല താത്പര്യസംരക്ഷണത്തിനു ചോഗം സമ്മേളനത്തില് ഇന്ത്യയുടെ പങ്കാളിത്തം അനിവാര്യമാണെന്നായിരുന്നു വിദേശകാര്യ മന്ത്രാലയത്തിന്റെ നിലപാട്. മേഖലയിലെ ഇന്ത്യയുടെ തന്ത്രപരമായ മേല്ക്കൈ നിലനിര്ത്താന് ചോഗം ഉച്ചകോടിയിലെ പങ്കാളിത്തം വേണമെന്നും വിദേശകാര്യ വകുപ്പും സുരക്ഷാ ഏജന്സികളും പറയുന്നു. ശ്രീലങ്കയില് ചൈന കൂടുതല് സ്വാധീനം ഉറപ്പിക്കുന്നത് ഇന്ത്യക്കു ഗുണകരമാകില്ല.
എന്നാല്, തമിഴ്നാട്ടിലെ രാഷ്ട്രീയനേതാക്കള് പ്രശ്നത്തെ വൈകാരികമായെടുക്കുന്നതു യു.പി.എയെയും കോണ്ഗ്രസിനെയും വെട്ടിലാക്കിയിരിക്കുകയാണ്. തമിഴ്പാര്ട്ടികളുടെ കര്ക്കശ നിലപാടിനെ പാടേ അവഗണിക്കുന്നതു രാഷ്ട്രീയമായി തിരിച്ചടിയാകുമെന്നതാണു കോണ്ഗ്രസിനെ വിഷമിപ്പിക്കുന്നത്. പ്രധാനമന്ത്രി ശ്രീലങ്കയിലേക്കു പോകുന്നതിനെതിരേ തമിഴ്നാട് നിയമസഭ ഏകകണ്ഠമായി പ്രമേയം പാസാക്കിയിരുന്നു.
https://www.facebook.com/Malayalivartha
