സി.ബി.ഐയെ അസാധുവാക്കിയ ഗുവാഹത്തി ഹൈക്കോടതി വിധിയ്‌ക്ക്‌ സ്‌റ്റേ; കേസ്‌ ഡിസംബര്‍ ആറിന്‌ സുപ്രീംകോടതി വീണ്ടും പരിഗണിക്കും
സി.ബി.ഐ ഭരണഘടനാ വിരുദ്ധമായാണ്‌ രൂപീകരിച്ചതെന്ന ഗുവാഹത്തി ഹൈക്കോടതി വിധി സുപ്രീംകോടതി സ്‌റ്റേ ചെയ്‌തു. ഗുവാഹത്തി ഹൈക്കോടതി വിധിക്കെതിരെ കേന്ദ്രം സുപ്രീംകോടതിയെ സമീപിക്കുകയായിരുന്നു. കേസ്‌ ഡിസംബര്‍ ആറിന്‌ കോടതി വീണ്ടും പരിഗണിക്കും.
സി.ബി.ഐ രൂപീകരണം ഭരണഘടനാ വിരുദ്ധമാണെന്ന ഹൈക്കോടതി വിധിയെ തുടര്‍ന്ന്‌ പ്രധാനപ്പെട്ട പല കേസുകളുടേയും അന്വേഷണം അവതാളത്തിലായിരുന്നു. ഇതിന്റെയൊക്കെ പശ്ചാത്തലത്തിലാണ്‌ സുപ്രീം കോടതി കേസ്‌ ഇന്നു തന്നെ പരിഗണിച്ചത്‌.
ഹൈക്കോടതി വിധിക്കെതിരെ അപ്പീല്‍ നല്‍കണമെന്ന് സി ബി ഐ ഡയറക്ടര്‍ രഞ്ജിത്ത് സിന്‍ഹതന്നെ കേന്ദ്രസര്‍ക്കാരിനോട് ആവശ്യപ്പെടുകയും ചെയ്തിരുന്നു. ഇതേത്തുടര്‍ന്ന് സി ബി ഐയുടെ പ്രവര്‍ത്തനങ്ങള്‍ക്ക് മേല്‍നോട്ടം വഹിക്കുന്ന കേന്ദ്ര പേഴ്‌സണല്‍ മന്ത്രാലയത്തിന്റെ ചുമതലയുള്ള മന്ത്രി വി നാരായണസ്വാമി, സി ബി ഐ ഡയറക്ടര്‍ രഞ്ജിത്ത് സിന്‍ഹ, അറ്റോര്‍ണി ജനറല്‍ ഗുലാം ഇ വാഹന്‍വതി എന്നിവര്‍ കഴിഞ്ഞ ദിവസം പലതവണ ചര്‍ച്ചകള്‍ നടത്തി.
അസമിലെ ബി.എസ്.എന്‍.എല്‍ ജീവനക്കാരന്‍ നവേന്ദ്രകുമാര്‍ നല്‍കിയ റിട്ട് ഹര്‍ജിയിലാണ് ഗുവാഹാട്ടി ഹൈക്കോടതി സി ബി ഐയ്ക്ക് നിയമസാധുതയില്ലെന്ന വിധി പ്രസ്താവിച്ചത്. സി.ബി.ഐ. രൂപവത്കരിക്കാന്‍ 1963 ഏപ്രില്‍ ഒന്നിന് അന്നത്തെ ആഭ്യന്തരസെക്രട്ടറി വി. വിശ്വനാഥന്‍ ഒപ്പുവെച്ച ഉത്തരവ് സാധുവല്ലെന്നായിരുന്നു കോടതി വിധി. സെക്രട്ടറിയുടെ അധികാരപരിധിക്ക് പുറത്തുള്ള കാര്യമാണിതെന്നും നിയമനിര്‍മാണസഭയുടെ അനുമതിയില്ലാതെ ഉത്തരവിലൂടെ അന്വേഷണഏജന്‍സികള്‍ രൂപവത്കരിക്കാനാകില്ലെന്നും വിധിയില്‍ ജസ്റ്റിസ് ഇഖ്ബാല്‍ അഹമ്മദ് അന്‍സാരി, ജസ്റ്റിസ് ഇന്ദിരാ ഷാ എന്നിവരടങ്ങിയ ഡിവിഷന്‍ബെഞ്ച് വ്യക്തമാക്കിയിരുന്നു.
https://www.facebook.com/Malayalivartha
